ਪੰਜਾਬ ਦੀ ੧ ਪਰਸੈਂਟ ਅਬਾਦੀ ਵੀ ਹੁਣ ਧਰਨਿਆਂ ‘ਚ ਨਹੀਂ ਜਾ ਰਹੀ। ਬਹੁਤਿਆਂ ਨੂੰ ਮੈਂ ਜਾਣਦਾਂ ਜਿਹੜੇ ਸਿਰਫ 25 ਸਤੰਬਰ ਆਲੇ ਕੱਠਾਂ ‘ਚ ਗਏ ਸੀ। ਪੰਜ ਕ ਦਿਨ ਪਹਿਲਾਂ ਅਸੀਂ ਲੁਧਿਆਣੇ ਗਏ । ਰਾਹ ‘ਚ ਕਿਸੇ ਧਰਨੇ ਤੇ ਦਸ ਜਣੇ ਬੈਠੇ ਕਿਤੇ ਪੰਦਰਾਂ।
ਬਠਿੰਡੇ ਰਿਲਾਇੰਸ ਮਾਲ ਮੂਹਰੇ ਧਰਨੇ ਤੇ ਰਾਤ ਨੂੰ ਇੱਕ ਜਣਾ ਹੁੰਦਾ ਤੇ ਦਿਨੇ ਦੋ ਜਾਂ ਚਾਰ ਜਣੇ ਜਾਂ ਜਮਾਂ ਖਾਲੀ ਹੁੰਦਾ। ਕੱਲੀਆਂ ਗੱਲਾਂ ਮਾਰ ਮਾਰ ਅਸੀਂ ਫੇਸਬੁੱਕ ਦੀ ਟਮਾਂਢੀ ਬਾਹਰ ਕੱਢੀ ਪਈ ਆ।
ਧਰਨੇ ਸੈਂਕੜੇ ਲੱਗੇ ਨੇ ਪਰ ਮੀਡੀਆ ਤੇ ਲੋਕਾਂ ਦਾ ਖ਼ਾਸ ਧਿਆਨ ਸ਼ੰਭੂ ਮੋਰਚੇ ਤੇ ਰਹਿੰਦਾ।
ਚੰਡੀਗੜ੍ਹ ਕਾਨਫਰੰਸ ਤੇ ਦੀਪ ਸਿੱਧੂ ਨੇ ਸਿੱਧੇ ਅਸਿੱਧੇ ਢੰਗ ਨਾਲ ਬੈਂਸ, ਸਿੱਧੂ, ਖਹਿਰਾ ਟੈਪ ਪਾਰਟੀ ਦੀ ਗੱਲ ਕੀਤੀ। ਇਹਦੇ ਨਾਲ ਲੋਕਾਂ ਦਾ ਅਸਹਿਮਤ ਹੋਣਾਂ ਬਣਦਾ। ਓਹੀ ਲੀਡਰ, ਓਹੀ ਸਟੇਜਾਂ, ਓਹੀ ਫੁੱਦੂ ਭੜਾਕਾ ਗੱਲਾਂ ਅੱਕਗੇ ਜਰ ਲੋਕ। ਹੋਰ ਰਾਹ ਦੇਖਣਾ ਪਊ।
ਜਿੱਦਣ ਅਸੀਂ ਸ਼ੰਂਭੂ ਸੀ। ਰਾਤ ਨੂੰ ਦੋ ਜਣੇ ਪੈੱਗ ਲੱਗੇ ਪੂਰੇ ਸੈੱਟ ਲੰਗਰ ‘ਚ ਕੜਛੀਆਂ ਕੌਲੀਆਂ ਚੱਕੀ ਫਿਰਣ। ਟੋਕਿਆ ਤਾਂ ਰੁੱਸਗੇ। ਐਨੇ ਕ ਤਾਂ ਅਸੀਂ ਗੰਭੀਰ ਆ।
ਪਰਸੋਂ ਖੱਚ ਜੇ ਪ੍ਰਬੰਧਕ ਨੇ ਨਾਅਰਾ ਲਾਓਣ ਆਲੇ ਨੂੰ ਫੜ੍ਹਕੇ ਪੱਟੀ ਮੇਸ ਕਰਤੀ।
ਘਰੋ ਘਰੀ ਬੈਠੇ ਲੋਕਾਂ ਨੇ ਦੀਪ ਸਿੱਧੂ ਨੂੰ ਸਰਟੀਫਿਕੇਟ ਦੇਤਾ,”ਏਹ ਏਜੰਸੀਆਂ ਦਾ ਬੰਦਾ”।
ਅਸਲ ‘ਚ ਮੂਹਰੇ ਲੱਗਾ ਬੰਦਾ ਜਿੰਨਾ ਚਿਰ ਮਰ ਨਹੀਂ ਜਾਂਦਾ ਅਸੀਂ ਸ਼ੱਕ ‘ਚ ਹੀ ਤੁਰੇ ਫਿਰਦੇ ਆ ਜਰ। ਅੰਬ ਸਾਹਬ ਮੋਰਚੇ ਨੇ ਇੱਕ ਵਾਰੀ ਇਹ ਗੱਲ ਤਾਂ ਉਭਾਰੀ ਸੀ ਕਿ ਸਾਡੇ ਸੈਂਕੜੇ ਭਰਾ ਜੇਲ੍ਹਾਂ ‘ਚ ਬੈਠੇ ਨੇ। ਘੱਟੋ ਘੱਟ ਇਹ ਪ੍ਰਾਪਤੀ ਤਾਂ ਸੀ। ਓਹਨੂੰ ਟਰੌਲ ਕੀਤਾ, ਮਰਨ ਤੱਕ ਕੀਤਾ।
ਓਹ ਮਰ ਗਿਆ ਫੇਰ ਆਪਾਂ ਕੀ ਕੀਤਾ? ਮੁੜਕੇ ਜੇਲ੍ਹ ਬੈਠੇ ਕਿਸੇ ਸਿੰਘ ਦਾ ਜ਼ਿਕਰ ਵੀ ਕੀਤਾ ਕਿਸੇ ਨੇ?
ਦੀਪ ਸਿੱਧੂ ਕਿਧਰੇ ਰੋਮ ‘ਚ ਨਹੀਂ ਬੈਠਾ। ਆਹ ਸ਼ੰਭੂ ਬੈਠਾ, ਜੇ ਗਿਲਾ ਸ਼ਿਕਵਾ ਲੱਗਦਾ ਜਾਕੇ ਗਲਾਮੇਂ ‘ਚ ਹੱਥ ਪਾਕੇ ਆਖੋ,” ਤੂੰ ਜੱਟਾ ਗਲਤ ਆ ਏਥੇ, ਐਂ ਨੀਂ ਐਂ ਕਰ”
ਜੇ ਕੋਈ ਮੂਹਰੇ ਲੱਗਾ ਤਾਂ ਕੁਸ ਕਰ ਲੈਣਦੋ, ਘਰੇ ਬੈਠੇ ਕਿਓਂ ਓਹਦੇ ਡੱਕੇ ਲਾਈ ਜਾਣੇ ਆ ਜਰ।
ਪੰਜਾਬ ਕੱਲਾ ਓਹਦਾ ਨਹੀਂ, ਆਪਣਾ ਵੀ ਆ। ਜੇ ਓਹ ਗਲਤ ਲੱਗਦਾ ਆਪ ਕੋਈ ਪ੍ਰੋਗਰਾਮ ਉਲੀਕੋ। ਗ੍ਰਾਊਂਡ ਲੈਵਲ ਤੇ ਕਰੋ ਕੁਛ, ਲਾਓ ਕਿਤੇ ਹੋਰ ਮੋਰਚਾ।
ਅਲੋਚਕ ਬਣੋ ਨਿੰਦਕ ਨਹੀਂ।
ਜੇ ਆਪਾਂ ਦੀਪ ਸਿੱਧੂ ਨੂੰ ਰੱਦ ਕਰਨਾ ਤਾਂ ਘੱਟੋ ਘੱਟ ਹੋਰ ਪ੍ਰੋਗਰਾਮ ਤਾਂ ਹੋਵੇ ਸਾਡੇ ਕੋਲ।
ਜੇ ਹੋਰ ਕਲਾਕਾਰਾਂ ਵੰਗੂ ਉੱਠਕੇ ਏਹ ਵੀ ਸ਼ੂਟਿੰਗ ‘ਚ ਰੁੱਝ ਗਿਆ ਫੇਰ ਕੀ ਕਰਲਾਂਗੇ? ਨਵੀਂ ਵਿਓਂਤਬੰਦੀ ਹੈ ਕੋਈ ਆਪਣੇ ਕੋਲ?
ਬਾਹਲੀ ਗੱਲ ਕੀ ਆ, ਕੋਈ ਹੁਣ ਅਖਬਾਰ ਨਹੀਂ ਪੜ੍ਹਦਾ। ਟੀਵੀ ਪੰਜਾਬ ਦੀ ਖ਼ਬਰ ਨਹੀਂ ਦਿੰਦਾ। ਕੇਂਦਰ ਰੇਲਾਂ, ਫੰਡ ਰੋਕੀ ਜਾਂਦਾ ਤੇ ਜੇ ਕੱਲ੍ਹ ਨੂੰ ਨੈੱਟ ਦੀ ਸੁੱਚ ਕੱਟਤੀ ਸਾਡੇ ਕੋਲ ਸੰਚਾਰ ਦਾ ਸਾਧਨ ਹੀ ਹੈਨੀ ਹੋਰ। ਸਾਰੇ ਖ਼ਬਰਾਂ ਦੇ ਚੈਨਲ ਨੈੱਟ ਤੇ ਚੱਲਦੇ ਨੇ। ਫੋਨ ਕੱਲੇ ਲੁੱਡੋ ਖੇਡਣ ਜੋਗੇ ਰਹਿ ਜਾਣਗੇ।
ਕਸ਼ਮੀਰ ਅੰਗੂ ਸੁੰਨੇ ਜੇ ਹੋਕੇ ਬਹਿਜਾਂਗੇ।
ਘੱਟੋ ਘੱਟ ਪੰਜ ਪਰਸੈਂਟ ਅਬਾਦੀ ਤਾਂ ਧਰਨਿਆਂ ਤੇ ਪਹੁੰਚੇ ਜੇ ਗੱਲ ਕਿਸੇ ਬੰਨੇ ਲਾਓਣੀ ਆ। ਨਹੀਂ ਮੋਦੀ ਦੀ ਦਾਹੜੀ ਅੰਗੂ ਏਹ ਤਾਂ ਕੰਮ ਵਧੀ ਜਾਣਾ।....ਘੁੱਦਾ
No comments:
Post a Comment