ਕੀ ਕੀ ਮਾੜਾ....ਛੰਦ

ਟਾਹਲੀ ਮੁੱਢ ਭੌਣ ਮਾੜਾ, ਤਾਪ 'ਚ ਨਹਾਉਣ ਮਾੜਾ
ਠਾਣੇ 'ਚ ਬੁਲਾਉਣ ਮਾੜਾ, ਜੇ ਨਾ ਸੁਣਵਾਈ ਹੋਵੇ

ਐਬੀ ਘਰੇ ਜਾਣ ਮਾੜਾ ,ਸੇਮ 'ਚ ਮਕਾਨ ਮਾੜਾ
ਭੂਸ਼ਰਜੇ ਸਾਨ੍ਹ ਮਾੜਾ, ਜੇ ਨਾ ਨੱਥ ਪਾਈ ਹੋਵੇ

ਮਾੜੇ ਦਾ ਨਿਓਂਣਾ ਮਾੜਾ, ਰੱਜੇ ਨੂੰ ਰਜਾਉਣਾ ਮਾੜਾ
ਢੋਲ ਨੂੰ ਵਜਾਉਣਾ ਮਾੜਾ ,ਜੇ ਮਕਾਣ ਆਈ ਹੋਵੇ

ਟੁੱਟਜੇ ਤਾਂ ਕੰਡ ਮਾੜੀ, ਘਰਾਂ ਵਿੱਚ ਵੰਡ ਮਾੜੀ
ਛੜਿਆਂ ਨੂੰ ਠੰਢ ਮਾੜੀ, ਨਿੱਘੀ ਨਾ ਰਜਾਈ ਹੋਵੇ

ਹੋਜੇ ਸ਼ਾਹ ਕੰਗਾਲ ਮਾੜਾ, ਦੁੱਧ 'ਚ ਹੰਗਾਲ ਮਾੜਾ
ਸੰਦਾਂ ਨੂੰ ਜੰਗਾਲ ਮਾੜਾ, ਜੇ ਹੁੰਦੀ ਨਾ ਸੰਭਾਈ ਹੋਵੇ

ਗਮੀ 'ਚ ਸ਼ਿੰਗਾਰ ਮਾੜਾ, ਤੜਕੇ ਉਧਾਰ ਮਾੜਾ
ਦੋਂਹੀ ਪਾਸੀ ਬਾਰ ਮਾੜਾ, ਛੇਤੀ ਨਾ ਫੜ੍ਹਾਈ ਹੋਵੇ

ਬੁੱਢੇਵਾਹਰੇ ਸਾਕ ਮਾੜਾ, ਸੱਥ 'ਚ ਜਵਾਕ ਮਾੜਾ
ਚੋਰਾਂ ਨੂੰ ਖੜਾਕ ਮਾੜਾ,ਜੇ ਹੁੰਦੀ ਪੈਰਵਾਈ ਹੋਵੇ

ਜ਼ਖਮਾਂ ਤੇ ਲੂਣ ਮਾੜਾ, ਇਕਪਾਸੜ ਕਨੂੰਨ ਮਾੜਾ
ਧਰਮੀ ਜਨੂੰਨ ਮਾੜਾ,ਬੇਅਥਾਹ ਤਬਾਹੀ ਹੋਵੇ.....ਘੁੱਦਾ