ਸਾਥੋੰ ਕਿਹੜੀ ਰੁੱਤੇ ਦੂਰ ਹੋਇਆੰ ਹੀਰਿਆ
ਭੈੜਾ ਚੱਲਿਆ ਵਲੈਤਾੰ ਦਾ ਰਿਵਾਜ਼ ਵੇ
ਕਹਿਣ ਪਾਸਪੋਰਟ ਨਿੱਕੀ ਜਿਹੀ ਕਾਪੀ ਨੂੰ
ਪਾਕੇ ਜੇਬ ਵਿੱਚ ਚੜ੍ਹਿਆ ਜ਼ਹਾਜ ਵੇ
ਸੀਗੇ ਰੋਟੀ ਜੋਗੇ ਏਥੇ ਵੀ ਤਾੰ ਸੋਹਣਿਆ
ਸੀ ਖਰੀਦਣੇ ਕੀ ਹੋਰ ਆਪਾੰ ਤਾਜ ਵੇ
ਇੱਕ ਵੀ ਨਾ ਮੰਨੀੰ ਮੇਰੀ ਹਾਣੀਆ
ਚੰਗੀ ਰੱਖੀ ਆ ਤੂੰ ਵੈਰੀਆ ਲਿਹਾਜ਼ ਵੇ
ਮੁੜ ਆਇਆ ਸ਼ਾਮੀੰ ਕੱਲ੍ਹ ਮੰਡੀਓੰ
ਬਾਪੂ ਤੇਰਾ ਵੇਚਕੇ ਅਨਾਜ ਵੇ
ਮੂਲ ਵੀ ਨਾ ਲਹਿੰਦੇ ਓਦੋੰ ਹੀਰਿਆ
ਜਦੋੰ ਲੱਗਦੇ ਵਿਆਜਾੰ ਨੂੰ ਵਿਆਜ ਵੇ
ਨਵੇੰ ਜਏ ਬਰੈੰਡ ਪਾਉਣ ਵਾਲਿਆ
ਤੇਰੇ ਕੁੜਤੇ ਨੂੰ ਕਰਾੰ ਹਜੇ ਕਾਜ ਵੇ
ਪੱਗ ਬੰਨ੍ਹੇ ਤੇਰਾ ਪੁੱਤ ਸਵਾ ਸੱਤ ਦੀ
ਤੇਰੀ ਧੀ ਜੋਗਾ ਜੋੜੀ ਜਾਵਾੰ ਦਾਜ ਵੇ
ਖੋਲ੍ਹ ਗੁੱਤ ਮੈੰ ਵੀ ਜੂੜਾ ਵਲ੍ਹਿਆ
ਮੈੰ ਵੀ ਹੋਗੀ ਹੁਣ ਉਮਰ ਦਰਾਜ਼ ਵੇ
ਮੈੰ ਵੀ ਆਖਣਾੰ ਨਹੀੰ ਆਪੇ ਓਦੋੰ ਮੁੜਪੀੰ
ਜਦੋੰ ਪੂਰੀ ਹੋਗੀ ਡਾਲਰਾੰ ਦੀ ਭਾਜ ਵੇ .......ਘੁੱਦਾ
No comments:
Post a Comment