ਛੰਦ ..ਜ਼ਖਮ ਨੂੰ ਡੋਲ ਮਾੜੀ

ਜ਼ਖਮ ਨੂੰ ਡੋਲ ਮਾੜੀ, ਬੇਵੱਸ ਨੂੰ ਕਲੋਲ ਮਾੜੀ
ਗੱਲ ਰੱਖੀ ਗੋਲ ਮਾੜੀ, ਮੁੱਢ ਹੈ ਲੜਾਈ ਦਾ

ਸਾਕ 'ਚ ਨਘੋਚ ਮਾੜੀ, ਰਾਹੀ ਪੈਰ ਮੋਚ ਮਾੜੀ
ਓਪਰੀ ਹੈ ਲੋਚ ਮਾੜੀ, ਘਰ ਨਹੀਂ ਗਵਾਈਦਾ

ਧੁੰਦ ਮਾੜੀ ਕਾਹਲੀ ਨੂੰ, ਘੌਲ ਮਾੜੀ ਹਾਲੀ ਨੂੰ
ਟਿੱਚਰ ਵੱਡੀ ਸਾਲੀ ਨੂੰ, ਰੋਹਬ ਨਹੀਂ ਘਟਾਈਦਾ

ਮਜ਼ਾਕ ਮਾੜਾ ਸੋਗੀ ਨੂੰ, ਵਹਿਮ ਮਾੜਾ ਰੋੋਗੀ ਨੂੰ
ਠਰਕ ਮਾੜਾ ਜੋਗੀ ਨੂੰ , ਜੋਗ ਨਹੀਂ ਕਮਾਈਦਾ

ਕਮਾਦ ਮਾੜਾ ਬੋੜੇ ਨੂੰ, ਰਿਸਣ ਮਾੜਾ ਫੋੜੇ ਨੂੰ
ਲੱਗਣ ਮਾੜਾ ਜੋੜੇ ਨੂੰ, ਪੈਰੀਂ ਨਾਹੀਂ ਪਾਈਦਾ

ਚੱਤੋਪੈਰ ਤਵਾਂ ਮਾੜਾ, ਔਂਤ ਪੈਸਾ ਜਮ੍ਹਾਂ ਮਾੜਾ
ਖੁੰਝਜੇ ਤਾਂ ਸਮਾਂ ਮਾੜਾ, ਮੋੜ ਨਹੀਂ ਲਿਆਈਦਾ

ਵੱਢਣ ਮਾੜਾ ਰੁੱਖ ਨੂੰ, ਲੁਕਾਉਣ ਮਾੜਾ ਦੁੱਖ ਨੂੰ
ਮਾੜਾ ਬਾਂਝਪਨ ਕੁੱਖ ਨੂੰ , ਵੰਸ਼ ਨਹੀਂ ਵਧਾਈਦਾ

ਭੰਗ ਦੀ ਲਪਟ ਮਾੜੀ, ਯਾਰ ਨੂੰ ਕਪਟ ਮਾੜੀ
ਠਾਣੇ 'ਚ ਰਪਟ ਮਾੜੀ, ਖਹਿੜਾ ਨਹੀਂ ਛੁਡਾਈਦਾ

ਕੁੱਬੇ ਸਿਰ ਪੰਡ ਮਾੜੀ, ਫੱਗਣ ਦੀ ਠੰਢ ਮਾੜੀ
ਲੱਕੜ 'ਚ ਗੰਢ ਮਾੜੀ, ਮੁੱਲ ਵਾਜਬ ਨੀਂ ਪਾਈਦਾ.....ਘੁੱਦਾ