ਏਹਤੋਂ ਵੱਧਕੇ ਪਰਲੋ

ਮੂੰਹ ਜੋੜ ਸੀ ਗੱਲਾਂ ਕਰਦੇ ਚਰਚਾ ਹੋਗੀ ਸੱਥਾਂ ਤੇ
ਦਿੱਲੀ ਵੀ ਬਾਦਲ ਨੇ ਜਿੱਤਕੇ ਸਰ੍ਹੋਂ ਜਮ੍ਹਾਤੀ ਹੱਥਾਂ ਤੇ
ਜ਼ਿਮਨੀ ਚੋਣਾਂ ਦੀ ਖੁੰਢਚਰਚਾ ਮੋਗਾ ਸੁਰਖੀ 'ਖਬਾਰਾਂ ਦੀ
ਬੱਸ, ਮੋਟਰਾਂ ਵਿੱਚ ਖਤਰੇ ਇੱਜ਼ਤ ਲਹਿੰਦੀ ਨਾਰਾਂ ਦੀ
ਛੇ ਮੁੰਡੇ ਤੇ ਇੱਕ ਨਿਆਣੀ ਗੱਲ ਖੋਲ੍ਹ ਸੁਣਾਉਣੀ ਆ
ਏਹਤੋਂ ਵੱਧਕੇ ਪਰਲੋ ਨਿੱਕਿਆ ਦੱਸ ਕਿੱਥੋਂ ਆਉਣੀ ਆ

ਨੌਂ ਸਾਲਾਂ ਦੀ ਨੇ ਬੱਚਾ ਜੰਮਿਆ ਖਬਰ ਹੈ ਵਿਦੇਸ਼ ਦੀ
ਕਾਰਗਿਲ ਦੇ ਪੜਦੇ ਖੋਲ੍ਹੇ ਕਤਾਬ ਜਰਨਲ ਪ੍ਰਵੇਸ਼ ਦੀ
ਭਗਦੜ ਮੱਚੀ ਹੋਈਆਂ ਮੌਤਾਂ ਕਾਹਦੇ ਕੁੰਭ ਇਸ਼ਨਾਨ ਨੇ
ਮਲਾਲਾ ਨਿੱਕੀ ਦੇ ਖੋਪੜ ਮਾਰੀ ਗੋਲੀ ਤਾਲੀਬਾਨ ਨੇ
ਪੈਂਤੜਾ ਬਦਲੇ 'ਮਰੀਕਾ ਨਾਟੋ ਫੌਜ ਬੈਕ ਬੁਲਾਉਣੀ ਆ
ਏਹਤੋਂ ਵੱਧਕੇ ਪਰਲੋ ............................

ਆਰ ਡੀ ਐਕਸ ਦੀ ਗੱਡੀ ਵੜਗੀ ਦਫਤਰ ਸਰਕਾਰੀ ਨੂੰ
ਅਣਕਿਆਸੀ ਮੌਤੇ ਮਰਗੇ 'ਡੀਕਣਾ ਨਾ ਪਿਆ ਵਾਰੀ ਨੂੰ
ਬਰੂਦ ਹਿੱਕਾਂ ਨਾ ਬੰਨ੍ਹਿਆ ਚੋਬਰ ਮਨੁੱਖੀ ਬੰਬ ਬਣੇ
ਝੰਡੇ ਹੇਠਲੇ ਲੀਡਰ ਨੇ ਜੇਹੜੇ ਲੋਕਤੰਤਰ ਦੇ ਥੰਮ ਬਣੇ
ਇੱਕ ਬੰਦਾ ਫਾਹੇ ਲਾਤਾ ਉੱਤੋਂ ਦਫਾ ਚਤਾਲੀ ਲਾਉਣੀ ਆ
ਏਹਤੋਂ ਵੱਧਕੇ ਪਰਲੋ ...................

ਏਹ ਸਨ ਦੇਸ਼ ਵਿਦੇਸ਼ ਦੀਆਂ ਗੱਲਾਂ ਮੁੜੀਏ ਪੰਜਾਬ ਨੂੰ
ਮਾਝਾ ਸਮੈਕੀ ਮਾਲਵਾ ਪੋਸਤੀ ਦੁਆਬਾ ਪੀਂਦਾ ਸ਼ਰਾਬ ਨੂੰ
ਨੀਕਰ ਬਲੈਣਾਂ ਪਾ ਡਾਂਸਰਾਂ ਨੱਚਣ ਵਿਆਹ ਸਰਦਾਰਾਂ ਦੇ
ਵਧੀ ਮਹਿੰਗਾਈ ਸੌ ਦੀ ਥਾਂ ਚੱਲਣ ਹੁਣ ਨੋਟ ਹਜ਼ਾਰਾਂ ਦੇ
ਜੀਹਦੇ ਮਰਜ਼ੀ ਲੜਨ ਚਲੂਣੇ ਗੱਲ ਖਰੀ ਸੁਣਾਉਣੀ ਆ
ਏਹਤੋਂ ਵੱਧਕੇ ਪਰਲੋ ਨਿੱਕਿਆ ਦੱਸ ਕਿੱਥੋਂ ਆਉਣੀ ਆ.......ਘੁੱਦਾ