ਪਛੜੇ ਲੋਕ

ਇਹ ਪਛੜੇ ਅਨਪੜ ਲੋਕ ਨੇ
ਪਾਸੇ ਰਹਿ ਇਹਨਾਂ ਤੋਂ ਕਿਤੇ ਤੈਨੂੰ ਵੀ ਇਹਨਾਂ ਦਾ ਪਾਅ ਨਾ ਲੱਗਜੇ
ਮੀਂਹ ਪੈਣ ਤੇ ਇਹਨਾਂ ਨੂੰ ਪਤਾ ਨੀਂ ਲੱਗਦਾ ਬੀ ਮੌਸਮ ਰਮਾਂਟਿਕ ਹੋ ਗਿਆ
ਸਮਾਂ ਦੀ ਉਤੋਂ ਗੁਰਦਆਰੇ ਕੰਨੀਂ ਮੂੰਹ ਕਰਕੇ ਅਰਦਾਸ ਕਰਨਗੇ
ਦਾਤਾ ਮੂੰਹ ਆਈ ਰੋਜ਼ੀ ਨਾ ਖੋਹੀਂ
ਇਹਨਾਂ ਨੂੰ ਪੀਜ਼ਿਆਂ ਪਾਸਤਿਆਂ ਦੀ ਵੀ ਸੂੰਹ ਹੈਨੀ
ਪਿੱਪਲ ਦੇ ਪੱਤੇ ਨਾਲ ਪੂੜੇ ਬਣਾਉਣਗੇ
ਜਾਂ ਘਰ ਦੀ ਕਢਾਈ ਵਈ ਘਾਣੀ ਚ ਤਿੜ ਕੇ ਗੁਲਗੁਲੇ ਕੱਢਣਗੇ
ਅਖੇ ਜਵਾਕ ਖਾ ਲੈਣਗੇ ਚਾਰ ਦਿਨ
ਅਸੀਂ ਮੋਡਰਨ ਨਾਗਰਿਕ ਰੈਸਟੋਰੈਂਟ ਚ ਜਾਕੇ ਕੈਂਡਲ ਨਾਈਟ ਚ ਡਿਨਰ ਕਰੀਦਾ
ਤੇ ਇਹ ਨਿੱਤ ਮੋਮਬੱਤੀ ਬਾਲਕੇ ਲੰਗਰ ਪਾੜਨ ਆਲੀ ਜਨਤਾ ਨੂੰ ਕੈਂਡਲ ਨਾਈਟ ਦੀ ਸਾਲੀ ਫੀਲਿੰਗ ਈ ਨੀਂ ਆਉਦੀਂ
ਇਹ ਕਦੇ ਉਦੋਂ ਗਾਹਾਂ ਨੀਂ ਟੱਪੇ ਕਦੇ ਜਿੱਥੇ ਲਿਖਿਆ ਹੁੰਦਾ
ਘੁੱਦਾ - 0
ਤੇ ਅਸੀਂ ਵਾਈਟ ਹਾਊਸ ਤੋਂ ਉਰੇ ਗੱਲ ਨੀਂ ਕਰਦੇ
ਦਾਤੀ ਪੱਲੀ ਛੱਡ ਮੂੰਹ ਚੱਕੀ ਜਿਹੜਾ ਜ਼ਹਾਜ਼ ਵੇਂਹਦੇ ਹੁੰਦੇ ਨੇ ਇਹ
ਅਸੀਂ ਉਹਦੇ ਚ ਬੈਠੇ ਮੈਗਜ਼ੀਨ ਰੀਡ ਕਰਦੇ ਕਿਸੇ ਬੈਸਟ ਡੀਲ ਖਾਤਰ ਫੌਰਨ ਜਾ ਰਹੇ ਹੁੰਨੇ ਆਂ
ਮੁੜਹਕੇ ਦੀ ਗੰਦੀ ਮੁਸ਼ਕ ਆਉਦੀਂ ਆ ਇਹਨਾਂ ਚੋਂ
ਇਹਨਾਂ ਦੇ ਬੁੜੇ ਲੰਮੇ ਪੈਕੇ ਰੇਲਾਂ ਰੋਕਕੇ ਭਾਰਤੀਯ ਰੇਲ ਨੂੰ ਐਂਮੇ ਈ ਤੰਗ ਕਰੀ ਜਾਣਗੇ ਅਖੇ ਜਿਣਸਾਂ ਦੇ ਰੇਟ ਵਧਾਉ
ਕਾਣ ਨੀਂ ਜਾਂਦੇ ਅਸੀਂ ਐਹੇ ਜੇ ਦਿਆਂ ਦੀ
ਢੂਈ ਨੀਂ ਮਾਰਦੇ
ਸਬ ਹੁੰਦਿਆਂ ਸੁੰਦਿਆਂ ਵੀ ਸਾਨੂੰ ਇਹਨਾਂ ਦੀ ਇੱਕੋ ਮਾਰਦੀ ਆ ਸਾਲੀ
ਜਿਹੜਾ ਇਹ ਟਰਾਲੀ ਦੇ ਡਾਲੇ ਤੇ ਮੋਟਾ ਕਰਕੇ ਲਿਖਾਉਦੇ ਨੇ "ਅੰਨਦਾਤਾ" ...ਘੁੱਦਾ