ਘੁੱਦਾ ਸਿੰਗਰ

ਹੈਲੋ
ਹਾਂ ਕੌਣ
ਜੀ ਮੈਂ ਘੁੱਦੇ ਤੋਂ ਗੈਕ ਬੋਲਦਾਂ, ਤੁਸੀ ਅਮਰ ਆਡੀਓ ਆਲੇ ਬੋਲਦੇ ਓਂ?
ਹਾਂ ਹਾਂ ਕੰਮ ਦੱਸ
ਜੀ ਬਸਾਖੀ ਨੇੜੇ ਆ ਧਰਮਕੀ ਰੀਲ਼ ਕਢਾਉਣੀ ਆ
ਨਾਲੇ ਧਰਮਪ੍ਰੀਤ ਅਰਗੇ ਹਿਝਕੀਆਂ ਨੂੰ ਤੁਸੀਓ ਹਿੱਟ ਕੀਤਾ ਬਾਈ ਬਣੇ ਮੇਰੀ ਰੀਲ ਕਰਾਦੋ
ਠੀਕ ਆ, ਗਾਣੇ ਗੱਪੇ ਲੈਕੇ ਸਟੂਡਿਉ ਆਜੋ
ਅਮਰ ਆਡੀਓ ਪੇਸ਼ ਕਰਦੇ ਨੇ ਘੁੱਦੇ ਦੀ ਸੁਰੀਲੀ 'ਵਾਜ਼ ਚ ਨਮੀਂ ਟੇਪ
"ਬਾਜ਼ਾ ਵਾਲਿਆ ਤੇਰਾ ਖਾਲਸਾ"
ਹੈਲੋ
ਹਾਂ ਬਈ ਕੌਣ
ਜੀ ਮੈਂ ਗੈਕ ਆ ਮੇਰੀ ਪਹਿਲਾਂ ਬੀ ਟੇਪ ਆਈ ਸੀ ਮਾਰਕੀਟ 'ਚ
ਹੁਣ ਮਾਤਾ ਦੇ ਨਰਾਤੇ ਨੇੜੇ ਆ ਬਾਈ ਬਣਕੇ ਧਰਮਕੀ ਟੇਪ ਕਢਦੋ ਮੇਰੀ
ਅੱਛਾ ਅੱਛਾ ਘੁੱਦੇ ਵਾਲਾ ਗੈਕ
ਹਾਂਜੀ ਹਾਂਜੀ ਓਹੀ
ਕਾਕਾ ਤੇਰੀ ਪਹਿਲਾਂ ਵਾਲੀ ਟੇਪ ਤਾਂ ਮਾਰਕੀਟ 'ਚ ਈ ਪਈ ਰਹਿਗੀ
ਹਾਂਜੀ ਤਾਂਹੀ ਐਂਤਕੀ ਮਾਤਾ ਦੇ ਨਰਾਤਿਆਂ ਦੀ ਟੇਪ ਕੱਢਣੀ ਬੀ ਕੀ ਪਤਾ ਕਰਾਇਆ ਭਾੜਾ ਨਿਕਲਜੇ
ਅਮਰ ਆਡੀਓ ਪੇਸ਼ ਕਰਦੇ ਨੇ ਸੁਪਰਹਿੱਟ ਕੈਸਟ ਦਰਸ਼ਕਾਂ ਦੀ ਝੋਲੀ ਪਾ ਚੁੱਕੇ ਗੈਕ ਘੁੱਦਾ ਯੂ.ਐੱਸ. ਏ ਦੀ ਨਮੀਂ ਟੇਪ
"ਨਰਾਤਿਆਂ 'ਚ ਫੁੱਲ ਰੌਣਕਾਂ"
ਹੈਲੋ
ਹਾਂ ਕਾਕਾ ਘੁੱਦੇ ਆਲਾ ਬੋਲਦਾ
ਹਾਂਜੀ ਹਾਂਜੀ ਪਛਾਣ ਲਿਆ ਮੈਨੂੰ?
ਆਹੋ ਤੇਰਾ ਲੰਬਰ ਪਛਾਣ ਲਿਆ ਸੀ ਹੁਣ ਤਾਂ
ਜੀ ਆਸਟਰੀਆ 'ਚ ਇੱਕ ਬਾਬੇ ਦਾ ਕਤਲ ਕਰਤਾ ਸਿੱਖਾਂ ਨੇ
ਮੈਨੂੰ ਪੂਰੀ ਗਰਮੇਸ਼ ਆ ਜੀ, ਹੁਣ ਰਵਿਦਾਸ ਭਾਈਚਾਰੇ ਦੀ ਟੇਪ ਕਰਾਉਣੀ ਆ
ਸਾਲੇਆ ਤੂੰਵੀ ਬਾਹਲਾ ਢੀਠ ਆ, ਦੋ ਆਰੀ ਖੇਹ ਕਰਾਲੀ ਹੁਣ ਤਾਂ ਕਿਸੇ ਨਾਲ ਸੀਰੀ ਸੂਰੀ ਰਲਜਾ, ਗੈਕੀ ਨੂੰ ਬਖਸ਼ਦੇ
ਨਹੀਂ ਜੀ ਆਹ ਤਾਂ ਮੁੱਦਾ ਈ ਬਾਹਲਾ ਮੌਕੇ ਦਾ ਆ ਜੀ ਬਾਹਲੀ ਕੈਸ਼ਟ ਬਿਕੂ ਆਪਣੀ
ਚੱਲ ਆਜਾ ਫਿਰ ਸਟੂਡਿਓ ਨੌਂ ਆਲੀ ਮਿੰਨੀ ਤੇ
ਅਮਰ ਆਡੀਓ ਪੇਸ਼ ਕਰਦੇ ਨੇ ਰੌਕਸਟਾਰ ਗੈਕ ਘੁੱਦਾ ਯੂ.ਐੱਸ.ਏ ਦੀ ਦਿਲਖਿੱਚਵੀਂ 'ਵਾਜ਼ 'ਚ ਨਮੀਂ ਟੇਪ
"ਵੱਖਰਾ ਪੰਥ ਚਲਾਵਾਂਗੇ"
ਹੈਲੋ
ਖਬਰਦਾਰ ਘੁੱਦੇ ਆਲਿਆ ਜੇ ਹੁਣ ਫਿਰ ਟੇਪ ਕਰਾਉਣ ਦੀ ਗੱਲ ਕੀਤੀ ਤਾਂ
ਨਹੀਂ ਜੀ ਹੁਣ ਤਾਂ ਮੋਹ ਜਾ ਬਾਹਲਾ ਪੈ ਗਿਆ ਥੋਡੇ ਨਾਲ ਉਂਈ ਫੂਨ ਲਾ ਲਿਆ ਬੀ ਹਾਲ ਚਾਲ ਈ ਪੁੱਛ ਲੀਏ....ਘੁੱਦਾ