ਚਲੰਤ ਮੁੱਦੇ ਸਤੰਬਰ ਵੀਹ ਸੌ ਤੇਰਾਂ

P.M ਬਣਾਉਣਾ ਨਰਿੰਦਰ ਮੋਦੀ
ਰਾਜਪਾਲ ਨੇ ਚੱਕਿਆ ਗੋਦੀ
'ਕੱਲਾ ਅਡਵਾਨੀ ਇੱਕ ਵਿਰੋਧੀ
ਨਾ ਹੈ ਸ਼ਰਮ ਬਾਦਲਾਂ ਨੂੰ
"ਸਰਦਾਰ ਜੀ" ਆਖ ਬੁਲਾਉਣ ਕਾਤਲਾਂ ਨੂੰ

ਉਤਰਾਖੰਡ ਵਿੱਚ ਕੋਕੋ ਬੋਲੇ
ਸਾਰੇ ਰਾਹ ਦੁਬਾਰੇ ਖੋਲ੍ਹੇ
ਖੜਕੇ ਟੱਲ ਜੈਕਾਰੇ ਬੋਲੇ
ਨਿੱਤ ਢਲਦੀਆਂ ਸ਼ਾਮਾਂ ਨੂੰ
ਹੋਊ ਕਰੋੜਾਂ ਦੀ ਕਮਾਈ ਫੇਰ ਗੁਰਧਾਮਾਂ ਨੂੰ

ਛੋਟੇ ਕਿਸਾਨਾਂ ਤੋਂ ਹਥਿਆਕੇ
ਤੇ ਫਾਰਮ ਵੱਡੇ ਬਣਾਕੇ
ਕਾਰਪੋਰੇਟ ਘਰਾਣੇ ਰਜਾਕੇ
ਫਿਰ ਲਾਹੁਣਾ ਛਿੱਲਾਂ ਨੂੰ
ਤਾਂਹੀ ਪਾਸ ਕੀਤਾ ਭੌਂ ਪ੍ਰਾਪਤੀ ਬਿੱਲਾਂ ਨੂੰ

ਮੁਜ਼ੱਫਰਾਨਗਰ ਦੀਆਂ ਬਾਤਾਂ
ਲੱਗੇ ਕਰਫੂ ਔਖੀਆਂ ਰਾਤਾਂ
ਨਾ ਮੁੱਕਣ ਜਾਤਾਂ ਪਾਤਾਂ
ਸਿਆਸਤ ਸੇਕੇ ਰੋਟੀਆਂ ਨੂੰ
ਰੰਡੀਆਂ, ਵਿਧਵਾ ਬਣਾਗੇ ਵਹੁਟੀਆਂ ਨੂੰ

ਗੱਲ ਸੁਣੀਂ ਪੰਥਕ ਸਰਕਾਰੇ
ਹੈਲੀਕਬਾਟਰਾਂ ਵਿੱਚ ਨਜ਼ਾਰੇ
ਬੜੇ ਹਵਾਈ ਕਿਲ੍ਹੇ ਉਸਾਰੇ
ਬਣਾਉਣਾ ਸੀ ਕੈਲੇਫੋਰਨੀਆਂ
ਕਰਜ਼ੇ ਸਿਰਾਂ ਤੇ ਚੜ੍ਹਗੇ ਕਿੱਥੋਂ ਧੀਆਂ ਤੋਰਨੀਆਂ

ਖਬਰ ਦਿੱਲੀ ਬੰਨੀਂਓ ਆਈ
ਸੀ ਮੁਲਖ 'ਚ ਮੱਚੀ ਦੁਹਾਈ
ਤਾਂਹੀ ਕਰੜੀ ਸਜ਼ਾ ਸੁਣਾਈ
ਏਕਾ ਐਸਾ ਜੁੜਨਾ ਨਹੀਂ
ਚਾਰੇ ਫਾਹੇ ਲਾਕੇ ਵੀ ਕੁੜੀ ਨੇ ਮੁੜਨਾਂ ਨਹੀਂ.....ਘੁੱਦਾ