Wednesday 27 May 2015

ਜਸਵੰਤ ਸਿੰਘ ਕੰਵਲ

ਫੋਟੋ ਨੂੰ ਗੌਹ ਨਾਲ ਦੇਖਿਓ। ਪਿੰਡ ਢੁੱਡੀਕੇ ਦੇ ਜੰਮ ਪਲ, ਬਾਪੂ ਜਸਵੰਤ ਸਿੰਘ ਕੰਵਲ। 
ਸੱਤਵੀਂ ਅੱਠਵੀਂ 'ਚ ਹੁੰਦੇ ਸੀ ਜਦੋਂ ਤੋਂ ਬਾਪੂ ਕੰਵਲ ਹੋਣਾਂ ਦੇ ਲਿਖੇ ਨਾਵਲਾਂ ਨੂੰ ਪੜ੍ਹਨ ਲੱਗਪੇ ਸੀ। ਜੇ ਬਾਬੇ ਕੰਵਲ ਦੇ ਨਾਵਲ ਨੂੰ ਪੜ੍ਹਕੇ ਥੋਡੇ ਪਿੰਡੇ ਦਾ ਲੂੰ ਕੰਡਾ ਖੜ੍ਹਾ ਨਾ ਹੋਵੇ ਤਾਂ ਸਮਝਿਓ ਸਰੀਰ 'ਚ ਕੋਈ ਖਰਾਬੀ ਈ ਆ। 1919 'ਚ ਜੰਮੇ ਬਾਬੇ ਕੰਵਲ ਹੋਣੀਂ ਰੌਲੇ ਤੋਂ ਪਹਿਲੋਂ ਲਿਖਣ ਲਾਪੇ ਸੀ। ਜਦੋਂ 'ਲਹੂ ਦੀ ਲੋਅ' ਵਰਗੇ ਨਾਵਲ ਭਾਰਤ ਨੇ ਨਾ ਛਾਪੇ,  ਓਦੋਂ ਸਿੰਗਾਪੁਰੋਂ ਛਪਕੇ ਏਹ ਨਾਵਲ ਸਮੱਗਲ ਹੋਕੇ ਭਾਰਤ 'ਚ ਵਿਕਿਆ। ਪਿੱਛੋਤੋੜੀਂ ਬਾਪੂ ਕੰਵਲ ਹੋਣਾਂ ਨੇ ਭਰਵੀਆਂ ਦਲੀਲਾਂ ਨਾਲ 'ਸਿੱਖ ਸਟੇਟ' ਦੀ ਹਮਾਇਤ ਕੀਤੀ ,ਤਾਂ ਕਰਕੇ ਕਈ ਕੰਵਲ ਦੇ ਵਿਰੋਧੀ ਬਣੇ। ਹਾਸੀ ਆਉਦੀਂ ਆ ਜਦੋਂ ਨੱਬੇ ਦਾ ਜੰਮਿਆ ਜਵਾਕ ਬਾਪੂ ਕੰਵਲ ਨੂੰ ਗਲਤ ਸਿੱਧ ਕਰਨ ਦੀ ਕੋਸ਼ਿਸ਼ ਕਰਦਾ।
ਪੰਜਾਬ ਬਾਬੇ ਕੰਵਲ ਦਾ ਦੇਣ ਨਹੀਂ ਦੇ ਸਕਦਾ। ਨੈੱਟ ਤੇ ਬਥੇਰਾ ਪੜ੍ਹਦੇ ਆਂ, ਪਰ ਜਦੋਂ ਫੌਹ ਪਿਆ ਬਾਬੇ ਕੰਵਲ ਹੋਣਾਂ ਨੂੰ ਵੀ ਪੜ੍ਹਿਉ। ਸਰਬੰਸਦਾਨੀ ਚੜ੍ਹਦੀਆਂ ਕਲਾ 'ਚ ਰੱਖੇ ਪੰਜਾਬ ਦੇ ਹੀਰੇ ਨੂੰ......ਘੁੱਦਾ

ਬਾਦਲ

ਮੁੱਖ ਮੰਤਰੀ ਬਾਦਲ। ਕੋਈ ਸ਼ੱਕ ਨਹੀਂ ਏਸ ਬੰਦੇ ਨੇ ਸਭ ਤੋਂ ਵੱਧ ਪੰਜਾਬ ਦਾ ਨੁਕਸਾਨ ਕਰਿਆ। ਮੋਰਚੇ, ਪਾਣੀ ਮਸਲੇ, ਪੀ.ਪੀ.ਪੀ ਤੇ ਹੋਰ ਮੁੱਦੇ ਏਹਦੀ ਜਿੱਤ ਹਾਰ ਦੇ ਕਾਰਨ ਵੀ ਬਣੇ। ਨਾਨਕ ਨਾਮ ਲੇਵਾ ਸਿੱਖ ਕੌਮ ਨੇ ਚੋਣ ਨਿਸ਼ਾਨ ਤੱਕੜੀ ਤੇ ਮੋਹਰ ਲਾਓਣੀ ਆਵਦਾ ਧਰਮੀ ਫਰਜ਼ ਸਮਝਿਆ। ਵਪਾਰੀ, ਕਿਰਸਾਨ, ਸਰਕਾਰੀ ਮੁਲਾਜ਼ਮ, ਬੇਰੁਜ਼ਗਾਰ ਮਲਬ ਕਿ ਹਰਿੱਕ ਬੰਦਾ ਏਸ ਸਰਕਾਰ ਨੂੰ ਗਾਹਲਾਂ ਕੱਢਦਾ। ਫੇਰ ਵੀ ਬਾਦਲ ਜਿੱਤਦਾ। 
ਏਹਨਾਂ ਨੂੰ ਪਤਾ ਕਿ ਸੁਰਖੀਆਂ 'ਚ ਕਿਵੇਂ ਰਹਿਣਾ। ਕਦੇ ਨਹਿਰਾਂ 'ਚ ਬੱਸਾਂ ਤੇ ਕਦੇ ਮੰਗਲ ਗ੍ਰਹਿ ਤੇ ਯੂਥ ਭਰਤੀ ਅਰਗੀਆਂ ਸ਼ੁਰਲੀਆਂ ਏਹਨਾਂ ਨੂੰ ਹੋਰ ਮਸ਼ਹੂਰ ਕਰਦੀਆਂ। ਹਰਿੱਕ ਫੋਨ 'ਚ ਏਹਨਾਂ ਦੀਆਂ ਫੋਟਮਾਂ ਹੈਗੀਆਂ। ਜੇਹੜੇ ਸਾਡੇ ਮੁੰਡੇ ਹੁਣ ਬਾਦਲ ਨੂੰ ਗਾਹਲਾਂ ਕੱਢਦੇ ਨੇ ਵੋਟਾਂ ਵੇਲੇ ਓਹੀ ਮੁੰਡੇ ਸਕੂਲ ਕੋਲ ਲੱਗੇ ਕਾਲੀ ਦਲ ਦੇ ਟੈਂਟ 'ਚ ਬੈਠੇ, ਡਿਜਪੋਜ਼ਲ ਗਲਾਸਾਂ 'ਚ ਮਰਿੰਡੇ ਪੀਂਦੇ ਨੇ। ਨਾਏ ਲੰਘਦੇ ਟੱਪਦੇ ਨੂੰ ਆਖਣਗੇ," ਤਾਇਆ ਦੁੱਗ ਲੰਬਰ ਆਲੀ ਸੁੱਚ ਨੱਪਦੀਂ"। 
ਐਨ ਵੋਟਾਂ ਵੇਲੇ ਬਾਦਲ ਸਰਕਾਰ ਭਰਤੀਆਂ ਕੱਢ ਦਿੰਦੀ ਆ। ਗੌੰ ਦੇ ਮਾਰੇ ਲੋਕ ਤੱਕੜੀ ਨੂੰ ਵੋਟ ਪਾ ਜਾਂਦੇ  ਨੇ।
2017 ਦੀਆਂ ਵੋਟਾਂ ਆਈਆਂ ਲੈ। ਜਰਾਂਦ ਕਰੋ। ਬਾਕੀ ਅੱਤ ਦਾ ਅੰਤ ਲਾਜ਼ਮੀ ਹੁੰਦਾ...ਘੁੱਦਾ

ਠੇਠ ਲਫਜ਼

ਪੰਜਾਬੀ ਭਾਸ਼ਾ ਦੇ ਕੁਝ ਠੇਠ ਲਫਜ਼ ਤੇ ਉਹਨ੍ਹਾਂ ਦਾ ਮਤਲਬ
1. ਏਖੜ- ਜਦੋਂ ਦੋ ਤਿੰਨ ਦਿਨ ਪਸੂ ਦੀ ਧਾਰ ਨਾ ਕੱਢੀਏ ਤੇ ਲੇਵਾ ਦੁੱਧ ਨਾਲ ਆਕੜਜੇ, ਉਹਨੂੰ ਏਖੜ ਕਿਹਾ ਜਾਂਦਾ।
2. ਨੇਤਰਾ- ਮਧਾਣੀ ਆਲੀ ਰੱਸੀ।
3. ਚੀਹੜ- ਊਠ ਦਾ ਪਿਸ਼ਾਬ।
4. ਪੇਟ ਘਰੋੜੀ- ਮਾਪਿਆਂ ਦਾ ਛੋਟਾ ਜਵਾਕ।
5. ਜੇਠਾ- ਘਰ 'ਚੋਂ ਵੱਡਾ ਜਵਾਕ।
6. ਮੇਰੂ- ਪਸੂ ਦੇ ਇੱਕ ਥਣ 'ਚ ਦੋ ਮੋਰੀਆਂ ਹੋਣ ਤਾਂ ਮੇਰੂ   ਕਿਹਾ ਜਾਂਦਾ।
7. ਘਤਿੱਤ - ਸ਼ਰਾਰਤ, ਚੌੜ, ਵੈਵਤ੍ਹ
8. ਖੁੱਤੀ - ਗਿੱਚੀ, ਧੌਣ
9. ਅਰਕ- ਕਿਸੇ ਗੱਲ ਜਾਂ ਚੀਜ਼ ਦਾ ਨਿਚੋੜ, ਕੂਹਣੀ ਨੂੰ ਵੀ ਅਰਕ ਆਂਹਦੇ ਨੇ।
10. ਗੌਂ- ਮਤਲਬ, ਹਿੰਦੀ 'ਚ ਸਵਾਰਥ
11. ਪੇਡੀ- ਗੋਡੇ ਗੋਡੇ ਨੀਰਾ, ਨੀਰੇ ਦਾ ਪਹਿਲਾ ਲੌਅ
12. ਗਤਾਵਾ- ਸੰਨੀ ਕਰਨਾ, ਵੰਡ ਰਲਾਉਣਾ
13. ਪਲੋਂ - ਗਲੀ ਸੜੀ ਤੂੜੀ ਜਾਂ ਸਰ੍ਹੋਂ ਦਾ ਗਲਿਆ ਜਾ ਟਾਂਗਰ
14. ਰੀਣ- ਤੂੜੀ ਛਾਣਕੇ ਨਿੱਕਲਿਆ ਬਰੀਕ ਮਾਲ ਪੱਤਾ
15. ਮੁਰਚਾ- ਗੁੱਟ
16. ਭਿਆਲ- ਸਾਂਝ, ਵਿੜ੍ਹੀ
17. ਬੀਚਰਨਾ- ਹਿੰਡ ਨਾਲ ਗੁੱਸੇ ਹੋਣਾ ਜਾਂ ਮੁੱਕਰਨਾ
18. ਹੇਹਾ- ਕਿਸੇ ਕੰਮ ਨੂੰ ਬਾਹਲਾ ਜੀਅ ਕਰਨ ਓਦੋਂ ਕਿਹਾ ਜਾਂਦਾ ,"ਕਿਮੇਂ ਪਰਧਾਨ ਹੇਹੇ 'ਚ ਹੋਇਆ ਫਿਰਦਾਂ"।
19. ਗੋਕਾ- ਗਾਂ, ਵਹਿੜ, ਵੱਛੀ 
20. ਗੰਧਾਲੀ - ਖਾਸੀ ਮੋਟੀ ਤੇ ਲੰਬੀ ਸੱਬਲ। ਚੱਕਰ ਘਬਰਾਹਟ ਆਉਣ ਨੂੰ ਵੀ ਕਿਹਾ ਜਾਂਦਾ ਬੀ 'ਗੰਧਾਲੀ' ਜੀ ਆਗੀ ਜਰ।
ਬਾਕੀ ਅਗਲੀ ਆਰੀ.......ਘੁੱਦਾ

1947 ਨਾਲ ਜੁੜੀਆਂ ਕੁਝ ਹੋਰ ਗੱਲਾਂ

ਦੇਸ਼ ਪੰਜਾਬ ਦੀ ਵੰਡ 1947 ਨਾਲ ਜੁੜੀਆਂ ਕੁਝ ਹੋਰ ਗੱਲਾਂ
1. ਪਾਕਿਸਤਾਨੋਂ ਉੱਜੜ ਕੇ ਆਏ ਲੋਕਾਂ ਨੂੰ ਏਧਰਲੇ ਲੋਕ 'ਮੁਸਲਮਾਨਾਂ ਨਾਲ ਵਟਾਏ' ਦਾ ਮਿਹਣਾ ਮਾਰਦੇ ਸੀ।
2. ਮਾਵਾਂ ਨੇ ਜਵਾਕਾਂ ਦੇ ਝੱਗਿਆਂ ਦੀਆਂ ਜੇਬਾਂ 'ਚ ਚਾਂਦੀ ਦੇ ਸਿੱਕੇ ਤੁੰਨਕੇ ਉੁੱਤੋਂ ਭਾਦੋਂ ਮਹੀਨੇ ਕੋਟੀਆਂ ਪਾਤੀਆਂ ਸੀ ਸੇਫਟੀ ਖਾਤਰ।
3. ਪਾਕਿਸਤਾਨੋਂ ਉੱਜੜ ਕੇ ਆਏ ਲੋਕਾਂ ਨੂੰ ਕਈ ਇਲਾਕਿਆਂ ਵਿੱਚ ਦਾਰੂ ਕੱਢਣ ਤੇ ਵੇਚਣ ਦੀ ਖੁੱਲ੍ਹ ਦਿੱਤੀ ਸੀ।
4. ਰਫਿਊਜ਼ੀਆਂ ਨੂੰ ਪਾਕਿਸਤਾਨੀ ਲੂਣ ਵੇਚਣ ਦੀ ਖੁੱਲ੍ਹ ਸੀ।
5. ਦੂਜੀ ਸੰਸਾਰ ਜੰਗ (1945) ਪਿੱਛੋਂ ਅੰਗਰੇਜ਼ਾਂ ਨੇ ਕਈ ਸਿੱਖ ਸਿਪਾਹੀਆਂ ਨੂੰ ਬਾਰ ਦੇ ਇਲਾਕਿਆਂ 'ਚ ਮੁਰੱਬੇ ਦਿੱਤੇ ਸੀ। ਵੰਡ ਹੋਣ ਤੇ ਏਹ ਟੱਬਰ ਵੱਢ ਟੁੱਕ ਤੋਂ ਬਚਕੇ ਸਹੀ ਸਲਾਮਤ ਮੁੜ ਆਏ ਸੀ।
6. ਉੱਜੜੇ ਕਿਰਸਾਨਾਂ ਨੂੰ ਤੀਜਾ ਹਿੱਸਾ ਜ਼ਮੀਨ ਦੀ ਕਾਟ ਲੱਗੀ ਸੀ।  ਸਿਰਫ ਓਹੀ ਜ਼ਮੀਨ ਮਿਲੀ ਜੀਹਦਾ ਪਾਕਿਸਤਾਨ 'ਚ ਮਾਮਲਾ ਭਰਿਆ ਜਾਦਾਂ ਸੀ। 
7. ਜੇਹੜੇ ਟੱਬਰ ਜਾਇਦਾਦ ਖਾਤਰ ਮੁਸਲਮਾਨ ਬਣਨਾ ਚਾਹੁੰਦੇ ਸੀ , ਉਹਨਾਂ ਨੂੰ ਮੌਕੇ ਤੇ ਮੁਸਲਮਾਨ ਨਾ ਬਣਾਇਆ ਗਿਆ। ਜੇਹੜੇ ਤਿੰਨ ਸਾਲ ਪਹਿਲਾਂ ਮੁਸਲਮਾਨ ਬਣੇ ਸੀ, ਓਹੀ ਮੰਜ਼ੂਰ ਕੀਤੇ
8. ਰਫਿਊਜ਼ੀਆਂ ਦਾ ਲੀੜਾ ਲੱਤਾ ਤੇ ਖਾਣ ਪੀਣ ਦਾ ਚੱਜ ਏਧਰਲੇ ਲੋਕਾਂ ਤੋਂ ਕਿਤੇ ਚੰਗਾ ਸੀ।
9. ਰਫਿਊਜੀਆਂ ਲਈ ਇੱਕ ਸਾਲ ਰਾਖਵਾਂ ਕੋਟਾ ਰੱਖਿਆ ਗਿਆ ਸੀ।
ਖਾਸ ਨੋਟ- ਏਹ ਜਾਣਕਾਰੀ ਕਿਸੇ ਕਿਤਾਬ 'ਚੋਂ ਨਹੀਂ ਲਈ , ਮਾਲਵੇ ਦੇ ਪਿੰਡਾਂ 'ਚ ਜਾਕੇ ਬਜ਼ੁਰਗਾਂ ਤੋਂ ਜ਼ੁਬਾਨੀ ਕੱਠੀ ਕੀਤੀ ਆ। ਬਾਕੀ ਹਾਡੀ ਕੁੜੀ ਗੁਰਪ੍ਰੀਤ ਕੁਰ ਏਸ ਟੌਪਿਕ ਤੇ ਪੀ.ਐੱਚ.ਡੀ ਕਰ ਰਹੀ ਆ॥ ਹੋਰ ਗੱਲਾਂ ਦੱਸਦੇ ਰਹਾਂਗੇ....ਘੁੱਦਾ

Monday 11 May 2015

ਪਤੇ ਦੀਆਂ ਗੱਲਾਂ

..ਪਤੇ ਦੀਆਂ ਗੱਲਾਂ..
1. ਮੱਸੇ ਰੰਘੜ ਦਾ ਕਤਲ ਕਰਕੇ ਸੁੱਖਾ ਤੇ ਮਹਿਤਾਬ ਸਿੰਘ ਰਾਜਸਥਾਨ ਵੱਲ ਲੰਘਗੇ ਸੀ। ਹਰਭਗਤ ਨਿਰੰਜਣੀਏ ਦੀ ਚੁਗਲੀ ਨਾਲ ਮੁਗਲ ਸਿਪਾਹੀ ਮਹਿਤਾਬ ਸਿੰਘ ਦੇ ਘਰੇ ਜਾਵੜੇ। ਮਹਿਤਾਬ ਸਿੰਘ ਦਾ ਬੱਚਾ ਹੱਥ ਲੱਗਾ ਤੇ ਆਵਦੇ ਵੱਲੋਂ ਬੱਚੇ ਨੂੰ ਮਾਰਕੇ ਸਿੱਟਗੇ । ਪਰ ਓਹ ਨਿਆਣਾ ਰੱਬ ਤਵੱਕਲੀਂ ਬਚ ਗਿਆ ਤੇ ਵੱਡਾ ਹੋਕੇ ਇਤਿਹਾਸਕਾਰ ਰਤਨ ਸਿੰਘ ਭੰਗੂ ਬਣਿਆ।
2. ਦੇਸ਼ ਇੰਗਲੈਂਡ ਦਾ ਆਵਦਾ ਕੋਈ ਖਾਸ ਇਤਿਹਾਸ ਨਹੀਂ ਪਰ ਇੰਗਲੈਂਡ ਨੇ ਸਾਰੀ ਦੁਨੀਆਂ ਦੇ ਦੇਸ਼ਾਂ ਦੇ ਇਤਿਹਾਸ  ਨੂੰ ਪ੍ਰਭਾਵਿਤ ਕੀਤਾ ।
3. ਪੰਜਾਬ 'ਚ ਇੱਕੋ ਨਾਂ ਦੇ ਦੋ ਪਿੰਡ ਨਾਲ ਨਾਲ ਹੁੰਦੇ ਨੇ ਕਈ ਥਾਈਂ। ਜਿਮੇਂ 'ਰਾਇਕੇ ਕਲਾਂ ਤੇ ਰਾਇਕੇ ਖੁਰਦ'।
ਹਮੇਸ਼ਾ ਕਲਾਂ ਵੱਡਾ ਹੁੰਦਾ ਤੇ ਖੁਰਦ ਨਿੱਕਾ।.....(ਰਪੀਟ)
4. ਦੁੱਲਾ ਭੱਟੀ ਤੇ ਸ਼ਾਹ ਹੁਸੈਨ ਗੁਰੂ ਅਰਜਨ ਸਾਬ੍ਹ ਹੋਣਾਂ ਦੇ ਸਮਕਾਲੀ ਸੀ। ਸ਼ਾਹ ਹੁਸੈਨ ਦੀ ਲਿਖਤ ਗੁਰੂ ਸਾਬ੍ਹ ਨੇ ਗੁਰੂ ਗ੍ਰੰਥ ਸਾਬ੍ਹ 'ਚ ਦਰਜ ਨਹੀਂ ਕੀਤੀ ਤਾਂ ਕਰਕੇ ਸ਼ਾਹ ਹੁਸੈਨ ਕਿਤੇ ਨਾ ਕਿਤੇ ਗੁਰੂ ਸਾਬ੍ਹ ਦਾ ਵਿਰੋਧੀ ਸੀ।
5. 'ਸਦਰ' ਅਰਬੀ ਭਾਸ਼ਾ ਦਾ ਸ਼ਬਦ ਆ। ਸਦਰ ਦਾ ਮਤਲਬ ਹੁੰਦਾ ਦਿਲ ਜਾਂ ਛਾਤੀ । ਸ਼ਾਇਦ ਤਾਂਹੀ ਹਰਿੱਕ ਸ਼ਹਿਰ ਦੇ ਵਿੱਚ ਵਿਚਾਲੇ ਬਣੇ ਥਾਣੇ ਮੂਹਰੇ 'ਸਦਰ ਥਾਣਾ' ਲਿਖਿਆ ਹੁੰਦਾ।
6. ਅਗਸਤ  6 , 1945 ਨੂੰ ਹੀਰੋਸ਼ੀਮਾ ਤੇ ਪ੍ਰਮਾਣੂ ਬੰਬ ਸਿੱਟਣ ਮਗਰੋਂ ਅਗਲੇ ਤਿੰਨ ਦਿਨ ਜਪਾਨ ਤੇ ਦਸ ਲੱਖ ਪਰਚੇ ਸਿੱਟੇ ਗਏ ਸੀ। ਪਰਚਿਆਂ ਤੇ ਐਟਮ ਬੰਬ ਦੇ ਮਾੜੇ ਪ੍ਰਭਾਵਾਂ ਬਾਰੇ ਜਾਣਕਾਰੀ ਸੀ। ਜਦੋਂ ਜਪਾਨ ਨੇ ਅੜਵਾਈ ਨਾ ਛੱਡੀ ਫੇਰ 9 ਅਗਸਤ ਨੂੰ ਨਾਗਾਸਾਕੀ ਨਿਸ਼ਾਨਾ ਬਣਾਇਆ ਸੀ।......ਘੁੱਦਾ

ਮਾਪੇ

ਫਿਕਰ, ਸੰਸੇ, ਜੁੰਮੇਆਰੀ, ਗਾਹਲਾਂ, ਵਹਿਮ ਭਰਮ ਤੇ ਰੀਤ ਰਿਵਾਜਾਂ ਦਾ ਸੁਮੇਲ ਹੁੰਦੀਆਂ ਨੇ ਬੇਬੇ ਅਰਗੀਆਂ। 
ਇੱਕ ਮਿੰਟ 'ਚ ਬੇਦਾਵਾ ਦੇ ਦੇਦੀਆਂ ,"ਜਾ ਭੱਜਜਾ ਤੂੰ ਨੀਂ ਮੇਰਾ ਪੁੱਤ ਪੱਤ"। ਫੇਰ ਦਹਾਂ ਕ ਮਿੰਟਾਂ ਬਾਅਦ ਬੋਲ ਮਾਰਕੇ ਆਖਣਗੀਆਂ ,"ਵੇ ਚਾਹ ਡੱਫਲਾ ਆਕੇ ਨਹੀਂ ਠਰਜੂ ਤੇਰੀ ਕੁਸ ਲਾਦ੍ਹੜੀ"। 
ਢੰਗ ਤਰੀਕੇ ਵੇਖੋ ।ਧੁੱਪੇ ਮੰਜੇ ਮੂਧੇ ਮਾਰਕੇ, ਪਾਵਿਆਂ ਤੇ ਸੁੱਬੀਆਂ ਬੰਨ੍ਹਕੇ ਜਾਲ ਜਾ ਬੁਣਦੀਆਂ। ਨਾਏ ਸੁੱਕ ਭਰੂਰਾ ਜਾ ਕਰਕੇ ਮੈਦੇ ਦੇ ਰੁੱਗ ਲਾਈ ਜਾਣਗੀਆਂ ਨਾਏ ਸੇਵੀਆਂ ਤੋੜਕੇ ਜਾਲ ਤੇ ਸੁੱਕਣੇ ਪਾ ਦੇਦੀਆਂ। ਨਵਾਂ ਤੰਦੂਰ ਫਿੱਟ ਕਰਨ ਵੇਲੇ 
ਤੰਦੂਰ ਦਾਲੇ ਬਰੇਤੀ ਤੇ ਠੀਕਰੀਆਂ ਪਾਉਦੀਆੰ। ਅਖੇ ਏਹਦੇ ਨਾਲ ਤਾਅ ਵੱਧ ਬਣਦਾ। ਤੰਦੂਰੇ ਰੋਟੀ ਲਾਉਣ ਵੇਲੇ ਮਰੋੜੇ ਨਾਲ ਆਖਦੀਆਂ,"ਥੋਡੀਆਂ ਰੰਨਾਂ ਨੂੰ ਤਾਂ ਆਹ ਵੀ ਚੱਜ ਨੀਂ ਆਉਣਾ, ਪੱਟਤੇ ਮਮੈਲਾਂ ਨੇ।"
ਜਿੱਦੇਂ ਬੇਬੇ ਹੋਣਾਂ ਦਾ ਸਰੀਰ ਢਿੱਲਾ ਹੋਵੇ ਓਦੇਂ ਕੋਲ ਬਹਾਕੇ   ਸੰਸੇ ਨਾਲ ਆਖੂ,"ਵੇ ਮੇਰੇ ਬੈਠੀ ਬੈਠੀ ਤੋਂ ਵਿਆਹ ਕਰਾਲਾ, ਨਹੀਂ ਕੰਧਾਂ 'ਚ ਵੱਜਦਾ ਫਿਰੇਗਾਂ"। 
ਠੀਕ ਏਸਰਾਂ ਈ ਦੂਜੇ ਪਾਸੇ ਸਤਿਕਾਰਯੋਗ ਬਾਪੂ ਹੋਣੀੰ ਹੁੰਦੇ ਨੇ। ਜਵਾਕਾਂ ਨੂੰ ਦਬਕਾ ਕੇ ਰੱਖਦੇ ਨੇ ਪਰ ਪਿਆਰ ਬਥੇਰਾ ਹੁੰਦਾ। ਕਈ ਜਵਾਕ ਵੇਖੇ ਆ, ਦਾਹੜੀ ਹਜੇ ਆਈ ਨੀਂ ਹੁੰਦੀ ਤੇ ਫੁਕਰਪੁਣਾ ਦਿਖਾਉਣ ਖਾਤਰ ਆਖਣਗੇ,"ਸਾਡਾ ਬੁੜ੍ਹਾ ਤਾਂ ਐਂ ਕਰਦਾ ਜਰ"। ਪਿਓ ਨੂੰ ਬੁੜ੍ਹਾ ਆਖਕੇ ਖੌਣੀ ਕਿਹੜੀ ਕਲਗੀੰ ਲੱਗ ਜਾਂਦੀ ਆ ਏਹਨਾਂ ਦੇ। ਸਤਿਕਾਰ ਕਰਨਾ ਲਾਜ਼ਮੀ ਆ, ਹੱਥਾਂ 'ਚ ਫੜ੍ਹੇ ਸਿਓਆਂ ਆਲੇ ਫੋਨ ਵੀ ਬਜ਼ੁਰਗਾਂ ਦੀ ਕਮਾਈ ਦਾ ਈ ਸਿੱਟਾ ।ਸਰਬੰਸਦਾਨੀ ਚੜ੍ਹਦੀਆਂ ਕਲਾਂ 'ਚ ਰੱਖੇ ਮਾਪਿਆਂ ਨੂੰ......ਘੁੱਦਾ

Monday 4 May 2015

ਸਰਬੱਤ ਦਾ ਭਲਾ

ਪਿੰਡ 'ਚੋਂ ਕਿਸੇ ਦਾ ਧੀ ਪੁੱਤ ਚੰਗਾ ਕਮਾਊ, ਸਲੱਗ ਨਿਕਲੇ ਤਾਂ ਸਾਰਾ ਪਿੰਡ ਵਡਿਆਈ ਕਰਦਾ। ਠੀਕ ਏਸੇ ਤਰ੍ਹਾਂ ਜੇ ਆਟੇ 'ਚ ਨੂਨ ਬਰੋਬਰ ਘੱਟਗਿਣਤੀਏ ਸਿੱਖ, ਕਿਤੇ ਲੋੜਵੰਦਾਂ ਦੀ ਮਦਦ ਕਰਦੇ ਨੇ ਤਾਂ ਸਾਰੀ ਦੁਨੀਆਂ ਸ਼ਾਬਾਸ਼ੇ ਦਿੰਦੀ ਆ।
ਸਾਰਾਗੜ੍ਹੀ, ਜੈਤੋ ਮੋਰਚਾ, ਘੱਲੂਘਾਰੇ ਤੇ ਸਤਿਕਾਰਯੋਗ ਬਾਬੇ ਪੂਰਨ ਤੇ ਭਾਈ ਘਨ੍ਹਈਏ ਹੋਣਾਂ ਦੀਆਂ ਗੱਲਾਂ ਸਾਡੀ ਕੌਮ ਦੀ ਬਹਾਦਰੀ, ਸੇਵਾ, ਸਿਦਕ ਨੂੰ ਦੱਸਣ ਲਈ ਕਾਫੀ ਨੇ। 
ਫੋਟਮਾਂ, ਸਟੇਟਸ ਜ਼ਰੂਰ ਪਾਓ ਪਰ ਕਿਸੇ ਨੂੰ ਚਿੜ੍ਹਾਕੇ ਏਹ ਨਾ ਲਿਖੋ ,"ਬੀ ਦੇਖੋ ਫਲਾਣਿਓਂ , ਹਾਡੇ ਸਿੱਖ ਐਂ ਸੇਵਾ ਕਰਦੇ ਆ"। ਸਿਆਣਿਆਂ ਦੀ ਆਖਤ ਆ ਜੇ ਕਿਸੇ ਦੀ ਮੌਤ ਤੇ ਰੋਣ ਨਾ ਆਵੇ ਤਾਂ ਘੱਟੋ ਘੱਟ ਰੋਣ ਅਰਗਾ ਮੂੰਹ ਜ਼ਰੂਰ ਬਣਾ ਲੈਣਾ ਚਾਹੀਦਾ। ਨੇਪਾਲ 'ਚ ਹੋਈਆਂ ਣਹੱਕ ਮੌਤਾਂ ਤੇ ਧਰਮ ਨੂੰ ਲੈਕੇ ਕਿਸੇ ਨਾ ਜਿਰਿਆ ਕਰਨੀ ਕੋਈ ਸੋਭਾ ਆਲਾ ਕੰਮ ਨਹੀਂ।
ਸਿੱਖ ਵਿਰੋਧੀ ਗਜ਼ਲਾਂ, ਨਜ਼ਮਾਂ ਲਿਖਣ  ਆਲੇ ਆਪੇ ਨਿਗਾਹ ਮਾਰ ਲੈਣਗੇ ਕੇ ਸਿੱਖ ਸਿਰਫ ਅਰਦਾਸ ਮਗਰੋਂ ਨਿਓਂ ਕੇ ਭੁੰਜੇ ਹੱਥ ਲਾਉਣ ਲੱਗੇ ਈ ਨਹੀਂ ਕਹਿੰਦੇ ਬੀ," ਤੇਰੇ ਭਾਣੇ ਸਰਬੱਤ ਦਾ ਭਲਾ", ਸਗਮਾਂ ਪਰੈਕਟੀਕਲੀ ਵੀ ਸਰਬੱਤ ਦਾ ਭਲਾ ਕਰਦੇ ਨੇ। 
ਨੇਪਾਲ 'ਚ ਮਦਦ ਕਰਦੇ ਕੁੱਲ ਜਾਤਾਂ, ਧਰਮਾਂ, ਦੇਸ਼ਾਂ ਦੇ ਲੋਕ ਸ਼ਾਬਾਸ਼ੇ ਦੇ ਹੱਕਦਾਰ ਨੇ। ਸਰਬੰਸਦਾਨੀ ਸਭ ਨੂੰ ਚੜ੍ਹਦੀਆਂ ਕਲਾ 'ਚ ਰੱਖੇ।......ਘੁੱਦਾ

ਜਾਅਲੀ ਇਨਕਲਾਬ

ਦੋ ਢਾਈ ਸਾਲ ਪਹਿਲਾਂ ਪੁਲਸ ਨੇ ਤਰਨਤਾਰਨ 'ਚ ਕੁੜੀ ਕੁੱਟੀ ਸੀ, ਨਾਏ ਵੀਡਿਓ ਬਣੀ। ਚਾਰ ਕ ਦਿਨ ਫੇਸਬੁੱਕ ਤੇ ਗਾਹਲਾਂ ਕੱਢਕੇ ਮੁਲਖ ਟਿਕ ਗਿਆ। ਕੇਰਾਂ ਫੇਰ ਦਿੱਲੀ ਦਾਮਨੀ ਵੇਲੇ ਗੋਲ ਘਤੇਰੇ ਆਲੀਆਂ ਫੋਟਮਾਂ ਲਾਈਆਂ ਫੇਰ ਬਦਲਤੀਆਂ। ਫੇਰ ਜੀਹਨੇ ਧਨੌਲੇ ਆਲੇ ਮੁੰਡੇ ਨੇ ਜੁੱਤੀ ਮਾਰੀ ਸੀ ਚਲਾਮੀਂ, ਉਹਦੀ ਘਰਾਂਆਲੀ ਦਾ ਬਿਆਨ ਆਇਆ ਸੀ ਕਹਿੰਦੀ ," ਬੱਸਾਂ ਤੇ ਜਾਣ ਜੋਗਰਾ ਭਾੜਾ ਵੀ ਹੈਨੀ, ਕੇਸ ਕਿੱਥੋਂ ਲੜਾਂ"। ਹੁਣ ਕੰਜਰਦਿਆਂ ਨੇ ਬਚਾਰੀ ਕੁੜੀ ਮਾਰਤੀ ਲਤੜਕੇ , ਮੁਲਖ ਦਾ ਖੂਨ ਫੇਰ ਬਾਅਲਾ ਮਾਰ ਰਿਹਾ ਫੇਸਬੁੱਕ ਤੇ। 
ਜਦੋਂ ਸਟੇਜ ਤੇ ਨੱਚਣ ਆਲੀ ਕੁੜੀ ਦੇ ਗਲਮੇਂ 'ਚ ਦਹਾਂ ਦਹਾਂ ਦੇ ਨੋਟ ਤੁੰਨਦੇ ਹੁੰਨੇ ਆ, ਓਦੋਂ ਨੀਂ ਖੂਨ ਉਬਾਲਾ ਮਾਰਦਾ। "ਨਿੱਕੀਏ ਤੈਨੂੰ ਕੱਢ ਕੇ ਲੈਜੂੰ,ਤੇਰਾ ਪਿਓ ਲਾਦੇਨ ਤਾਂ ਨਹੀਂ", ਏਹੇ ਜੇ ਗੀਤਾਂ ਦੇ ਪੰਜ ਪੰਜ ਲੱਖ ਵਿਊ ਹੁੰਦੇ ਨੇ।
ਮੁਲਖ ਸਟੇਟਸ ਪਾ ਰਿਹਾ ਬੀ ਲੋਕਾਂ ਦੀ ਜਿੱਤ ਹੋਗੀ, ਓਰਬਿਟ ਬੱਸਾਂ ਰੁਕਗੀਆਂ। ਏਹਵੀ ਸਿਆਸਤ ਆ ਅਗਲਿਆਂ ਦੀ ਬੀ ਕੇਰਾਂ ਦਸ ਕ ਦਿਨ ਰੋਕਦੋ ਨਾਏ ਭੰਨ ਤੋੜ ਤੋਂ ਬਚੀਆਂ ਰਹਿਣ । ਜਦੋਂ ਲੋਕ ਟਿਕਗੇ ਫੇਰ ਖਿੱਚਦਾਗੇਂ। ਦੂਰੋਂ ਈ ਲੈਟਾਂ ਮਾਰ ਦੇਦੇਂ ਆ ਅਗਲੇ ਪਾਸ ਵੀ ਨੀਂ ਲੈਣ ਦੇਦੇਂ । 
ਸ਼ੋਸ਼ਲ ਮੀਡੀਏ ਨੇ ਬਥੇਰਾ ਜੋਰ ਲਾ ਲਿਆ। ਬਾਦਲ ਪਾਲਟੀ ਫੇਰ ਵੀ ਗੱਦੀ ਤੇ ਬੈਠੀ ਆ।  
2009 ਤੋਂ ਫੇਸਬੁੱਕ ਵੇਖ ਰਹੇਂ ਆਂ। ਫੇਸਬੁੱਕ ਮੁੱਦੇ ਚੱਕਦੀ ਆ ਹੱਲ ਨਹੀਂ ਕਰ ਸਕਦੀ। ਨਾਲੇ ਏਹੋ ਜੇ ਮੱਸੇ ਰੰਘੜਾਂ ਦੇ ਝੱਗੇ ਦਾ ਮੇਚ ਲੈਣ ਆਲੇ ਆਲੇ ਸੁੱਖੇ ਤੇ ਮਹਿਤਾਬ ਅਰਗੇ ਸਿੰਘ ਫੇਸਬੁੱਕਾਂ ਤੇ ਬੜ੍ਹਕਾਂ ਨਈਂ ਮਾਰਦੇ। ਤਾਰੀ.... ਜ਼ਜ਼ਬਾਤਾਂ ਨੂੰ ਕਾਬੂ ਰੱਖਿਆ ਕਰ...ਘੁੱਦਾ