ਸੋਹਣੇ ਪਿੰਡ ਮਾਝੇ ਦੇ

ਪਿਛਲੇ ਦੋ ਤਿੰਨ ਦਿਨ ਮਾਝੇ ਦੇ ਪਿੰਡਾਂ 'ਚ ਘੁੰਮਦੇ ਰਹੇ ਆਂ। ਮਾਝੇ ਦਾ ਮਹੌਲ ਦੇਖਕੇ ਆਹ ਸੰਖੇਪ ਜੀ ਲਿਖਤ ਲਿਖੀ ਆ। ਪੜ੍ਹਿਓ ਗਹੁ ਨਾਲ
ਧੂੰਈਂ ਪਾ ਪਰਾਲੀ ਦੀ ਮਘੀਆਂ ਰਹਿਣ ਹਮੇਸ਼ਾ ਸੱਥਾਂ
ਕੰਮ ਲੈਂਦੇ ਬਲਦਾਂ ਦਾ ਝੋਟੇਆਂ ਨੂੰ ਪਾਕੇ ਨੱਥਾਂ
ਚਿੱਟੀ ਚਾਦਰ ਕੋਰੇ ਦੀ ਰੱਖਦੀ ਕੱਜਕੇ ਕਣਕਾਂ
ਪੈਰੀਂ ਝਾਂਜਰ ਚਾਵਾਂ ਦੀ ਵੇਹੜੇ ਵਿੱਚ ਪੈਂਦੀਆਂ ਛਣਕਾਂ
ਚਾਦਰੇ ਚਿੱਟੇ ਬਾਬਿਆਂ ਦੇ, ਬੰਨ੍ਹਦੇ ਪੱਗਾਂ ਲਾਕੇ ਮਾਵੇ
ਸੋਹਣੇ ਪਿੰਡ ਮਾਝੇ ਦੇ ਸਾਥੋਂ ਸਿਫਤ ਲਿਖੀ ਨਾ ਜਾਵੇ

ਕੁੱਪ ਲਿੰਬੇ ਤੂੜੀਆਂ ਦੇ ਰੱਖ ਸਿਖਰ ਤੇ ਬੋਦੀ
ਜੂੜੇ ਕੁੱਲ ਜਵਾਕਾਂ ਦੇ ਜੇਹੜੇ ਹਨ ਮਾਵਾਂ ਦੇ ਗੋਦੀ
ਮਾਰੇ ਪੁੱਤ ਚੁਰਾਸੀ ਨੇ ਘਰ ਘਰ ਟੰਗੀਆਂ ਤਸਵੀਰਾਂ
ਚਿਟਿਆਈ ਫੜ੍ਹਲੀ ਵਾਲਾਂ ਨੇ ਬਜ਼ੁਰਗ ਹੋਗੀਆਂ ਹੀਰਾਂ
ਹਨ ਬਾਹੀਆਂ ਸਾਹਲ ਦੀਆਂ ਮੋਟੇ ਗੋਲ ਮੰਜੇ ਦੇ ਪਾਵੇ
ਸੋਹਣੇ ਪਿੰਡ ਮਾਝੇ ਦੇ ..........

ਜੁੱਸੇ ਲਿੱਸੇ ਝੋਟੀਆਂ ਦੇ ਉੱਤੇ ਠੰਡ ਤੋਂ ਕੰਬਲ ਤਾਣੇ
ਲੰਮੇ ਚੋਲੇ ਸਿੰਘਾਂ ਦੇ ਸਿਰੀਂ ਦੁਮਾਲੇ ਨੀਲੇ ਬਾਣੇ
ਪਿੰਡ ਦੀ ਫਿਰਨੀ ਤੇ ਪਾਥੀਆਂ ਕੰਧਾਂ ਨਾਲ ਚਪੇਈਆਂ
ਤੇਲ ਲਾਉਂਦੇ ਸਰੋਆਂ ਦੇ ਪਾਟ ਜਾਣ ਪੈਰਾਂ ਦੀਆਂ ਵੇਈਆਂ
ਨਿਕਲੇ ਵਾਜ ਸਪੀਕਰ 'ਚੋਂ ਜੋਗਾ ਸਿੰਘ ਜੋਗੀ ਗਾਵੇ
ਸੋਹਣੇ ਪਿੰਡ ਮਾਝੇ ਦੇ.......ਘੁੱਦਾ