ਵੱਡੇ ਹੁੰਨੇ ਆ ਅਸੀਂ

ਰਮਨ ਕੁਮਾਰ ਤੋਂ ਸੱਤ ਆਲੀਆਂ ਖਬਰਾਂ ਸੁਣ ਸੁਣ ਵੱਡੇ ਹੁੰਨੇ ਆ ਅਸੀਂ
ਇੱਕੋ ਚੈਨਲ ਹੁੰਦਾ ਸੀ ਓਦੋਂ,
ਕਿਸੇ ਕਿਸੇ ਕਰਮਾਂਆਲ਼ੇ ਦੇ ਚਲਦਾ ਸੀ ਡੀ,ਡੀ -੨
ਪੰਡਤਾਂ ਦੇ ਦੀਪੇ ਕੇ ਚੱਲਦਾ ਸੀ
ਉਹ ਵੀ ਸੈਕਲ ਦਾ ਜੰਗਾਲਿਆ ਜਾ ਚੱਕਾ ਲਾਕੇ
ਐਤਵਾਰ ਤੜਕੇ ਉੱਠਦਿਆਂ ਈ ਚਾਅ ਹੁੰਦਾ ਸੀ ਸ਼ਕਤੀਮਾਨ ਵੇਖਣ ਦਾ
ਨੌਂ ਵਜੇ ਬਾਬੇ ਹਨੂੰਮਾਨ ਹੁਣਾਂ ਦਾ ਨਾਟਕ ਵੇਂਹਦੇ
ਮਰਦਿਆਂ ਨੂੰ ਬਾਰ੍ਹਾਂ ਵੱਜਦੇ ਸੀ,
ਲੈਟ ਦਾ ਕੱਟ ਵੀ ਜਮ੍ਹਾਂ ਉਦੋਂ ਲੱਗਦਾ ਸੀ ਜਦੋਂ ਕਿਲਵਿਸ਼ ਸ਼ਕਤੀਮਾਨ ਨੂੰ ਬੰਨ੍ਹੀ ਬੈਠਾ ਹੁੰਦਾ ਸੀ
ਫਿਰ ਏਂ ਚੁੱਪ ਕਰ ਜਾਂਦੇ ਸੀ ਜਿਮੇਂ ਕੁੜੀ ਨੱਪ ਕੇ ਆਏ ਹੁੰਦੇ ਆ
ਨਾਲੇ ਗਾਲ੍ਹਾਂ ਕੱਢਦੇ,"ਮੇਰੇ ਸਾਲਿਆਂ ਨੇ ਸਵਾਦ ਈ ਗਾਲਤਾ"
ਆਥਣੇ ਗੁੱਲੀ ਡੰਡੇ ਦਾ ਬੰਕ ਮਾਰਦੇ
ਤੇ ਸੰਨੀ ਦਿਉਲ ਦੀ ਫਿਲਮ ਵੇਂਹਦੇ ਜਨਤਾ ਕੱਠੀ ਕਰਕੇ
ਆਹੋ ਇੰਡੀਅਨ
ਫਿਰ ਤਿੰਨ ਦਿਨ ਮੁਲਖ ਦੀਆਂ ਨਾਸਾਂ ਭੰਨੀ ਜਾਂਦੇ ਡਿਸ਼ੂੰ ਡਿਸ਼ੂੰ ਕਰਕੇ
ਅਗਲੇ ਦਿਨ ਰੋਂਦੇ ਪਿੱਟਦੇ ਸਕੂਲ਼ ਜਾਂਦੇ
ਸੋਮਵਾਰ ਦਾ ਜ਼ਹਿਰ ਅਰਗਾ ਲੱਗਦਾ ਸੀ
ਕਲਾਸ 'ਚ ਵੀ ਸ਼ਕਤੀਮਾਨ ਦੀਆਂ ਗੱਲਾਂ ਨਾਲੇ ਫਿਲਮ ਦੀਆਂ,
ਗੀਤਾ ਸੋਹਣੀ ਸੀ ਸ਼ਕਤੀਮਾਨ ਆਲ਼ੀ
ਪਰ ਓਦੋਂ ਕਦੇ ਖਿਆਲ ਜਾ ਨੀ ਕੀਤਾ
ਪਹਿਲਾ ਪੀਰਡ ਪੰਜਾਬੀ ਦਾ ਪਟਾਕ ਪਟਾਕ ਸੁਣਾਉਦੇ ਪ੍ਰਸ਼ਨ ਉੱਤਰ
ਅਗਲਾ ਮੈਥ ਆਲ਼ੇ ਮੈਂਡਮਾਂ ਦਾ ਆਹੋ ਮਮਤਾ ਮੈਡਮ ਦਾ
ਟੈਸਟ ਹੁੰਦਾ ਸੀ
ਕਾਪੀ ਦਾ ਜੜੁੱਤ ਪੇਜ ਪੱਟਕੇ ਟੈਸਟ ਦਿੰਦੇ
ਟੈਸਟ ਤੇ ਲਿਖਿਆ ਹੁੰਦਾ .....ਅੰਮ੍ਰਿਤ ਘੁੱਦਾ, ਰੋਲ ਨੰ..27,
ਬਾਕੀ ਕੋਰਾ .ਜਮ੍ਹਾਂ ਨਮਾਂ ਨੁੱਕ
ਕੁੜੀਆਂ ਸ਼ਿਆਹਰ ਸੀ, ਬਾਕੀ ਮੁਲ਼ਖ ਖੜ੍ਹਾ ਹਿੜ ਹਿੜ ਕਰੀ ਜਾਂਦਾ
ਸੇਠਾਂ ਦੇ ਮੁੰਡਾ ਹਨੀ ਪ੍ਰਿੰਸੀਪਲ ਸਰ ਨੂੰ ਬੁਲਾਉਣ ਜਾਂਦਾ,
ਤਾੜ ਤਾੜ ਡੰਡੇ ਚਿੱਤੜਾਂ ਤੇ,
ਬੈਠਣ ਉੱਠਣ ਦੀ ਵੀ ਤਕਲੀਫ
ਫਿਰ ਕੀ ਅੱਧੀ ਛੁੱਟੀ ਦੀ ਘੈਂਟੀ ਵੱਜਦੀ
ਢਾਹ ਲੈਂਦੇ ਸੀ ਬਾਣੀਏ ਦੇ ਹਨੀ ਨੂੰ
ਸੰਨੀ ਦਿਓਲ ਆਲ਼ੇ ਐਕਸ਼ਨ ਵਰਤੀਦੇ ਸੀ ਹਨੀ ਤੇ.......ਘੁੱਦਾ