ਜਦੋਂ ਸ਼ੈਹਰ ਜਾਣੇ ਆਂ

 ਦਾਦੇ ਦਾ ਚੈੱਕਅੱਪ ਕਰਾਉਣ ਜਦੋਂ ਸ਼ਹਿਰ ਜਾਣੇ ਆ ਅਸੀਂ,
ਉਲਝ ਜਾਣੇ ਆ ਸੀਸੇ ਆਲ਼ੇ ਗੇਟ ਤੇ ਲਿਖਿਆ "PULL" ਵੇਖਕੇ,
ਬੀ ਇਹ ਖਿੱਚ ਕੇ ਖੁੱਲੂ ਕੇ ਧੱਕਕੇ,
ਬਠਿੰਡੇ ਦੀ ਮਾਲ ਰੋਡ ਤੇ ਜਦੋਂ ਤੁਰਦੇ ਹੁੰਨੇ ਆ,
ਮੂੰਹ ਚੁੱਕੀ ਵੇਂਹਨੇ ਹੁੰਨੇ ਆਂ ਹਨੂੰਮਾਨ ਦਾ ਬੁੱਤ ,
ਤੇ ਆਪੇ ਮੂੰਹੋ ਨਿਕਲ ਜਾਂਦਾ,
"ਭੈਂ.....ਸੱਚਿਓਂ ਬਾਹਲਾ ਵੱਡਾ ਯਰ"
ਬਜ਼ਾਰ 'ਚ ਖੜ੍ਹੀ ਕਾਰ ਦੇ ਕਾਲੇ ਸੀਸਿਆਂ ਨੂੰ ਵੇਖ ...ਪੋਜ਼ ਮਾਰੀਦੇ ਆ, ਪੱਗ ਸੈੱਟ ਕਰਕੇ ਮੁਛਾਂ ਲੋਟ ਕਰੀਦੀਆਂ
ਫਿਰ ਸੀਸਾ ਡਾਉਨ ਕਰਕੇ ਵਿੱਚ ਬੈਠੀ ਕੋਈ ਕੁੜੀ ਬੋਲਦੀ ਆ,
"have any problem"?
ਫਿਰ ਕਚਿਆਣੀ ਜੀ ਹਾਸੀ ਹੱਸ ਕੇ ਕਹੀਦਾ.....ਸਸਰੀਕਾਲ ਜੀ
ਪਿੰਡ ਨੂੰ ਮੁੜਦੇ ਰੇੜ੍ਹੀ ਤੋਂ ਜਦੋਂ
ਕੇਲਿਆਂ ਦਾ ਭਾਅ ਪੁੱਛੀਦਾ
ਤਾਂ ਅਗਲਾ ਸੁਣਾਉਂਦਾ...."ਚਾਲੀ ਰੁਪੈ ਦਰਜਨ"
ਤਾਂ ਊਂਈ ਕਹਿ ਦਈਦਾ,
"ਸਾਬ੍ਹ ਨਾਲ ਲਾਲਾ ਬਾਈ ਯਰ, ਦੋ ਲੈਲਾਂਗੇ"
ਮੰਡੀ 'ਚ ਨਰਮੇ ਦੀ ਢੇਰੀ ਕੋਲ ਖੜ੍ਹੇ ਹੁੰਨੇ ਆ,
ਵਿਚਾਰੇ ਜੇ ਬਣਗੇ,
ਮਿੱਲ ਆਲੇ ਆਕੇ ਮਰਜ਼ੀ ਦਾ ਰੇਟ ਲਾਉਦੇ ਆ
ਘਾਟਾ ਵਾਧਾ ਚੁੱਪ ਕਰਕੇ ਸਹਿ ਜਾਣੇ ਆ ਅਸੀਂ,
ਪਰ ਪਿੰਡ ਨੂੰ ਮੁੜਦੇ ਮਿੰਨੀ ਬੱਸ ਦੇ
ਕਨੈਟਰ ਦੇ ਗਲਮੇ 'ਚ ਹੱਥ ਜ਼ਰੂਰ ਪਾ ਲਈਦਾ
ਇੱਕ ਰੁਪਈਏ ਪਿੱਛੇ
ਇੱਕ ਰਪਈਏ ਪਿੱਛੇ ਅਣਖ ਜਾਗਦੀ ਆ ਸਾਡੀ..... ...ਅੰਮ੍ਰਿਤ ਪਾਲ ਘੁੱਦਾ