ਵੀਹ ਸੌ ਤੇਰਾਂ ਦੇ ਯੱਕੜ

ਗਾਂਧੀ ਬਰਸੀ ਮਨਾਈ ਪੂਰੇ ਇੰਡੀਆ ਕੰਟਰੀ ਨੇ
ਪਾ ਫੋਟੂ ਤੇ ਹਾਰ ਸਲੂਟ ਮਾਰਿਆ ਸੰਤਰੀ ਨੇ
ਠਾਣੇ, ਕਚੈਹਰੀ ਲੱਗੀ ਫੋਟੂ ਨਾਲੇ ਛਪਗੀ ਨੋਟਾਂ ਤੇ
ਬਾਪੂ ਮਹਾਤਮਾ ਕਹਿਕੇ ਪੜਦਾ ਪਾਤਾ ਖੋਟਾਂ ਤੇ
ਗੋਰੀਆਂ ਨਾ ਨਜ਼ੈਜ਼ ਸੰਬੰਧ ਨਾਲੇ ਭਰਲੀਆਂ ਸੰਦੂਕਾਂ ਸੀ
ਲਹੂ ਭਿੱਜੀ ਪੰਜਾਬ ਦੀ ਮਿੱਟੀ ਜਿੱਥੇ ਉੱਗੀਆਂ ਦੰਬੂਖਾਂ ਸੀ
ਬਾਹਲਾ ਇੰਡੀਆ ਇੰਡੀਆ ਜਾ ਕਰਦਾ
ਨਿੱਕਿਆ ਸਵਾਰ ਤੂੰ ਕੇਹੜੀਆਂ ਪੌਣਾਂ ਤੇ
ਖੜਕੜ ਕਲਾਂ ਆਲੇ ਈ ਧਰਦੇ ਜਾਕੇ ਗੋਡੇ ਧੌਣਾਂ ਤੇ.....ਘੁੱਦਾ
===========================================================================


ਆਪਾਂ ਤਾਂ ਖੈਰ ਬਾਹਲੀ ਵਾਟ ਗਏ ਨੀਂ ਕਦੇ। ਥੋਡੇ 'ਚੋਂ ਜੇ ਕਦੇ ਕੋਈ ਬੰਬੇ ਬੰਨੀਂ ਗਿਆ ਤਾਂ ਹਿੰਦੀ ਫਿਲਮਾਂ ਆਲ਼ੇਆਂ ਨੂੰ ਸਿਨਿਆਂ ਲਾਦਿਓ ਇੱਕ ਨਿੱਕਾ ਜਾ।
ਦੱਸਦੇਓ ਬੀ ਜਦੋਂ ਲੋਹੜੀ ਦਾ ਤਿਓਹਾਰ ਹੁੰਦਾ ਓਦੋਂ ਕਣਕਾਂ ਨਿੱਕੀਆਂ ਨਿੱਕੀਆ ਈ ਹੁੰਦੀਆਂ, ਲੌਅ ਜਾ ਫੁੱਟਦਾ ਹੁੰਦਾ, ਪਹਿਲੇ ਪਾਣੀ ਲੱਗਦੇ ਹੁੰਦੇ ਆ ਤੇ ਕੋਰਾ ਜਾ ਜੰਮਦਾ ਹੁੰਦਾ।
"ਸਨ ਔਫ ਸਰਦਾਰ" 'ਚ ਸੰਜੇ ਦੱਤ ਅਰਗੇ ਪੱਕੀ ਕਣਕ 'ਚ ਖੜ੍ਹੇ ਈ ਕਰੀ ਜਾਂਦੇ ਹੁੰਦੇ ਆ," ਆਜ ਲੋਹੜੀ ਮਨਾਈ ਜਾਏਗੀ"
ਭੁੱਕੜ ਦਿਆਂ ਡੱਕਿਆਂ ਨੂੰ ਅਈਂ ਨੀਂ ਪਤਾ ਲੱਗਦਾ ਬੀ ਕਣਕਾਂ ਤਾਂ ਅਪਰੈਲ 'ਚ ਪੱਕਦੀਆਂ ਹੁੰਦੀਆਂ...ਘੁੱਦਾ
==========================================================================


ਹਰਿੱਕ ਮਾਂ- ਪਿਓ ਨੂੰ ਆਵਦੇ ਧੀ-ਪੁੱਤ ਦਾ ਫਿਕਰ ਹੁੰਦਾ। ਕਿਤੇ ਬਾਹਰ ਗਿਆਂ ਨੂੰ ਵੇਲਾ ਕਵੇਲਾ ਹੋਜੇ ਘਰੋਂ ਮਾਤਾ ਅਰਗੀਆਂ ਦੇ ਕਈ ਫੋਨ ਆ ਜਾਂਦੇ ਆ ਬੀ ਕੀ ਗੱਲ ਹੋਗੀ? ਆਏ ਕਾਹਤੋਂ ਨੀਂ? ਖੈਰ ਆ?
ਕਿਸੇ ਦਾ ਲੜਾਈ ਝਗੜਾ ਹੋਵੇ ਘਰਦੇ ਏਹੀ ਕਹਿੰਦੇ ਨੇ, "ਤੁਸੀਂ ਕੀ ਲੈਣਾ ਪਰਧਾਨਗੀਆਂ ਕਰਕੇ , ਘਰੇ ਵੜਜੋ"
ਸਦਕੇ ਜਾਈਏ ਗੁਰੂ ਗੋਬਿੰਦ ਸਾਬ੍ਹ ਦੇ,,,,ਲੜਾਈ ਕਸ਼ਮੀਰੀ ਪੰਡਤਾਂ ਦੀ ਤੇ ਮੁਸਲਮਾਨਾਂ ਦੀ ਪਰ ਸਿਰ ਆਵਦੇ ਲੈਲੀ।
ਬਾਪੂ ਨੂੰ ਤੋਰਿਆ ਹੌਂਸਲਾ ਕਰਕੇ। ਖੜਕਦੀਆਂ 'ਚ ਦੋਵੇਂ ਬੱਡੇ ਪੁੱਤ ਤੋਰਤੇ।
ਸਰਹੰਦ ਬੰਨੀਂਓ ਖਬਰ ਆਗੀ ਛੋਟੇ ਨਿੱਕੇ ਪੁੱਤ ਵੀ ਸ਼ਹੀਦੀਆਂ ਪਾਗੇ। ਜੇਹੜੀ ਉਮਰ 'ਚ ਜਵਾਕ ਟੌਫੀ ਨਾਲ ਬਿਰ ਜਾਂਦਾ ਉਹ ਉਮਰ 'ਚ ਛੋਟੇ ਪੁੱਤ ਸ਼ਹੀਦ ਹੋਗੇ ਮਾਤਾ ਵੀ ਚੱਲ ਵਸੇ।
ਭਾਈ ਦਇਆ ਸਿੰਘ ਅਰਗਿਆਂ ਦੀ ਅੱਖਾਂ ਹਿੰਝਾਂ ਨਾਲ ਭਰਗੀਆਂ ਜਦੋਂ ਗੁਰੂ ਸਾਬ੍ਹ ਨੇ ਫੇਰ ਬੜ੍ਹਕ ਨਾ ਆਖਿਆ
"ਚਾਰ ਮੂਏ ਤੋਂ ਕਿਆ ਹੂਆ ਜੀਵਤ ਕਈ ਹਜ਼ਾਰ"
ਦੁਰ ਫਿਟੇ ਮੂੰਹ ਸਾਡੇ ਜੇ ਅਸੀਂ ਫੇਰ ਫਿਰ ਵੀ ਮੜ੍ਹੀਆਂ ਮੂਰਤੀਆਂ ਤੇ ਜਾ ਜਾ ਮੱਥੇ ਟੇਕਣੇ ਆ।
ਪੱਗ ਬੰਨ੍ਹਕੇ ਸ਼ੀਸ਼ੇ ਮੂਹਰੇ ਤਣ ਜਿਆ ਕਰੋ ਹਿੱਕ ਕੱਢਕੇ, ਕਰੋੜਾਂ 'ਚ ਵੱਖਰੀ ਪਛਾਣ ਗੁਰੂ ਸਾਬ੍ਹ ਕਰਕੇ ਈ ਮਿਲੀ ਆ। ਨਹੀਂ ਮੋਨੇ ਤੇ ਕਲੀਨਸ਼ੇਬਾਂ ਆਲੇ ਤਾਂ ਹਜ਼ਾਰਾਂ ਇੱਕ ਦੂਜੇ 'ਚ ਵੱਜਦੇ ਫਿਰਦੇ ਨੇ।
ਮੁੱਕਦੀ ਗੱਲ ...ਸਾਹਿਬੇ ਕਮਾਲ ਗੁਰੂ ਗੋਬਿੰਦ ਸਿੰਘ ਸਾਹਬ ਦੇ ਗੁਰਪੁਰਬ ਦੀਆਂ ਸਭ ਨੂੰ ਮੁਬਾਰਕਾਂ....ਘੁੱਦਾ
===========================================================================
 ਪੁਰਾਣੇ ਬਜੁਰਗਾਂ ਨੇ ਮੇਲਿਆਂ ਦੀ ਕਾਢ ਕੱਢੀ ਬੀ ਚਲ ਐਨੇ ਪੱਜ ਨਾ ਲੋਕ 'ਕੱਠੇ ਹੋਇਆ ਕਰਨਗੇ। ਇੱਕ ਦੂਜੇ ਤੋਂ ਕੁਸ਼ ਨਮਾਂ ਸਿੱਖਣਗੇ।
ਅਨੰਦਪੁਰ ਸਾਹਬ ਦਾ ਹੋਲਾ ਮਹੱਲਾ, ਅੰਮਰਤਸਰ ਦੀ ਦੀਵਾਲੀ, ਦਮਦਮਾ ਸਾਹਬ ਦੀ ਵਿਸਾਖੀ, ਮੁਕਤਸਰ ਸਾਬ੍ਹ ਦੀ ਮਾਘੀ ਤੇ ਸਰਹੰਦ ਸ਼ਹੀਦੀ ਜੋੜ ਮੇਲਾ। ਇਓਂ ਵਿਓਂਤਬੰਦੀ ਨਾਲ ਮੇਲੇ ਬਣਾਏ ਗਏ ।
ਪਰ ਭੈਣਦਣੀ ਨਿਹਾਇਤੀ ਘਟੀਆ ਸਿਆਸਤ ਨੇ ਏਹਨਾਂ ਮੇਲਿਆਂ ਦਾ ਨੰਦੂ ਕੱਢਤਾ। ਜਿੱਥੇ ਕਿਤੇ ਵੀ ਮੇਲਾ ਹੁੰਦਾ ਲੀਡਰ ਜ਼ਰੂਰ ਉੱਪੜਦੇ ਨੇ , ਕਾਨਫਰੰਸਾਂ ਕਰਨ। ਕੋਈ ਸ਼ਰਧਾ ਨੀਂ , ਕੋਈ ਚੱਜਦੀ ਗੱਲ ਨੀਂ। ਬਸ ਇੱਕ ਦੂਜੇ ਦੀ ਧੀ ਭੈਣ ਇੱਕ ਕਰਨੀ ਹੁੰਦੀ ਆ ਏਹਨਾਂ ਨੇ। ਜਾਂ ਆਪੇ ਈ ਆਵਦੀਆ ਸਿਫਤਾਂ ਕਰਨਗੇ, "ਆਪੇ ਮੈਂ ਰੱਜੀ ਪੁੱਜੀ ਆਪੇ ਮੇਰੇ ਬੱਚੇ ਜੀਣ"
ਐਰਕੀਂ ਮੁਕਤਸਰ ਸਾਬ ਗਏ ਸੀ ਮਾਘੀ ਮੇਲੇ ਤੇ। ਦੋਦੇ ਆਲੀ ਸਾਈਡ ਕਾਨਫਰੰਸਾਂ ਖਾਤਰ ਕਾਂਗਰਸੀਆਂ, 'ਕਾਲੀਆਂ ਤੇ ਪੀ ਪੀ ਪੀਆਂ ਦੇ ਪੰਡਾਲ ਲਾਏ ਵਏ ਸੀ। ਸਾਰੇ ਪੰਜਾਬ ਦੀ ਪੁਲਸ ਉੱਪੜੀ ਸੀ ।
ਆਮ ਜੰਤਾ ਨੂੰ ਠਿੱਠ ਕਰਿਆ ਜਾਂਦਾ ਹੁਣ ਏਹਨਾਂ ਮੇਲਿਆਂ ਤੇ। ਸਭ ਤੋਂ ਵੱਡੀ ਗੱਲ ਲੋਕ ਮੇਲੇ ਸਰਕਾਰਾਂ ਨੇ ਠੇਕੇ ਤੇ ਚੜ੍ਹਾਏ ਵਏ ਨੇ। ਮੇਲੇ 'ਚ ਐਂਟਰੀ ਦੀ ਫੀਸ ਲੱਗਦੀ ਆ ਹਰਿੱਕ ਬੰਦੇ ਦੀ।
ਗੱਲ ਨੋਟ ਕਰਲੋ ਪਰਧਾਨ ...ਕੋਈ ਕਿੰਨੇ ਮਰਜ਼ੀ ਏਹਨਾਂ ਦੇ ਔਹੋ ਪਲੂਸੀ ਚੱਲੋ, ਏਹਨਾਂ ਨੇ ਆਵਦਾ ਈ ਸਮਾਰਿਆ ਤੇ ਆਵਦਾ ਈ ਸਮਾਰਣਗੇ। ਦੱਸਦਿਓ ਜਿੱਦੇਂ ਘਰੇ ਆਕੇ ਕੁੰਡੇ ਆਲ਼ਾ ਕੱਪ ਫੜ੍ਹਾਗੇ....ਲਗਾੜੀ ਸਿਆਸਤ..ਘੁੱਦਾ
===========================================================================


ਮਾਘੀ+ ਲੋਹੜੀ + ਵਿਸਾਖੀ+ ਦੀਵਾਲੀਆਂ+
ਮੇਲੇ+ ਮਿੱਥਾਂ+ ਤਿੱਥ ਤਿਓਹਾਰ+
ਸ਼ਗਨ ਵਿਹਾਰ+ ਵਹਿਮ ਭਰਮ+
ਚਿੱਟੀਆਂ ਦਾਹੜੀਆਂ+ ਉਮਰਾਂ ਦੇ ਤਜ਼ਰਬੇ+
ਪੱਗਾਂ+ ਚੁੰਨੀਆਂ+ ਫੁਲਕਾਰੀਆਂ+
ਇਸ਼ਕ ਹਕੀਕੀਆਂ+ ਮੁਲਾਕਾਤਾਂ
ਵਿਆਹ+ ਯਾਰੀਆਂ+ ਉਲ੍ਹਾਮੇਂ+
ਗਾਲ੍ਹਾਂ+ ਝਿੜਕਾਂ+ ਘਸੁੰਨਮੁੱਕੇ
ਗੁੱਲੀ ਡੰਡੇ+ ਕਬੱਡੀ+ ਛਿੰਝਾਂ+ ਅਖਾੜੇ
ਵੱਟਾਂ+ ਸੂਏ+ ਕੱਸੀਆਂ+ ਖਾਲ+ ਮੋਟਰਾਂ
ਜੁਗਤਾਂ+ ਸੱਥਾਂ+ ਮੁਖਤ ਦੀਆਂ ਸਲਾਹਾਂ+
ਠਾਣੇ+ ਕਚਿਹਰੀਆਂ+ ਪਟਵਾਰੀ+
ਅਣਖਾਂ+ ਇੱਜਤਾਂ+ ਭੈਣ+ ਭਰਾ+ ਚਾਚੇ+ ਤਾਏ
ਰਿਸ਼ਤਿਆਂ ਦੇ ਨਿੱਘ+ ਮੋਹ ਸਨੇਹ +
ਗੁਰਦਾਸ ਮਾਨ+ ਯਮਲੇ+ ਵਿਰਸੇ+
ਮੰਗਲ ਹਠੂਰ+ ਪਰਗਟ ਲਿੱਧੜਾਂ+
ਜਸਵੰਤ ਕੰਵਲ+ ਨਾਨਕ ਸਿੰਘ + ਗੁਰਦਿਆਲ ਸਿੰਘ
ਚਰਖੇ+ ਤਿੰਝਣ+ ਪੀਘਾਂ+ ਗਿੱਧੇ+ ਭੰਗੜੇ = ਪੰਜਾਬ.....ਘੁੱਦਾ
==========================================================================
 ਠੰਢੇ ਝੋਲੇ 'ਚ ਪੈ ਗਿਆ ਮਸਲਾ। ਕੋਈ ਕਹਿੰਦਾ ਸੀ ਫਾਂਸੀ ਚਾਹੀਦੀ ਆ, ਕੋਈ ਕਹਿੰਦਾ ਖੱਸੀ ਕਰਦੋ ਰੇਪਿਸਟਾਂ ਨੂੰ, ਕੋਈ ਕਹਿੰਦਾ ਉਮਰ ਕੈਦ।
ਡੱਕਿਆ ਮੁਲਖ ਰਜਾਈਆਂ 'ਚ ਬੈਠਾ ਈ ਸਜ਼ਾ ਸੁਣਾਈ ਗਿਆ ਦੋਸ਼ੀਆਂ ਨੂੰ। 1950 'ਚ ਜੇਹੜਾ ਹਜ਼ਾਰਾਂ ਵਰਕੇ ਕਾਲੇ ਕਰਕੇ ਅਗਲਿਆਂ ਨੇ ਜੇਹੜਾ ਸੰਵਿਧਾਨ ਬਣਾਇਆ ਅਗਲੇ ਉਹਨੂੰ ਐਨਕਾਂ ਲਾਕੇ ਪੜ੍ਹਨਗੇ, ਸਮਾਰ ਕੇ ਫੇਰ ਕੋਈ ਸਜ਼ਾ ਦੇਣਗੇ।
ਪਰ ਆਹ ਗੱਲਾਂ ਸਾਫ ਹੋਗੀ , ਇੰਡੀਆ ਕੰਟਰੀ ਦੋਸ਼ੀ ਦਾ ਧਰਮ ਦੇਖਕੇ ਸਜ਼ਾ ਤੈਅ ਕਰਦਾ , ਕੋਈ ਲੰਡੂ ਦਲੀਲ ਦੇਣ ਦੀ ਕੋਸ਼ਸ਼ ਨਾ ਕਰਿਓ ਬਾਈ ਅਣਦਾ।
ਦਿੱਲੀ ਦੀ ਜੰਤਾ ਨੇ ਜਚਕੇ ਪਰਦਰਸ਼ਨ ਕਰੇ ਆ, ਚਲੋ ਵਧੀਆ ਗੱਲ ਆ, ਪਰ ਚੌਰਾਸੀ ਵੇਲੇ ਦਿੱਲੀ ਦੇ ਆਹੀ ਜੰਤਾ ਨੇ ਹਜ਼ਾਰਾਂ ਕੁੜੀਆਂ ਦੇ ਬਲਾਤਕਾਰ ਵੀ ਕਰੇ ਸੀ
ਓਦੋਂ ਭੈਣਦਣਾ ਏਹਨਾਂ ਦਾ ਖੂਨ ਨੀਂ ਖੌਲਿਆ। ਥਾਣੇਆਂ 'ਚ ਕੁੜੀਆਂ ਚਿੜੀਆਂ ਨੂੰ ਪਿਓ ਜਾਂ ਭਰਾਵਾਂ ਦੇ ਮੂੰਹਾਂ ਤੇ ਪਸ਼ਾਬ ਕਰਨ ਲਈ ਮਜ਼ਬੂਰ ਕਰਿਆ ਜਾਂਦਾ ਸੀ । ਉਦੋਂ ਕਿਮੇਂ ਸੀ ।
ਹੁਣ ਇੱਕ ਕੁੜੀ ਦੇ ਨੌਂ ਤੇ ਬਲਾਤਕਾਰ ਵਿਰੋਧੀ ਕਾਨੂੰਨ ਬਣਾਉਣ ਦੀਆਂ ਸਲਾਹਾਂ ਹੁੰਦੀਆ। ਉਹ ਕਿਮੇਂ ਕੁੜੀਆਂ ਨਹੀਂ ਸੀ ਕਿ।
ਉਦੋਂ ਈ ਕੁੜੀਆਂ ਨੂੰ ਹੱਕ ਮਿਲਿਆ ਹੁੰਦਾ, ਹੁਣ ਕੁੱਤੇਖਾਣੀਆਂ ਨਾ ਹੁੰਦੀਆਂ।
ਜੇ ਡੱਕੀ ਜੰਤਾ ਨੇ ਘਟੀਆ ਗਜ਼ਲ, ਕਵਿਤਾ ਦਿੱਲੀ ਰੇਪ ਕੇਸ ਤੇ ਲਿਖਕੇ ਟੈਗ ਕਰਿਆ ਤਾਂ ਲਾਲਿਓ ਸਾਬ੍ਹ.....ਘੁੱਦਾ
===========================================================================
 ਪੰਜ ਕ ਸਾਲ ਪਹਿਲਾਂ ਇੱਕ ਦੋ ਥਾਂਈ ਲੇਖ ਪੜ੍ਹੇ ਸੀ ਸਿਰਦਾਰ ਜਗਦੀਪ ਸਿੰਘ ਦੇ ਲਿਖੇ ਵਏ। ਲੂੰ ਕੰਡਾ ਖੜ੍ਹਾ ਕਰਨ ਆਲੀ ਸਿਰਾ ਗੱਲਬਾਤ ਲਿਖੀ ਸੀ ਨਿਚੋੜ ਕੱਢਕੇ। ਓਦੋਂ ਬਾਅਦ ਕਾਲਜ 'ਚ ਗੁਰੂ ਗੋਬਿੰਦ ਸਿੰਘ ਸਟੱਡੀ ਸਰਕਲ ਦਾ ਕੈਂਪ ਲੱਗਾ ਸੀ। ਓਦੋਂ ਜਗਦੀਪ ਸਿੰਘ ਹੋਣਾਂ ਨੂੰ ਕਾਲਜ ਮਿਲੇ ਸੀ। ਓਦੋਂ ਜਾਣ-ਪਛਾਣ ਘੱਟ ਸੀ ਸਾਡੀ ਤਾਂ ਕਰਕੇ ਬਹੁਤੀ ਗੱਲਬਾਤ ਨੀਂ ਹੋਈ। ਓਦੂੰ ਬਾਅਦ ਦੋ ਸਾਲ ਪਹਿਲਾਂ ਕੁਦਰਤੀ ਫੇਸਬੁੱਕ ਤੇ ਦੁਬਾਰਾ ਮੇਲੇ ਹੋਗੇ ਸਾਡੇ। ਫੋਨ ਤੇ ਦੋ -ਚਾਰ ਆਰੀ ਗੱਲਬਾਤ ਵੀ ਹੋਈ । ਏਹਨਾਂ ਨੇ ਕਈ ਆਰੀ ਮਿਲਣ ਬਾਰੇ ਵੀ ਕਿਹਾ। ਪਰ ਸਬੱਬ ਨਾ ਬਣਿਆ। ਤੇਈ ਦਸੰਬਰ ਨੂੰ ਅਸੀਂ ਫਰੀਦਕੋਟ ਗਏ ਵਏ ਸੀ। ਜਗਦੀਪ ਸਿੰਘ ਹੋਣੀਂ ਮੋਟਰਸੈਕਲ ਤੇ ਕੋਲ ਦੀ ਲੰਘੇ ਤਾਂ ਪੜੱਕ ਦੇਂਨੀ ਨਿਗਾਹ ਮਿਲਗੀ ਤੇ ਪਹਿਲੀ ਨਜ਼ਰੇ ਅਸੀਂ ਇੱਕ ਦੂਜੇ ਨੂੰ ਪਛਾਣ ਲਿਆ । ਮੁੜਕੇ ਵਾਹਵਾ ਗੱਲਾਂ ਬਾਤਾਂ ਹੋਈਆਂ।
ਪੰਥਕ ਮੈਗਜੀਨਾਂ "ਫਤਿਹਨਾਮਾ" " ਸ਼ਮਸ਼ੀਰ ਏ ਦਸਤ" ਜਾਂ ਹੋਰ ਸਿੱਖ ਲਿਟਰੇਚਰ ਦੀ ਬੈਕਬੋਨ ਨੇ ਭਾਈ ਸਾਬ੍ਹ।
ਤੁਰੀਆਂ ਫਿਰਦੀਆਂ ਲਾਇਬਰੇਰੀਆਂ ਕਹਿਲੋ। ਜਸਵੰਤ ਸਿੰਘ ਕੰਵਲ ਹੋਣਾਂ ਦੇ ਨਜ਼ਦੀਕੀਆਂ 'ਚੋਂ ਨੇ।
ਨਿਰੇ ਕੱਟੜਵਾਦ, ਨਜ਼ੈਜ਼ ਪਬਲੀਸਿਟੀ ਤੋਂ ਦੂਰ ਜਗਦੀਪ ਸਿੰਘ ਹੋਣਾਂ ਦੇ ਬਲੌਗ ਪੜ੍ਹਨ ਆਲੇ ਹੁੰਦੇ ਨੇ।
ਇਹ ਕਲਿੱਕ ਗੁਰੂ ਗੋਬਿੰਦ ਸਿੰਘ ਹਸਪਤਾਲ ਫਰੀਦਕੋਟ ਦੇ ਸਾਹਮਣੇ ਰੈੱਡ ਕਰਾਸ ਢਾਬੇ ਕੋਲ ਕੀਤੀ ਸੀ
===========================================================================


ਅੱਜ ਮਿਲੀ ਤਾਜ਼ਾ ਜਾਣਕਾਰੀ ਅਨੁਸਾਰ ਪੁਲਿਸ ਦੀ ਇੱਕ ਸ਼ਪੈਸ਼ਲ ਟੀਮ ਨੇ ਨਿੱਕੇ ਗਰਨੈਬ ਦੇ ਘਰ ਛਾਪਾਮਾਰੀ ਦੌਰਾਨ ਕਾਫੀ ਇਤਰਾਜ਼ਯੋਗ ਸਮੱਗਰੀ ਦਾ ਜ਼ਖੀਰਾ ਬਰਾਮਦ ਕੀਤਾ ਏ। ਦੋਸ਼ੀ ਦੀ ਅਲਮਾਰੀ 'ਚੋਂ ਫੁੱਲਾਂ ਆਲੀਆਂ ਨੀਕਰਾਂ ਤੋਂ ਇਲਾਵਾਂ ਇਮਰਾਨ ਹਾਸ਼ਮੀ ਆਲੇ AXE ਬੌਡੀ ਸਪਰੇਅ ਦੀਆਂ ਸੱਤ ਸੀਸੀਆਂ ਬਰਾਮਦ ਕੀਤੀਆਂ ਗਈਆਂ। ਇੰਜਨੀਅਰਿੰਗ ਵਿੰਗ ਦੇ ਮੁਖੀ ਨੇ ਦੱਸਿਆ ਕੀ ਨਿੱਕੇ ਦੇ ਮਬੈਲ 'ਚ ਨਿੱਕੀ ਕਟਰੀਨਾ ਕੈਫ, ਤੇ ਮਲਕਾ ਰੋੜਾ ਦੇ ਕਾਫੀ ਵਾਲਪੇਪਰ ਸਨ।
ਨਿੱਕੇ ਦੀਆਂ ਕਿਤਾਬਾਂ ਕਾਪੀਆਂ ਤੇ ਜਗਬਾਣੀ ਅਖਬਾਰ ਆਲੇ ਫਿਲਮੀ ਅੰਕ ਦੀ ਜਿਲਤ ਚੜ੍ਹੀ ਮਿਲੀ।
ਪੁਲਸ ਮੁਖੀ ਨੇ ਪ੍ਰੈਸ ਨੂੰ ਬਿਆਨ ਦਿੰਦਿਆਂ ਕਿਹਾ ਕਿ ਅਜਿਹੇ ਅਸ਼ਲੀਲਤਾ ਫੈਲਾਓ ਸ਼ਰਾਰਤੀ ਅਨਸਰਾਂ ਨੂੰ ਜਲਦ ਨੱਥ ਪਾਈ ਜਾਵੇਗੀ।
ਇਸ ਸਾਰਾ ਮਾਮਲਾ ਜਦੋਂ ਪਿੰਡ ਦੇ ਸਰਪੰਚ ਦੇ ਧਿਆਨ ਹੇਠ ਲਿਆਂਦਾ ਗਿਆ ਤਾਂ ਉਹਨ੍ਹਾਂ ਨੇ ਕਿਹਾ , "ਭੈਣਦਣਾ ਲਗਾੜਾ"
ਜਿੱਥੇ ਚਾਰੇ ਪਾਸੇ ਇਸ ਘਟਨਾਕ੍ਰਮ ਦੀ ਘੋਰ ਨਿੰਦਾ ਕੀਤੀ ਗਈ ਏ , ਉੱਥੇ ਮਾਲਵੇ ਦੇ ਪਰਸਿੱਧ ਗਿੱਠਲ ਗੀਤਕਾਰ ਪੁਸ਼ਪਿੰਦਰ ਮਲੂਕਾ ਜੀ ਨੇ
ਇਸ ਨੂੰ ਗੈਰ ਜ਼ਿੰਮੇਵਰਾਨਾ ਘਟਨਾ ਕਰਾਰ ਦੇਂਦਿਆ ਦੋਸ਼ੀ ਖਿਲਾਫ ਸਖਤ ਕਾਰਵਾਈ ਦੀ ਮੰਗ ਕੀਤੀ। ਕਾਰਵਾਈ ਨਾ ਹੋਣ ਦੀ ਸੂਰਤ ਵਿੱਚ ਸੰਘਰਸ਼ ਨੂੰ ਹੋਰ ਤਿੱਖਾ ਕਰਨ ਦੀ ਚਿਤਾਵਨੀ ਵੀ ਦਿੱਤੀ। ਖਬਰ ਮਿਲਣ ਤੱਕ ਦੋਸ਼ੀ ਨੂੰ ਕਈ ਸੰਗੀਨ ਧਾਰਾਵਾਂ ਹੇਠ ਅਦਾਲਤ ਵਿੱਚ ਅਰਜ਼ੀ ਦਾਖਲ ਕਰਕੇ ਪੰਜ ਦਿਨਾਂ ਪੁਲਸ ਰਿਮਾਂਡ ਤੇ ਭੇਜ ਦਿੱਤਾ ਹੈ। ਦੋਸ਼ੀ ਦੇ ਸੰਨੀ ਲਿਓਨ ਅਰਗੀਆਂ ਨਿੱਕੀਆਂ ਨਾਲ ਸੰਬੰਧ ਹੋਣ ਦੇ ਸ਼ੰਕੇ ਜਤਾਏ ਜਾ ਰਹੇ ਹਨ।
ਇਹ ਸਨ ਹੁਣ ਤੱਕ ਦੀਆਂ ਖਬਰਾਂ। ਖਬਰਾਂ ਦਾ ਅਗਲਾ ਬੁਲਿਟਨ ਲੈਕੇ ਭਲਕੇ ਪੰਜ ਵਜੇ ਹਾਜ਼ਰ ਹੋਵਾਂਗੇ। ਤਦ ਤੱਕ ਲਈ ਆਗਿਆ ਦਿਓ। ਧੰਨਵਾਦ......ਘੁੱਦਾ
=========================================================================
 ਓਦੋਂ ਨਮੇਂ ਸਾਲ ਦਾ ਪਰੋਗਰਾਮ ਦੇਖਿਆ ਸੀ ਰਜਾਈਆਂ 'ਚ ਬਹਿਕੇ ਪਰੋਗਰਾਮ ਦਾ ਨੌਂ ਸੀ
"ਟਿਕ ਟਿਕ ਟਿਕ ਦੋ ਹਜ਼ਾਰ ਇੱਕ"
ਬਹਿੰਦਿਆਂ ਈ ਟੱਪਗੇ ਬਾਰ੍ਹਾਂ ਸਾਲ , ਬਾਪੂ ਹੋਣਾਂ ਨੂੰ ਰੋੜ੍ਹਗੇ ਲੈਗੇ ਨਾਲ।
ਬਾਕੀ ਕੰਮ ਓਮੇਂ ਜਿਮੇਂ ਈ ਆ । ਸਮੇਂ ਦੇ ਬੋਝਲ ਪਹੀਏ ਘੁਕੀ ਜਾਂਦੇ ਨੇ।
ਕੱਲ੍ਹ ਬਠਿੰਡੇ ਕਿਲ੍ਹਾ ਸਾਬ੍ਹ ਮੱਥਾ ਟੇਕ ਆਏ ਗੁਰੂ ਗ੍ਰੰਥ ਸਾਬ੍ਹ ਨੂੰ। ਹੋਰ ਕਿਤੇ ਨੀਂ ਸਿਰ ਝੁਕਦੇ ਸਾਡੇ।
ਓਮੇਂ ਸੂਰਜ ਚੜ੍ਹਨਾ ਲਹਿਣਾ, ਉਹੀ ਸਾਉਣ ਭਾਂਦਰੋ, ਮਾਘੀਆਂ ,ਵਸਾਖੀਆਂ ਆਉਣਗੀਆਂ।
ਕੁਸ਼ ਖਾਸ ਨੀਂ ਬਦਲਣਾ ਕੰਧਾਂ ਤੇ ਟੰਗੇ ਕਲੰਡਰ ਜ਼ਰੂਰ ਬਦਲਣਗੇ ।
ਜਾਂ ਬੇਬੇ ਨੇ ਅੱਜ ਹੁਕਮ ਸੁਣਾਤਾ, "ਪੁੱਤ ਨਮੇਂ ਸਾਲ ਦੀ ਡੈਰੀ ਲੈ ਆਇਓ ਮੱਸਿਆ, ਸੰਗਰਾਂਦਾਂ ਦਾ ਪਤਾ ਲੱਗ ਜਾਂਦਾ"
ਐਨੀਵੇਅ...ਹੈਪੀ ਨਿਉ ਜੀਅਰ ...ਜਵਾਨੀਆਂ ਮਾਣੋ....ਘੁੱਦਾ
==========================================================================

 ਫੂਨ ਖੜਕਿਆ। ਸਕ੍ਰੀਨ ਤੇ ਵੇਖਿਆ ਨਮਾਂ ਨੰਬਰ ਸੀ। ਕਾਲ ਰਸੀਵ ਕੀਤੀ ਤਾਂ ਅੱਗੋਂ ਮੱਠੀ ਜੀ 'ਵਾਜ਼ ਆਈ ,"ਹਾਂ ਕਾਕਾ ਅੰਮ੍ਰਿਤਪਾਲ"
ਮਖਾ, "ਹਾਂਜੀ"। ਬੇਟਾ ਮੈਂ ਤਰਲੋਕ ਬੋਲ ਰਿਹਾਂ। ਸਿੱਧੀ ਮਗਜ਼ 'ਚ ਵੱਜੀ ਕਿ ਜ਼ਰੂਰ ਤਰਲੋਕ ਜੱਜ ਹੋਣੀ ਨੇ।
ਸ਼ਾਇਰੋ ਸ਼ਾਇਰੀ ਨਾਲ ਬਾਹਲਾ ਵਾਹ ਵਾਸਤਾ ਨਹੀਂ ਰਿਹਾ। ਪਰ ਜੱਜ ਹੋਣਾਂ ਦੇ ਸਟੇਟਸ ਬੜੇ ਚੰਗੇ ਲੱਗਦੇ । ਫੂਨ ਤੇ ਜੱਜ ਸਾਬ੍ਹ ਨੇ ਕਿਹਾ ਮੈਂ ਤੇਰੇ ਸ਼ਹਿਰ ਬਠਿੰਡੇ ਆਇਆ ਹੋਇਆ। ਜਦੋਂ ਟੈਮ ਮਿਲੇ ਮਿਲਣ ਜ਼ਰੂਰ ਆਈਂ। ਹਨੂੰਮਾਨ ਚੌਂਕ ਕੋਲ ਚਿਰਾਗਦੀਨ ਹਸਪਤਾਲ 'ਚ ਦਾਖਲ ਸੀ ਜੱਜ ਹੋਣੀਂ। ਹਸਪਤਾਲ 'ਚ ਦਾਖਲ ਮਰੀਜ਼ਾਂ ਨੂੰ ਕੋਈ ਪਤਾ ਨੀਂ ਸੀ ਬੀ ਉਹ ਬੰਦਾ ਏਥੇ ਦਾਖਲ ਹੋਇਆ ਵਾ ਜੀਹਨੂੰ ਸਰਤਾਜ ਅਰਗੇ ਚੋਰੀ ਕਰਕੇ ਗਾ ਰਹੇ ਨੇ। ਬੜੇ ਮੋਹ ਨਾ ਮਿਲੇ ਸੀ, ਗੱਲਾਬਾਤਾਂ ਕਰੀਆਂ । ਉਹਨ੍ਹਾਂ ਆਵਦੀ ਕਿਤਾਬ "ਅੱਗ ਦੇ ਵਸਤਰ" "ਪਿਆਰੇ ਅਜ਼ੀਜ਼ ਅੰਮ੍ਰਿਤਪਾਲ ਨੂੰ ਮੋਹ ਨਾਲ"" ਲਿਖਕੇ ਭੇਂਟ ਕੀਤੀ ਸੀ । 15-9-12 ਦੀ ਗੱਲ ਆ ਏਹ। ਅੱਜ ਪਤਾ ਲੱਗੇਆ ਬੀ ਜੱਜ ਹੁਣੀਂ ਦੁਨੀਆਂ ਨੂੰ ਫਤੇਹ ਬੁਲਾਗੇ। ਖੇਤਾਂ ਦੇ ਡਾਂਡੇ ਮੀਂਡੇ ਰਾਹ ਪੈਕੇ ਸਫੈਦਿਆਂ ਵੱਲ ਲਹਿੰਦੇ ਸੂਰਜ ਬੰਨੀਂ ਤੁਰਗੇ । ਬਾਰੀ ਵਿੱਚਦੀ ਵੱਜੇ ਹਵਾ ਦੇ ਬੁੱਲ੍ਹੇ ਨਾ ਇੱਕ ਹੋਰ ਦੀਵਾ ਬੁਝ ਗਿਆ। ਜੱਜ ਹੋਣਾਂ ਦਾ ਇੱਕ ਸ਼ੇਅਰ ਚੇਤੇ ਆ

ਇਹ ਜੋ ਮੋਇਆ ਏ ਗੰਗਾ ਵਿੱਚ ਡੁਬਕੇ,
ਏਹਦੇ ਫੁੱਲ ਹੁਣ ਕਿੱਥੇ ਤਾਰੋਗੇ?
-----------------------------------------------------------------------------------------------------------------------------
  
ਏਮੇਂ ਜਿਮੇਂ ਸ਼ਨੀਆਰ ਨੂੰ ਸਕੂਲ 'ਚ ਬਾਲ ਸਭਾ ਹੋਇਆ ਕਰੇ। ਮੂੜ੍ਹ ਮੱਤ ਸੀ ਮੂਹਰੇ ਹੋ ਹੋ ਗਾਣੇ ਗਾਉਦੇਂ ਮੈਕ 'ਚ।
ਦੇਵ ਥਰੀਕੇ ਆਲੇ ਦਾ ਲਿਖਿਆ ਗੀਤ ਸੀ ਜੇਹੜਾ ਮਾਣਕ ਸਾਬ੍ਹ ਨੇ ਗਾਇਆ ਸੀ ਭਗਤ ਸਿੰਘ ਤੇ ਉਹਦੇ ਪਰਿਵਾਰ ਦੀ ਆਖਰੀ ਮੁਲਾਕਾਤ ਬਾਰੇ। ਗੀਤ ਦੇ ਬੋਲ ਏਮੇਂ ਸੀ
"ਘੈਂਟੀ ਵੱਜਗੀ ਮੁਲਾਕਾਤ ਟੁੱਟਗੀ, ਕੱਢ ਲਿਆ ਕੋਠੜੀ 'ਚੋਂ ਭਗਤ ਸਿੰਘ ਨੂੰ ਲਾਲਿਆ ਮੂਹਰੇ, ਗੋਰਿਆਂ ਦੀ ਗਾਰਦ ਨੇ, ਚੰਦ ਸ਼ੇਰ ਨੇ ਮਾਰਿਆ ਨਾਅਰਾ ਇੰਨਕਲਾਬ ਜਿੰਦਾਬਾਦ ਦਾ, ਫਾਂਸੀ ਚਾੜ੍ਹਦਾ ਪਾਪੀ ਗੋਰੋਆਂ ਰਾਣਾ, ਵਰਤ ਥਰੀਕੇ ਆਲੇਆ ਗਿਆ ਭਾਣਾ"
ਸੱਤ ਸਮੁੰਦਰੋਂ ਪਾਰ , ਗੋਰੀ ਖੱਲ ਆਲੇ ਸੱਤ ਬਿਗਾਨੇ ਵੀ ਹਰਿੱਕ ਸੂਰਮੇ ਦੀ ਫਾਂਸੀਓ ਪਹਿਲਾਂ ਟੱਬਰ ਨਾ ਮੁਲਾਕਾਤ ਕਰਾਉਂਦੇ ਸੀ। ਹੁਣ ਤਾਂ ਮਨਮੋਹਨ ਸਿੰਘ ਨੂੰ ਵੀ ਬਾਅਦ 'ਚ ਟੈਲੀਫੂਨ ਕਰਦੇ ਆ ਬੀ ਫਲਾਣਾ ਬੰਦਾ ਮਾਰਤਾ ਬਾਈ ਓਏ, ਟੱਬਰ ਦੀ ਮੁਲਾਕਾਤ ਤਾਂ ਕਰਾਉਣੀ ਈ ਕੀ ਆ। ਐਸ ਹਸਾਬ ਕਤਾਬ ਨਾ ਹੁਣ ਪੰਜਾਬ ਦੇ ਗੱਭਰੂਆਂ ਦੀ ਵਾਰੀ ਆ। ਭਮਾਂ ਰਾਜੋਆਣਾ ਹੋਵੇ ਭਮਾਂ ਦਿਆਲਪੁਰੇ ਆਲਾ ਭੁੱਲਰ।
ਕਸ਼ਮੀਰ 'ਚ ਤਾਂ ਕਲਫੂ ਲਾਤਾ ...ਪੰਜਾਬ 'ਚ ਠੰਢ ਵਰਤਾਈਂ ਬਾਜ਼ਾਂ ਆਲੇਆਂ....ਘੁੱਦਾ
---------------------------------------------------------------------------------------------------------------------------


ਪਚਾਂਨਵੇਂ ਸਾਲ ਦਾ ਪਿਆਰਾ ਸਿੰਘ ਦੋਂਹ ਹੱਥਾਂ ਨਾਲ ਅੱਸੀ ਕਿਲੋ ਦੇ ਮੂੰਗਲੇ ਫੇਰਦਾ। ਕੋਈ ਕੰਨਾਂ ਨਾਲ ਕਾਰ ਖਿੱਚਦਾ ਤੇ ਕੋਈ ਦੰਦਾਂ ਨਾਲ ਹਲ ਚੱਕਦਾ। ਉੱਡਦੀਆਂ ਧੂੜਾਂ 'ਚ ਬਲਦਾਂ ਦੇ ਸ਼ੌਕੀ ਤੱਤਾ ਤੱਤਾ ਤੱਤਾ ਕਰਕੇ ਜਾਂ ਕਸੂਤੇ ਥੌਂ ਹੱਥ ਲਾਕੇ ਬਲਦਾਂ ਨੂੰ ਦਬੱਲਦੇ ਨੇ। ਪੁੱਤਾਂ ਅੰਗੂ ਪਾਲੇ ਕੁੱਤੇ ਗਿੱਠ ਗਿੱਠ ਲੰਮੀਆਂ ਜੀਭਾਂ ਕੱਢਕੇ ਦੌੜਾਂ ਜਿੱਤ ਮਾਲਕਾਂ ਦਾ ਵੀ ਹੌਂਸਲਾ ਵਧਾਉਂਦੇ ਨੇ। ਲੰਮੇ ਪੈਕੇ ਲੱਤਾਂ ਤੋਂ ਟਰੈਕਟਰ ਟਪਾਉਂਦਾ ਕੋਈ, ਨਿਹੰਗਾਂ ਦਾ ਗਤਕਾ, ਛਿੰਝਾਂ, ਅਖਾੜੇ, ਰੱਸਾ- ਕਸੀ, ਬਾਜ਼ੀਗਰਾਂ ਦੀਆਂ ਬਾਜ਼ੀਆਂ।
ਹੋਰ ਵੀ ਨਮੀਆਂ ਪੁਰਾਣੀਆਂ ਖੇਡਾਂ ਦਾ ਸੁਮੇਲ ਨੇ ਕਿਲ੍ਹਾ ਰਾਏਪੁਰ ਦੀਆਂ ਪਰਸਿੱਧ ਖੇਡਾਂ ਜਾਂ ਮਿੰਨੀ ਉਲੰਪਿਕ ਵੀ ਆਖਦੇ ਨੇ।
ਛੇਮੀਂ ਖਣੀ ਸੱਤਮੀਂ 'ਚ ਪੰਜਾਬ ਸਕੂਲ ਸਿੱਖਿਆ ਬੋਰਡ ਦੀ ਪੰਜਾਬੀ ਦੀ ਕਿਤਾਬ 'ਚ ਏਹਨਾਂ ਖੇਡਾਂ ਦਾ ਖਾਸ ਜ਼ਿਕਰ ਕਰਿਆ ਵਾ ਸੀ। 1982-83 ਤੋਂ ਵੀ ਪਹਿਲਾਂ ਸਿਲੇਬਸ 'ਚ ਏਹ ਚੈਪਟਰ ਸੀ। ਪਿੱਛੇ ਜੇ ਅਦਾਲਤਾਂ ਨੇ ਏਹਨਾਂ ਖੇਡਾਂ ਤੇ ਖਾਸੀ ਪਬੰਦੀ ਲਾਤੀ ਸੀ ਬੀ ਘੋੜ , ਬਲਦ ਜਾਂ ਕੁੱਤਿਆਂ ਦੀਆਂ ਰੇਸਾਂ ਜਾਨਵਰਾਂ ਤੇ ਅੱਤਿਆਚਾਰ ਆ। ਐਰਕੀਂ ਏਹ ਕੇਸ ਜਿੱਤ ਲਿਆ ਸੀ ਲੋਕਾਂ ਨੇ ਤੇ ਦਬਾਰੀ ਤੋਂ ਰਾਏਪੁਰ ਦੀਆਂ ਖੇਡਾਂ 'ਚ ਏਹ ਜਾਨਵਰਾਂ ਦੀਆਂ ਦੌੜਾਂ ਫੇਰ ਸ਼ੁਰੂ ਹੋਗੀਆਂ। ਟੀਵੀ ਜਾਂ ਅਖਬਾਰਾਂ ਤੇ ਤਾਂ ਫੋਟਮਾਂ ਈ ਨੇ ਬਾਜ਼ਾਂ ਆਲ਼ਾ ਸੁੱਖ ਰੱਖੇ ਕਦੇ ਜਾਕੇ ਵੇਖਾਂਗੇ ਕਿਲ੍ਹਾ ਰਾਏਪੁਰ ਦੀਆਂ ਖੇਡਾਂ। ਫੇਹਬੁੱਕ ਆਲੇਓ ਕਿਸੇ ਨਿੱਕੀ ਦੀ ਫੋਟੂ 'ਦ ਟੈਗ ਕਰਨ ਦੀ ਬਜਾਏ ਜਿੱਥੋਂ ਕਿਤਿਓਂ ਮਿਲੇ ਆਹ ਮੇਲੇ ਦੀਆਂ ਫੋਟਮਾਂ ਪਾਇਓ ਬੀਰ ਅਣਦਾ.....ਘੁੱਦਾ
---------------------------------------------------------------------------------------------------------------------------

 ਗੌਰ ਨਾਲ ਦੇਖਿਓ ਕਿਤੇ
1.ਦਲਜੀਤ ਦੇ ਖਾੜਕੂ ਆਲੇ ਗੀਤ ਦੀ ਬੀਡਿਓ 'ਚ ਦਲਜੀਤ ਬੱਸ 'ਚ ਲੱਤ ਕਿਸੇ ਹੋਰ ਬੰਦੇ ਦੇ ਮਾਰਦਾ ਪਰ ਮੂਹਰਲਾ ਸ਼ੀਸ਼ਾ ਤੋੜਕੇ ਬਾਹਰ ਕੋਈ ਹੋਰ ਡਿੱਗਦਾ ਹੁੰਦਾ
2. ਏਮੇਂ ਜਿਮੇਂ ਨਮੇਂ ਗੈਕਾਰ ਜੱਸੀ ਗਿੱਲ ਦੇ ਲੈਂਸਰ ਆਲੇ ਗੀਤ 'ਚ ਲੈਂਸਰ ਆਲਾ ਪਰਧਾਨ ਬੱਸ ਨੂੰ ਖੱਬੇ ਪਾਸੇ ਦੀ ਈ ਉਬਰਟੇਕ ਕਰ ਜਾਂਦਾ
3. ਇੱਕ ਹੋਰ ਗੀਤ ਆ ਬੀ ਗੱਭਰੂ ਨੇ ਰੰਗ ਪੱਕਾ ਕਰਾਲਿਆ ਤੇ ਗੇੜੀਆਂ ਦਾ ਮੁੱਲ ਨੀਂ ਪਿਆ..ਐਸ ਗੀਤ 'ਚ ਕੁੜੀ ਦਾ ਪਿਓ ਆਸ਼ਕ ਦੇ ਲਫੇੜਾ ਖੱਬੀ ਗੱਲ੍ਹ ਤੇ ਮਾਰਦਾ ਪਰ ਉਹ ਪਤੰਦਰ ਹੱਥ ਸੱਜੀ ਗੱਲ੍ਹ ਤੇ ਧਰ ਲੈਂਦਾ
ਬੀਡੀਓ ਡਰੈਕਟਰ ਵੀ ਡੱਕੇ ਈ ਫਿਰਦੇ ਨੇ....ਨੋਟ ਕਰਲਿਓ ਭਮਾਂ..ਘੁੱਦਾ
----------------------------------------------------------------------------------------------------------------------------
ਨਿੱਕੇ ਗਰਨੈਬ ਨੂੰ ਕਲੱਲੀ ਆਦਤ ਸੀ ਭੈਦਣੀ , ਏਹ ਬੋਚ ਕ ਦਨੇ ਰਸੋਈ 'ਚ ਬੜਿਆ ਕਰੇ ਤੇ ਫਲਾਫੇਆਂ 'ਚੋਂ ਬਿਸਕੁੱਟ ਤੇ ਹੋਰ ਭੁਜੀਆ ਭਜੀਆ ਜਾ ਖਾਜਿਆ ਕਰੇ ਪੜਦੇ ਨਾ। ਕੇਰਾਂ ਭਰਾਵਾ ਰਿਸ਼ਤੇਦਾਰ ਜੇ ਆਗੇ ਵਾਹਵਾ ਸਾਰੇ , ਆਹੀ ਦਿਨ ਸੀ ਗਰਮੀ ਜੀ ਸ਼ਟਾਟ ਹੁੰਦੀ ਸੀ।
ਮੌਕੇ ਤੇ ਮਾਤਾ ਅਰਗੀਆਂ ਨੇ ਏਹਨੂੰ ਹਲਵਾਈ ਦੇ ਭੇਜਤਾ ਬੀ ਜਾ ਸਮਾਨ ਲਿਆ। ਜਾਵੜਿਆ ਭਰਾਵਾ।
ਕਦੇ ਬਰਫੀ ਦਾ ਰੇਟ ਪੁੱਛਲੇ, ਕਦੇ ਗੁਲਾਬ ਜਾਮਨਾਂ ਦਾ ਕਦੇ ਰਸਗੁੱਲੇ ਤੇ ਚਮਚਮ ਜੀ । ਸਾਰਾ ਸਮਾਨ ਕਿਲੋ ਕਿਲੋ ਕਰਾਲਿਆ ਏਹਨੇ।
ਸਮਾਨ ਜ਼ੋਖ ਕੇ ਹਲਵਾਈ ਕਹਿੰਦਾ ਨਿੱਕਿਆ ਪੰਜ ਸੌ ਪੰਤਾਲੀ ਰੁਪੈ ਬਣਗੇ । ਨਿੱਕਾ ਕਹਿੰਦਾ ਖੜਜਾ ਬਾਈ ਆਹ ਸਮਾਨ ਨੂੰ ਕੜਾਹੀ 'ਚ ਸਿੱਟਲਾ ਤੇ ਖੁਰਚਨਾ ਮਾਰਦੇ ਬਹੁਤ ਸਵਾਦ ਡਿਸ਼ ਬਣੂੰ।
ਓਹੀ ਗੱਲ ਡੱਕੇ ਹਲਬਾਈ ਨੇ ਕੜਾਹੀ 'ਚ ਪਲਟ ਕੇ ਖੁਰਚਨਾ ਚੱਕਤਾ ਮਾਲ ਪੱਤੇ 'ਚ। ਦਸ ਕੁ ਮੈਟਾਂ ਬਾਅਦ ਹਲਵਾਈ ਪੁੱਛਦਾ , ਕਹਿੰਦਾ ਨਿੱਕਿਆ ਆਹ ਕਿਹੜੀ ਡਿਸ਼ ਬਣਗੀ ਭਲਾਂ ਦੀ। ਨਿੱਕਾ ਕਹਿੰਦਾ ਬਾਈ ਏਹ ਰੇਬੜੀ ਬਣਗੀ ਰੇਬੜੀ।
ਹਲਬਾਈ ਕਹਿੰਦਾ ਹੁਣ ਫਿਰ? ਨਿੱਕਾ ਕਹਿੰਦਾ ਹੁਣ ਤਾਂ ਕੀ ਆ, ਬਸ ਰੇਬੜੀ ਤੋਲਦੇ ਪੰਦਰਾਂ ਦੀ.....ਘੁੱਦਾ
----------------------------------------------------------------------------------------------------------------------------
 ਪੁਰਾਣਾ ਰਬਾਜ ਆ ਇੱਕ ਬੀ ਜਦੋਂ ਕੋਈ ਨੱਬੇ ਪਚਾਂਨਵੇ ਸਾਲ ਦਾ ਬਜ਼ੁਰਗ ਆਸੇ ਪਾਸੇ ਹੋਜੇ ਤਾਂ ਸਾਰੀਆਂ ਰਿਸ਼ਤੇਦਾਰੀਆਂ ਆਲੇ ਮ੍ਹਸੋਸ ਕਰਨ ਆਉਂਦੇ ਆ। ਕੇਰਾਂ ਏਮੇਂ ਜਿਮੇਂ ਕਿਸੇ ਦਾ ਬਜ਼ੁਰਗ ਚੱਲ ਵਸਿਆ।
ਕਣਕਾਂ ਕੁਣਕਾਂ ਬੀਜ ਕੇ ਮੁਲਖ ਵੇਹਲਾ ਸੀ ਜਮਾਂ। ਪੋਤਿਆਂ ਦੇ ਸਹੁਰਿਆਂ ਤੀਕ ਸਕੀਰੀਆਂ ਆਲੇ ਮਾੜਾ ਆਖਣ ਆਏ। ਪੱਠੇ ਵੱਢ ਜੰਤਾ ਸਾਰੀ ਜਲੇਬੀਆਂ ਖਾਣ ਆਗੀ ।
ਡੂਢ ਕ ਮਹੀਨੇ ਬਾਅਦ ਇੱਕ ਹੋਰ ਰਿਸ਼ਤੇਦਾਰ ਆਗੇਆ ਬੀ ਟੱਬਰ ਦੇ ਮੱਥੇ ਲੱਗ ਆਈਏ ਬੀ ਮਾੜੀ ਗੱਲ ਹੋਗੀ ਭੈਦਣੀ।
ਆਕੇ ਕਹਿੰਦਾ ਬੀ ਬਾਈ ਜਰ ਬਾਬੇ ਆਲੀ ਤਾਂ ਬਹੁਤ ਮਾੜੀ ਗੱਲ ਹੋਗੀ। ਅੱਗੋਂ ਘਰਆਲਾ ਬੀ ਅੱਕਿਆ ਬੈਠਾ ਸੀ ਗਿੱਚੀ ਜੀ ਖੁਰਕ ਕੇ ਕਹਿੰਦਾ," ਪਰਧਾਨ ਪਹਿਲਾਂ ਤਾਂ ਸਰ ਗਿਆ ਪਰ ਬਾਹਲੀ ਮਾੜੀ ਤਾਂ ਹੁਣ ਹੁੰਦੀ ਆ ਜਰ ਧਰਮ ਨਾ "।
ਰਿਸ਼ਤੇਦਾਰ ਕਹਿੰਦਾ ਬੀ ਉਹ ਕਿਮੇਂ? ਅੱਗੋਂ ਘਰਆਲਾ ਕਹਿੰਦਾ ਨਿੱਤ ਚਾਰ ਰਿਸ਼ਤੇਦਾਰ ਬੱਸ ਚੜ੍ਹਾਈ ਦੇ ਆ ਤੇ ਚਾਰ ਹੋਰ ਉੱਤਰ ਆਉਂਦੇ ਆ। ਕਹਿੰਦਾ ਲਾਲਾ ਹਸਾਬ ਪਸੇਰੀ ਪੱਕਾ ਦੁੱਧ ਚਾਹ 'ਚ ਲੱਗ ਜਾਂਦਾ ਤੇ ਤੜਕੇ ਤੋਂ ਲੈ ਆਥਣ ਤੀਕ ਪੰਜ ਪਸੇਰੀਆਂ ਆਟੇ ਦੀਆਂ ਪੱਕ ਜਾਂਦੀਆਂ।
ਹੈਨੀ ਕ ਗੱਲ ਸੁਣਕੇ ਰਿਸ਼ਤੇਦਾਰ ਨੂੰ ਚਾਹ ਦੇ ਗਲੂਟ ਜੇ ਆਉਣ ਤੇ ਬਾਟੀ ਧਰਕੇ ਕੱਚਾ ਧੂੰਆਂ ਜਾ ਮਾਰਦਾ ਮਾਰਦਾ ਹਮਦਰਦੀਆਂ ਜਹਾਬਾ ਵੋਟਾਂ ਆਲੀ ਜੀਪ ਅੰਗੂ ਟੱਪ ਗਿਆ.....ਘੁੱਦਾ
----------------------------------------------------------------------------------------------------------------------------

ਪੂਜ ਛੜਿਆਂ ਦੀਆਂ
ਮੜ੍ਹੀਆਂ ਦੁਨੀਆਂ ਪੁੱਤ ਭਾਲਦੀ
-------------------------------------------------------------------------------------------------------------------------
ਫੂਨ ਖੜਕਿਆ। ਸਕ੍ਰੀਨ ਤੇ ਵੇਖਿਆ ਨਮਾਂ ਨੰਬਰ ਸੀ। ਕਾਲ ਰਸੀਵ ਕੀਤੀ ਤਾਂ ਅੱਗੋਂ ਮੱਠੀ ਜੀ 'ਵਾਜ਼ ਆਈ ,"ਹਾਂ ਕਾਕਾ ਅੰਮ੍ਰਿਤਪਾਲ"
ਮਖਾ, "ਹਾਂਜੀ"। ਬੇਟਾ ਮੈਂ ਤਰਲੋਕ ਬੋਲ ਰਿਹਾਂ। ਸਿੱਧੀ ਮਗਜ਼ 'ਚ ਵੱਜੀ ਕਿ ਜ਼ਰੂਰ ਤਰਲੋਕ ਜੱਜ ਹੋਣੀ ਨੇ।
ਸ਼ਾਇਰੋ ਸ਼ਾਇਰੀ ਨਾਲ ਬਾਹਲਾ ਵਾਹ ਵਾਸਤਾ ਨਹੀਂ ਰਿਹਾ। ਪਰ ਜੱਜ ਹੋਣਾਂ ਦੇ ਸਟੇਟਸ ਬੜੇ ਚੰਗੇ ਲੱਗਦੇ । ਫੂਨ ਤੇ ਜੱਜ ਸਾਬ੍ਹ ਨੇ ਕਿਹਾ ਮੈਂ ਤੇਰੇ ਸ਼ਹਿਰ ਬਠਿੰਡੇ ਆਇਆ ਹੋਇਆ। ਜਦੋਂ ਟੈਮ ਮਿਲੇ ਮਿਲਣ ਜ਼ਰੂਰ ਆਈਂ। ਹਨੂੰਮਾਨ ਚੌਂਕ ਕੋਲ ਚਿਰਾਗਦੀਨ ਹਸਪਤਾਲ 'ਚ ਦਾਖਲ ਸੀ ਜੱਜ ਹੋਣੀਂ। ਹਸਪਤਾਲ 'ਚ ਦਾਖਲ ਮਰੀਜ਼ਾਂ ਨੂੰ ਕੋਈ ਪਤਾ ਨੀਂ ਸੀ ਬੀ ਉਹ ਬੰਦਾ ਏਥੇ ਦਾਖਲ ਹੋਇਆ ਵਾ ਜੀਹਨੂੰ ਸਰਤਾਜ ਅਰਗੇ ਚੋਰੀ ਕਰਕੇ ਗਾ ਰਹੇ ਨੇ। ਬੜੇ ਮੋਹ ਨਾ ਮਿਲੇ ਸੀ, ਗੱਲਾਬਾਤਾਂ ਕਰੀਆਂ । ਉਹਨ੍ਹਾਂ ਆਵਦੀ ਕਿਤਾਬ "ਅੱਗ ਦੇ ਵਸਤਰ" "ਪਿਆਰੇ ਅਜ਼ੀਜ਼ ਅੰਮ੍ਰਿਤਪਾਲ ਨੂੰ ਮੋਹ ਨਾਲ"" ਲਿਖਕੇ ਭੇਂਟ ਕੀਤੀ ਸੀ । 15-9-12 ਦੀ ਗੱਲ ਆ ਏਹ। ਅੱਜ ਪਤਾ ਲੱਗੇਆ ਬੀ ਜੱਜ ਹੁਣੀਂ ਦੁਨੀਆਂ ਨੂੰ ਫਤੇਹ ਬੁਲਾਗੇ। ਖੇਤਾਂ ਦੇ ਡਾਂਡੇ ਮੀਂਡੇ ਰਾਹ ਪੈਕੇ ਸਫੈਦਿਆਂ ਵੱਲ ਲਹਿੰਦੇ ਸੂਰਜ ਬੰਨੀਂ ਤੁਰਗੇ । ਬਾਰੀ ਵਿੱਚਦੀ ਵੱਜੇ ਹਵਾ ਦੇ ਬੁੱਲ੍ਹੇ ਨਾ ਇੱਕ ਹੋਰ ਦੀਵਾ ਬੁਝ ਗਿਆ। ਜੱਜ ਹੋਣਾਂ ਦਾ ਇੱਕ ਸ਼ੇਅਰ ਚੇਤੇ ਆ

ਇਹ ਜੋ ਮੋਇਆ ਏ ਗੰਗਾ ਵਿੱਚ ਡੁਬਕੇ,
ਏਹਦੇ ਫੁੱਲ ਹੁਣ ਕਿੱਥੇ ਤਾਰੋਗੇ?
---------------------------------------------------------------------------------------------------------------------


ਫਿਲਮ ਹੈ ਈ ਗਲਤ ਸੀ ਜਰ। ਨਿਰਾ ਅੱਤਬਾਦ ਖਾੜਕੂਬਾਦ। ਨਾ ਦੂਜੂੰ ਗੀਤ ਨਾ ਬਾਕੀ ਸਿਰੇ ਦੋ ਅਰਥੇ ਡਾਈਲੌਗ।
ਡੱਕੇ ਦੇਗਾਂ ਦੇ ਨਹਿੰਗ ਧਰਮਕੀ ਫਿਲਮਾਂ ਬਣਾਉਣ ਬਹਿਗੇ । ਐਹੀ ਜੀਆਂ ਫਿਲਮਾਂ ਨੀਂ ਚੱਲਦੀਆਂ ਪਰਧਾਨ ਬਾਬੇਆਂ ਆਲੀਆਂ । ਫਿਲਮ ਈ ਕਾਹਦੀ ਜਰ ਜਿੰਨਾਂ ਚਿਕਰ ਸਮਾਰ ਕੇ ਲੱਤਾਂ 'ਚ ਲੱਤਾਂ ਨਾ ਪੈਣ। ਹਾਅ ਗੱਲਾਂ ਮੈਂ ਤਾਂ ਕਰਦਾ ਕਿਉਂਕੇ ਆਰ ਐੱਸ ਐੱਸ ਦਾ ਬੰਦਾਂ ਮੈਂ ਪੁਲਸ ਟਾਊਟ। ਡੈਡੀ ਕੂਲ ਮੁੰਡੇ ਫੂਲ ਲੱਗੂ ਨਾਲੇ ਸੋਡੇ ਤੇਜ਼ਾਬ ਆਲੇ ਜੱਸੀ ਜਸਰਾਜ ਦੀ ਜੇਹੜਾ ਐਂਰਕੀ ਨਿੱਕੀ ਤੇ ਸੈਂਟੀ ਹੋ ਗਿਆ। ਅਡਵਾਂਸ ਟਿਗਟਾਂ ਬੁੱਕ ਕਰਾਲੋ ਸਿਲਮੇ ਦੀਆਂ ਏਹ ਨੀਂ ਬੈਨ ਹੁੰਦੀਆਂ .....ਘੁੱਦਾ
--------------------------------------------------------------------------------------------------------------