ਚਾਰ ਦਾ ਬੈਂਤ

ਐਰੇ ਗੈਰੇ ਤੇ ਯਕੀਨ ਨਾ ਕਰਨ ਛੇਤੀ
ਵਪਾਰੀ, ਵੇਸਵਾ, ਰਾਹੀ ,ਬਾਦਸ਼ਾਹ ਚਾਰੇ

ਧਰਮ, ਫਸਾਦ, ਜਨੂੰਨ ਤੇ ਈਰਖਾ ਵੀ
ਪੂਰੇ ਮੁਲਖ ਨੂੰ ਦੇਣ ਹਿਲਾ ਚਾਰੇ

ਪੂਰੀ ਉਮਰ ਗਰੀਬੀ ਵਿੱਚ ਕੱਢ ਲੈਂਦੇ
ਮਾਲੀ, ਧੋਬੀ, ਮੋਚੀ ਤੇ ਮੱਲਾਹ ਚਾਰੇ

ਚੌਧਰ, ਚੁਗਲੀ, ਸ਼ੱਕ ਤੇ ਵਿਤਕਰਾ ਜੀ
ਕਰ ਦੇਣ ਏਹ ਘਰਾਂ ਨੂੰ ਤਬਾਹ ਚਾਰੇ

ਫੱਕਰ, ਸੰਤ ਸਾਧੂ ਸਦਾ ਕੋਲ ਰੱਖਦੇ
ਚਿੱਪੀ, ਲੰਗੋਟ, ਮਾਲਾ ਤੇ ਸਵਾਹ ਚਾਰੇ

ਇੱਕ ਵਾਰ ਗਵਾਚੇ ਨਾ ਮਿਲਣ ਕਿਧਰੇ
ਇੱਜ਼ਤ, ਮਾਪੇ, ਸਮਾਂ ਤੇ ਭਰਾ ਚਾਰੇ

ਕਲਾਕਾਰ, ਆਸ਼ਕ, ਮਰਾਸੀ , ਸੂਰਮੇ ਜੀ
ਦੁਨੀਆਂ ਦੀ ਨਾ ਕਰਦੇ ਪਰਵਾਹ ਚਾਰੇ.......ਘੁੱਦਾ