ਰਿਨੋਲਡ ਦਾ ਪੈੱਨ

Renoyld ਦਾ ਛੇਆਂ ਆਲਾ ਪੈੱਨ ਜਦੋਂ ਮੁੱਕ ਜਾਂਦਾ
ਤਾਂ ਸਟੇਸ਼ਨਰੀ ਆਲੇ ਟੋਨੀ ਤੋਂ ਲੈ ਠਿਆਨੀ ਦਾ ਸ਼ਿੱਕਾ ਪਾਉਦੇ
ਮੈਡਮ ਜੀ ਕਹਿੰਦੇ ਬੇਟਾ " ball pen ਦਿਓ"
ਤਾਂ ਸੋਚਦੇ ਬੀ ਪੈੱਨ ਤਾਂ  ਪੈੱਨ ਆ ਸਾਲਾ ball ਕੀ ਹੋਇਆ
ਹੁਣ ਪਤਾ ਲੱਗਾ ball ਤੇ gelਪੈੱਨ ਦੇ ਫਰਕ ਦਾ
ਬੱਸ 'ਚ ਬਹਿਣ ਲੱਗਿਆਂ ਘਰਦਿਆਂ ਨਾਲ ਲੜਦੇ
"ਮੈਂ ਨੀਂ, ਮੈਂ ਨੀ ਮੈਂ ਤਾਂ ਸੀਸੇ ਆਲੇ ਪਾਸੇ ਬਹਿਣਾ"
ਫਾਟਕ ਤੇ ਬੱਸ ਰੁਕਦੀ ਤਾਂ ਟੱਪਦੀ ਰੇਲਗੱਡੀ ਦੇ ਡੱਬੇ ਜ਼ਰੂਰ ਗਿਣਦੇ
ਗਰਮੀ ਦੀ ਟਿਕੀ ਦੁਪਹਿਰ ਨੂੰ ਦੂਰ ਕਿਸੇ ਦੇ
ਖੇਤ ਚੱਲਦੇ ਇੰਜਣ ਦੀ 'ਵਾਜ਼ ਸੁਣਦੀ
ਤਾਏ ਹੁਣੀਂ ਪੱਠੇ ਕੁਤਰਦੇ ਤਾਂ ਦੋ ਵੀਲ੍ਹੇ ਇੰਜਣ 'ਚ ਪਾਣੀ ਪਾਉਦੇ
ਟੋਕੇ ਮੂਹਰੋਂ ਮੱਕੀ ਦੀਆਂ ਡੋਡੀਆਂ ਚੱਬਦੇ ਜਾਂ
ਪੱਕੀ ਵੀ ਜਵੀਂ ਦੀ ਸੀਟੀ ਬਣਾਉਦੇ
ਸਕੂਲ 'ਚ ਪੋਲਿਓ ਆਲੇ ਟੀਕੇ ਲਾਉਣ ਆਉਦੇ ਤਾਂ ਬਰੂਸ ਲੀ
ਤੋਂ ਵੀ ਤੇਜ਼ ਕੰਧ ਟੱਪਕੇ ਸਪ੍ਰਿੰਟ ਖਿੱਚਦੇ ਤੇ ਘਰੇ ਆਕੇ ਕਹਿੰਦੇ
"ਅੱਜ ਅੱਧੀ ਛੁੱਟੀ ਸਾਰੀ ਕਰਤੀ ਮਾਹਟਰਾਂ ਨੇ"
ਕਿਸੇ ਦੇ ਵਿਆਹ ਹੁੰਦਾ ਤਾਂ ਦੌਣ ਆਲਾ ਪਾਸਾ ਉੱਤੇ ਨੂੰ ਕਰਕੇ
ਜੋੜ ਕੇ ਰੱਖੇ ਮੰਜਿਆਂ ਤੇ ਟੰਗੇ ਸਪੀਕਰ  ਵੇਖਕੇ ਚਾਅ ਚੜ੍ਹ ਜਾਂਦਾ
ਤੰਦੂਰ ਚੋਂ ਰੜ੍ਹੀ ਮੱਚੀ ਜੀ ਰੋਟੀ ਕੱਢਕੇ ਕਰੜ ਕਰੜ ਕਰਕੇ ਖਾਂਦੇ
ਮਾਤਾ ਤੋਂ ਪੜਦੇ ਜੇ ਨਾਲ ਮਿੱਟੀ ਵੀ ਛਕਦੇ ਸੀ
ਨਵੇਂ ਕੈਦੇ ਕਾਪੀਆਂ 'ਚ ਵਿੱਦਿਆ ਮਾਤਾ ਦੇ ਪੱਤੇ ਜੇ ਪਾਉਦੇ
ਜੂੜੇ ਤੇ ਰੁਮਾਲ ਪਾ, ਨੀਲੀ ਨੀਕਰ ਸ਼ਲਟ ਪਾ ਸਕੂਲ ਜਾਂਦੇ
ਬਸਤੇ ਵਿੱਚ ਦੀ ਪ੍ਰਕਾਰ ਟਪਾ ਮੂਹਰਲੇ ਬੈਂਚ ਆਲੇ  ਦੀ ਚੀਕ ਕਢਾ ਦਿੰਦੇ
ਤੇ ਫਿਰ ਜੁੰਡੋ ਜੁੰਡੀਂ ਹੋ ਲੱਪੜ ਮਾਰ ਗੱਲ੍ਹਾਂ ਤੇ ਘੁੱਦੇ ਦੇ ਨਕਸ਼ੇ ਬਣਾ ਦਿੰਦੇ
ਤੇ ਅਗਲੇ ਪੀਰਡ 'ਚ ਜੱਫੀ ਪਾ ਲੈਂਦੇ ਤੇ ਗਾਓਦੇ
"ਆਪਾਂ ਦੋਵੇਂ ਯਾਰ ਯਾਰ, ਅੰਡੇ ਖਾਈਏ ਚਾਰ ਚਾਰ
ਇੱਕ ਅੰਡਾ ਨੂਨ ਵਾਲਾ ਤੇਰਾ ਭਾਪਾ ਸੂਣ ਵਾਲਾ"......ਘੁੱਦਾ