ਸਿੱਖ ਇਤਿਹਾਸ ਤੇ ਸਾਡੇ ਸ਼ੱਕੀ ਸੁਭਾਅ

ਅਸੀਂ ਸਿਆਣੇ ਬਹੁਤ ਬਨਣ ਲੱਗ ਗੇ। ਲੋੜੋਂ ਵੱਧ। ਏਨੇ ਸਿਆਣੇ ਕਿ ਹਰੇਕ ਗੱਲ ਤੇ ਸ਼ੱਕ ਕਰਦੇ ਆਂ। ਕਿੰਤੂ ਪ੍ਰੰਤੂ ਕਰਕੇ ਖ਼ੁਦ ਨੂੰ ਵੱਡਾ ਸਾਬਤ ਕਰਦੇ ਆਂ। ਹੋਰ ਤਾਂ ਹੋਰ ਅਸੀਂ ਹੁਣ ਸਿੱਖ ਇਤਿਹਾਸ ਤੇ ਸ਼ੱਕ ਕਰਨਾ ਸਿੱਖਗੇ। ਬਾਬਾ ਦੀਪ ਸਿੰਘ, ਚਰਖੜੀਆਂ, ਤੱਤੀਆਂ ਤਵੀਆਂ, ਆਰੇ, ਨੀਂਹਾਂ। ਸਾਰੇ ਕਿਤੇ ਸ਼ੱਕ। 

ਅਸਲ ‘ਚ ਆਪਾਂ ਆਪ ਬਹੁਤ ਕੱਚੇ ਹੋਣ ਕਰਕੇ ਓਹਨ੍ਹਾਂ ਮਰਜੀਵੜਿਆਂ ਨੂੰ ਛੁਟਿਆਓਣ ਲੱਗਪੇ। ਵਿਗਿਆਨ ਹੋਣੀਂ ਬਹੁਤ ਪਿੱਛੇ ਨੇ ਤੇ ਸ਼ਹੀਦੀ ਦਾ ਓਹ ਲੈਵਲ ਮੈਂ ਤੂੰ ਸਮਝ ਨਹੀਂ ਸਕੇ। ਹਰਪਾਲ ਸਿੰਘ ਪੰਨੂੰ ਹੋਣਾਂ ਦੀ ਕਿਤਾਬ ‘ਸਵੇਰ ਤੋਂ ਸ਼ਾਮ’ ‘ਚ ਸਿਰਦਾਰ ਕਪੂਰ ਸਿੰਘ ਦੀ ਆਖੀ ਗੱਲ ਪੜ੍ਹੋ।

ਸਰਦਾਰ ਨੇ ਭਾਸ਼ਣ ਦਿੱਤਾ। ਕਿਸੇ ਨੇ ਸਵਾਲ ਪੁੱਛਿਆ-“ਜੀ ਤੰਬੂ ‘ਚ ਲਿਜਾਕੇ ਗੁਰੂ ਜੀ ਨੇ ਪੰਜ ਪਿਆਰਿਆਂ ਦੇ ਸੀਸ ਸਚਮੁੱਚ ਕੱਟੇ ਸੀ?”

ਦੱਸਿਆ- ਗੁਰੂ ਕਲਗ਼ੀਧਰ ਪਿਤਾ ਨੇ ਸਾਡੇ ਤੋਂ ਜੀਵਨ ਭਰ ਕੁਝ ਨਾ ਲੁਕਾਇਆ ਨਾ ਛੁਪਾਇਆ। ਇਸ ਮੌਕੇ ਪਰਦਾ ਤਾਣ ਕੇ ਇੱਕ ਅਗੰਮੀ ਕਾਰਜ ਕੀਤਾ। ਖਾਲਸੇ ਨੂੰ ਜਨਮ ਦੇਣ ਵੇਲੇ ਓਨ੍ਹਾਂ ਤੁਹਾਡੇ ਤੋਂ ਪਰਦਾ ਕੀਤਾ ਸੀ। ਤੁਹਾਨੂੰ ਕੀ ਹੱਕ ਹੈ ਪਰਦਾ ਹਟਾਓ। ਖ਼ਬਰਦਾਰ ਕਿਸੇ ਨੇ ਅੰਦਾਜ਼ੇ ਲਾ ਲਾ ਉੱਤਰ ਦੇਣ ਦੀ ਮੂਰਖਤਾ ਕੀਤੀ। ਕਈ ਸਾਲ ਦਸ਼ਮੇਸ਼ ਪਿਤਾ ਅਤੇ ਪੰਜ ਪਿਆਰੇ ਸਾਡੇ ਵਿਚਕਾਰ ਰਹੇ। ਓਹਨ੍ਹਾਂ ਨੇ ਕਦੇ ਏਸ ਮਹਾਨ ਘਟਨਾ ਬਾਰੇ ਗੱਲ ਨਹੀਂ ਕੀਤੀ। ਕਿਸੇ ਨੂੰ ਇਸ ਬਾਰੇ ਟਿੱਪਣੀ ਕਰਨ ਦਾ ਪਾਪ ਨਹੀਂ ਕਰਨਾ ਚਾਹੀਦਾ।