ਸੁਣਿਆ ਕਨੇਡੇ ਸੈਟਲ ਹੋਗੀ

ਬਿਨ੍ਹਾਂ ਡੰਡੇ ਤੋਂ ਲੇਡੀ ਸੈਕਲ ਟੱਲੀ ਮਾਰਕੇ ਲੰਘਦੀ ਸੀ
ਪਿਨਸਲ ਘੜਨੇ ਖਾਤਰ ਤੂੰ ਘਾਟੂ ਸਾਥੋਂ ਮੰਗਦੀ ਸੀ
ਚੌੜ ਨਾ ਕਿੰਨੀ ਆਰੀ ਖੋਲ੍ਹੇ ਸੀ ਤੇਰੇ ਰੀਬਨ ਗੁੱਤਾਂ ਦੇ
ਸੂਈਆਂ ਘੁਕਾਕੇ ਨਾ ਕਦੇ ਮੁੜਨੇ ਵੇਲੇ ਉਹ ਰੁੱਤਾਂ ਦੇ
ਦਬਾਤ ਸ਼ਾਹੀ ਦੀ ਡੋਲ੍ਹ ਸਾਡੇ ਜੁੰਮੇ ਸ਼ਕੈਤਾਂ ਲਾਉਂਦੀ ਸੀ
ਸੁਣਿਆ ਕਨੇਡੇ ਸੈਟਲ ਹੋਗੀ ਜੇਹੜੀ ਸਾਨੂੰ ਚਾਹੁੰਦੀ ਸੀ

ਤੋੜ ਵਿੱਦਿਆ ਭੜਾਈ ਦੇ ਪੱਤੇ ਕੈਦੇ ਵਿੱਚ ਪਾਉਂਦੇ ਸੀ
ਪੀਰਡ ਡਰੈਂਗ ਦਾ ਪਹਾੜਾਂ ਪਿੱਛੇ ਸੂਰਜ ਬਣਾਉਂਦੇ ਸੀ
ਸਭ ਤੋਂ ਸੌਖਾ ਲੱਗਦਾ ਸੀ ਤੈਨੂੰ ਭਾਹੜਾ ਗਿਆਰਾਂ ਦਾ
ਤੈਥੋਂ ਉਲਟ ਮੈਥ 'ਚ ਸੀਗਾ ਹੱਥ ਟੈਟ ਨੀਂ ਜਾਰਾਂ ਦਾ
ਚਿੱਬੜ ਗੰਢੇ ਦੀ ਚਟਨੀ ਧਰ ਰੋਟੀ ਤੇ ਲਿਆਉਂਦੀ ਸੀ
ਸੁਣਿਆ ਕਨੇਡੇ ਸੈਟਲ ............

ਸਬਾਟਰ ਉਣਦੀ ਮੈਡਮ ਤੋਂ ਚੋਰੀਓਂ ਡੀਟੇ ਖੇਡਦੇ ਰਹੇ
ਡਲਾ ਮਾਰਕੇ ਭੂੰਡਾਂ ਦੇ ਖੱਖਰ ਨੂੰ ਜਾਣਕੇ ਛੇੜਦੇ ਰਹੇ
ਛੱਪੜ 'ਚ ਟੱਪੇ ਖਾਂਦੀ ਜਾਂਦੀ ਤੌੜੇ ਦੀ ਠੀਕਰੀ ਨੀਂ
ਕਿਤੇ ਪਿੰਡੇ ਤੇ ਫੌੜੇ ਨਿਕਲਣ ਕਦੇ ਸਿਰਚ ਸਿਕਰੀ ਨੀਂ
ਬਰਫ ਪਾਣੀ ਜਾ ਖੇਡਦੇ ਹੱਥ ਜਾਣਕੇ ਸਾਨੂੰ ਲਾਉਂਦੀ ਸੀ
ਸੁਣਿਆ ਕਨੇਡੇ ਸੈਟਲ ................

ਜਮਾਂ ਪਿਛੇ ਬੋਰੀ ਵਿਛਾਕੇ ਸੀ ਥਾਂ ਤੇਰੀ ਮਲੱਕੀ ਦੀ
ਬਿਨਾਂ ਮਗਰਾਟੋਂ ਸੀ ਸੈਕਲ ਫੀਲਿੰਗ ਲੈਣੀ ਬੱਕੀ ਦੀ
ਪੀਚੋ ਬੱਕਰੀ ਖੇਡਦਿਆਂ ਮੱਲਦੀ ਰੱਬ ਆਲੇ ਡੱਬੇ ਨੂੰ
ਪਿਆਰ ਕੱਢਣ ਖਾਤਰ ਵਰਤਦੀ ਚੂੜੀ ਦੇ ਟੋਟੇ ਲੱਭੇ ਨੂੰ
ਦਿਨ ਪੇਪਰਾਂ ਦੇ ਸੈਂਸ ਦੀਆਂ ਪਰੈਟੀਕਲਾਂ ਬਣਾਉਂਦੀ ਸੀ
ਸੁਣਿਆ ਕਨੇਡੇ ਸੈਟਲ ਹੋਗੀ ਜੇਹੜੀ ਸਾਨੂੰ ਚਾਹੁੰਦੀ ਸੀ.....ਘੁੱਦਾ