ਚਲੰਤ ਮੁੱਦੇ

ਸੀਰੀਆ ਵਿੱਢੇ ਸ਼ਰੀਕਾ
ਬਾਗੀ ਮਾਰੇ ਨਮਾਂ ਤਰੀਕਾ
ਸ਼ੈਦ ਹਮਲਾ ਕਰੇ ਅਮਰੀਕਾ
ਧਾਂਕ ਜਮਾਉਣੀ ਹੋਰਾਂ ਤੇ
ਜੰਗ ਤੀਜੇ ਦੀ ਤਿਆਰੀ ਪੂਰੇ ਜ਼ੋਰਾਂ ਤੇ

ਫੜ੍ਹਿਆ ਅੱਤਬਾਦੀ ਟੁੰਡਾ
ਬਰੌਨ ਦਾਹੜੀ ਸਿਰੇ ਦਾ ਗੁੰਡਾ
ਲੈ ਰਿਮਾਂਡ ਲਾਲਿਆ ਕੁੰਡਾ
ਬੜੇ ਪੜਦੇ ਫੋਲ ਰਿਹੈ
ਹੱਥੀਂ ਪੀਢੀਆਂ ਗੰਢਾਂ ਦੰਦਾਂ ਨਾਲ ਖੋਲ੍ਹ ਰਿਹੈ

ਚਿੱਟੀ ਦਾਹੜੀ ਧੌਹਲਾ ਝਾਟਾ
ਕੀ ਆਸਾਰਾਮ ਨੂੰ ਘਾਟਾ
ਨੂਨ ਡੁੱਲ੍ਹਾ ਭਿੱਜ ਗਿਆ ਆਟਾ
ਹੈ ਗੱਲ ਡੇਰੇਦਾਰਾਂ ਦੀ
ਸੁਰਖੀ ਬਣਿਆ ਬਾਬਾ ਬਲਾਤਕਾਰਾਂ ਦੀ

ਥੋਨੂੰ ਮਹਿੰਗਾਈ ਦੀ ਪਈਆ
ਮਸਾਂ ਬੋਚਿਆ ਡਿੱਗਾ ਰੁਪਈਆ
ਮਨਮੋਹਣਾ ਇੱਕ ਵਿਰੋਧੀ ਕਈ ਆ
ਔਖਾ ਸਾਂਭਣਾ ਰਾਜਾਂ ਨੂੰ
ਮੂਲ ਵੀ ਹੱਥੋਂ ਗਿਆ ਕਿਓ ਰੋਏਂ ਵਿਆਜ਼ਾ ਨੂੰ

ਨਾਲੇ ਪਾਣੀ ਭਾਖੜਾ ਚੜ੍ਹਿਆ
ਝੋਨਾਂ ਵਿੱਚ ਹੜ੍ਹਾਂ ਦੇ ਹੜ੍ਹਿਆ
ਪੱਲਾ ਨਾ ਸਰਕਾਰਾਂ ਫੜ੍ਹਿਆ
ਦੋਸ਼ ਕਿਸੇ ਨੂੰ ਦੇਣਾਂ ਨਹੀਂ
ਵਿੱਢ ਸੰਘਰਸ਼ ਜੱਟਾ ਹੁਣ ਫਾਹਾ ਲੈਣਾ ਨਹੀਂ.......ਘੁੱਦਾ