ਬੈਂਤ

ਮੱਤ ਨਾ ਸਿਆਣੇ ਜੈਸੀ, ਚੌੜ ਨਾ ਨਿਆਣੇ ਜੈਸੀ
ਬੁੱਕਤ ਨਾ ਲਾਣੇ ਜੈਸੀ , ਜੇ ਥਬਾਕ ਰਹਿ ਜਵੇ

ਤਾਅ ਨਾ ਹੈ ਚੁੱਲ੍ਹੇ ਜੈਸਾ, ਸੂਫੀ ਨਾ ਕੋਈ ਬੁੱਲ੍ਹੇ ਜੈਸਾ
ਸੂਰਮਾ ਨਾ ਦੁੱਲੇ ਜੈਸਾ, ਹਿੱਕ ਉੱਤੇ ਬਹਿ ਜਵੇ

ਗਮ ਨਾ ਜੁਦਾਈ ਜੈਸਾ, ਨਿੱਘ ਨਾ ਰਜਾਈ ਜੈਸਾ
ਨਾ ਅੜਬ ਜਵਾਈ ਜੈਸਾ, ਜੇ ਕਲੇਸ ਪੈ ਜਵੇ

ਕਲੰਕ ਨਾ ਰਖੈਲ ਜੈਸਾ, ਸਿਦਕੀ ਨਾ ਬੈਲ ਜੈਸਾ
ਮਿੱਠਬੋਲੜਾ ਮਝੈਲ਼ ਜੈਸਾ, ਕਾਲਜੇ 'ਚ ਲਹਿ ਜਵੇ

ਪਿਆਰ ਨਾ ਭਰਾਵਾਂ ਜੈਸਾ, ਫਿਕਰ ਨਾ ਮਾਵਾਂ ਜੈਸਾ
ਪਿੰਡ ਦਿਆਂ ਰਾਹਵਾਂ ਜੈਸਾ ਮੋਹ ਨਾ ਜੇ ਪੈ ਜਵੇ

ਭਾਰ ਨਾ ਸ਼ਤੀਰੀ ਜੈਸਾ, ਨਾ ਰੁਤਬਾ ਫਕੀਰੀ ਜੈਸਾ
ਬੋਲ ਨਾ ਟਟੀਹਰੀ ਜੈਸਾ, ਜੇ ਕੰਨੀਂ ਕਿਤੇ ਪੈ ਜਵੇ

ਦੁੱਖ ਨਾ ਯਤੀਮ ਜੈਸਾ, ਸਖੀ ਨਾ ਹਕੀਮ ਜੈਸਾ
ਵੈਲ ਨਾ ਅਫੀਮ ਜੈਸਾ, ਹੱਡਾਂ ਵਿੱਚ ਬਹਿ ਜਵੇ

ਝੋਰਾ ਨਾ ਬਿਮਾਰੀ ਜੈਸਾ, ਤੇਜ਼ ਨਾ ਸ਼ਿਕਾਰੀ ਜੈਸਾ
ਨਾ ਚਸਕਾ ਜੁਆਰੀ ਜੈਸਾ, ਘਰ ਪਿੱਛੇ ਲੈ ਜਵੇ.......ਘੁੱਦਾ