ਪੁੱਤ ਸੁਣਾਦੇ ਖਬਰਾਂ ਵੇ

ਲੈ ਸੁਣੀਂ ਨਿੱਕਿਆ ਓਏ ਅਖਬਾਰਾਂ ਦੀਆਂ ਖਬਰਾਂ
ਓਤਰਾਖੰਡ ਮਰਿਆਂ ਨੂੰ ਨਸੀਬ ਹੋਈਆਂ ਨਾ ਕਬਰਾਂ
ਜੇਹੜਾ ਰੱਬ ਲੱਭਦੇ ਸੀ ਓਹ ਵੀ ਵਿੱਚੇ ਰੁੜ੍ਹ ਗਿਆ
ਕੱਢੇ ਹੈਲੀਕਵਾਟਰਾਂ ਨੇ ਅੰਨ ਪਾਣੀ ਵੀ ਥੁੜ੍ਹ ਗਿਆ
ਬੇਦੋਸ਼ੇ ਹਜ਼ਾਰਾਂ ਈ ਪਵਿੱਤਰ ਗੰਗਾ ਰੋੜ੍ਹ ਕੇ ਲੈਗੀ
ਪੁੱਤ ਸੁਣਾਦੇ ਖਬਰਾਂ ਵੇ ਬੇਬੇ ਮਾਰ ਚੌਂਕੜਾ ਬਹਿ ਗਈ

ਕਾਂਗਰਸ ਅਕਾਲੀ ਵੀ ਰਹੇ ਪੰਚੈਤੀ ਚੋਣਾਂ ਤੇ ਭਾਰੂ
ਆਟਾ ਦਾਲ ਆਲੇਆਂ ਨੇ ਐਂਰਕੀ ਫਰੀ ਵੰਡੀ ਸੀ ਦਾਰੂ
ਵਾਅਦੇ ਕਰੇ ਤਰੱਕੀ ਦੇ ਨਸ਼ੇ ਕੁੱਲ ਮੁਲਖ ਨੂੰ ਵੰਡੇ
ਬਾਕੀ ਸੋਫੀ ਵੋਟਰਾਂ ਦੇ ਘਰ ਘਰ ਜਾ ਫੜ੍ਹਾਏ ਠੰਡੇ
ਸਰਪੰਚੀ ਜਿੱਤਣ ਲਈ ਕਿੱਲਾ ਬੈਅ ਕਰਾਉਣੀ ਪੈਗੀ
ਪੁੱਤ ਸੁਣਾਦੇ ਖਬਰਾਂ ਵੇ ਬੇਬੇ ਮਾਰ ਚੌਂਕੜਾ ਬਹਿ ਗਈ

"ਮੈਂ ਕੱਟੜ ਹਿੰਦੂ ਆਂ" ਹੁੱਬਕੇ ਨਰਿੰਦਰ ਮੋਦੀ ਕਹਿੰਦਾ
ਗੋਧਰਾ ਕਾਂਡ ਆਲੇਆਂ ਨਾ ਸਾਨੂੰ ਕੋਈ ਫਰਕ ਨੀਂ ਪੈਂਦਾ
ਕੀ ਬਣਨਾ ਭਾਜਪਾ ਦਾ ਜੇ ਅਡਵਾਨੀ ਹੱਥੋਂ ਖੋ ਲਿਆ
ਰਲਕੇ ਤੋਕੜ ਮਹਿੰ ਅੰਗੂ ਨਿਆਣਾ ਪਾਕੇ ਚੋ ਲਿਆ
ਕਲੀਨ ਚਿੱਟਾਂ ਪਿੱਛੋਂ ਵੀ ਟੈਟਲਰ ਤੇ ਜਾਂਚ ਦਬਾਰੇ ਪੈਗੀ
ਪੁੱਤ ਸੁਣਾਦੇ ਖਬਰਾਂ ਵੇ ਬੇਬੇ ਮਾਰ ਚੌਂਕੜਾ ਬਹਿ ਗਈ

ਨਿੱਤ L.O.C ਤੇ ਪਾਕਿ ਵੀ ਨਿੱਤ ਈ ਗੋਲੀ ਚਲਾਵੇ
ਓਧਰ ਚੁੱਚੀ ਅੱਖਾ ਜਾ ਚੀਨ ਚੜ੍ਹਿਆ ਭਾਰਤ ਤੇ ਆਵੇ
ਪਰਾਂ ਦੱਖਣੀ ਭਾਰਤ 'ਚ ਪੈਂਦਾ ਤੇਲੰਗਾਨਾ ਦਾ ਰੌਲਾ
ਅੰਤਰਰਾਸ਼ਟਰ ਮੰਡੀ 'ਚ ਰੁਪਈਆ ਹੋਰ ਹੋਗਿਆ ਹੌਲ਼ਾ
ਚਿੱਤ ਅੱਕੇ ਕਿਸਾਨੀ ਤੋਂ ਜਵਾਨੀ ਜ਼ਹਾਜ਼ਾ ਜੋਗੀ ਰਹਿਗੀ
ਪੁੱਤ ਸੁਣਾਦੇ ਖਬਰਾਂ ਵੇ ਬੇਬੇ ਮਾਰ ਚੌਂਕੜਾ ਬਹਿ ਗਈ......ਘੁੱਦਾ