ਸ਼ੇਅਰ ਸ਼ੱਪਾ

ਓਹ ਅੰਬਰਾਂ ਵਿੱਚ ਉੱਡਣਾ ਚਾਹੁੰਦੀ ਸੀ,
ਮੈਂ ਪਿੰਜਰਾ ਬਣ ਗਿਆ ਉਹਦੇ ਲਈ,
ਉਹ ਸੁਪਣਾ ਸੀ ਉੱਚੇ ਮਹਿਲਾਂ ਦਾ,
ਮੈ ਜਿੰਦਰਾ ਬਣ ਗਿਆ ਉਹਦੇ ਲਈ,
ਉਹ ਚਾਨਣ ਸੀ ਸਿਖਰ ਦੁਪਹਿਰਾਂ ਦਾ,
ਮੈ ਰਾਹੀ ਸੀ  ਕਾਲੀਆਂ ਰਾਤਾਂ ਦਾ,
ਮੈਂ ਹੁੰਗਾਰਾ ਵੀ ਨਾ ਬਣ ਸਕਿਆ,
ਉਹਦੀਆਂ ਪਾਈਆਂ ਬਾਤਾਂ ਦਾ,
ਉਹ ਦਰਿਆ ਦੇ ਸ਼ੂਕਦੇ ਜਲ ਵਰਗੀ,
ਮੈਂ ਅੜਚਨ ਉਹਦੀਆਂ ਰਾਹਵਾਂ ਦਾ,
ਉਹ ਕੋਇਲ ਦੀ ਮਿੱਠੀ ਕੂਕ ਜਿਹੀ,
ਮੈਂ ਸਾਥੀ ਕਾਲੇ ਕਾਂਵਾਂ ਦਾ,
ਉਹ ਰੁੱਖ ਦੀ ਠੰਡੀ ਛਾਂ ਵਰਗੀ,
ਪਾਤਰ ਸੀ ਕਿਸੇ ਕਹਾਣੀ ਦਾ,
ਮੈਂ ਸ਼ਮਸ਼ਾਨ ਦੀ ਸੰਘਣੀ ਚੁੱਪ ਵਰਗਾ,
ਬੁੱਲਾ ਸੀ ਗਰਮ ਹਵਾਂਵਾਂ ਦਾ,
ਮੈਂ ਮਾਰੂਥਲ ਦੇ ਥੋਹਰ ਜਿਹਾ,
ਉਹ ਪੱਤਾ ਸੀ ਨਰਮ ਗੁਲਾਬਾਂ ਦਾ,
ਮੈਂ ਬੱਚੇ ਦੀ ਉੱਖੜੀ ਨੀਂਦ ਜਿਹਾ,
ਉਹ ਹਿੱਸਾ ਸੋਹਣੇ ਖੁਆਬਾਂ ਦਾ,
ਉਹ ਹੱਸਦੇ ਵੱਸਦੇ ਘਰ ਵਰਗੀ,
ਮੈਂ ਉੱਜੜੇ ਕਿਸੇ ਸੁਹਾਗ ਜਿਹਾ,
ਉਹ ਲਾਡ ਪਿਆਰ ਨਾਲ ਪਲੀ ਹੋਈ,
ਮੈਂ ਬਿਨ੍ਹਾਂ ਮਾਲਿਉ  ਬਾਗ ਜਿਹਾ,
ਚੰਗਾ ਹੋਇਆ ਮੈਨੂੰ ਛੱਡ ਤੁਰਗੀ,
ਮੈਂ ਕਾਤਿਲ ਸੀ ਉਹਦੇ ਚਾਵ੍ਹਾਂ ਦਾ,
ਰੱਬਾ ਉਹਨੂੰ ਖੁਸ਼ ਰੱਖੇ ਜੋ
ਸਾਥੀ ਬਣੇ ਉਹਦੇ ਸਾਹਵਾਂ ਦਾ......ਘੁੱਦਾ