ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ

ਗੱਲ ਹੁੰਦੀ ਸੱਥਾਂ ਤੇ ਪਿੰਡ ਵਿੱਚ ਰੌਲਾ ਪੈ ਗਿਆ
ਨਪੜ੍ਹ ਜਾ ਜੱਟ ਸਿਧਰਾ ਮੈਨੂੰ ਲਬਜੂ ਕਹਿ ਗਿਆ
ਖੇਹ ਕਰਾਲੀ ਸਖੀਆਂ 'ਚ ਨੀਂ ਮੈਂ ਲੂੰਬੜ ਜੇ ਨਾ ਲਾਕੇ
ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ ਗਿਆ ਤੀਆਂ ਵਿੱਚ ਫੜ੍ਹਾਕੇ

ਮੈਂ ਪੱਥਾਂ ਪਾਥੀਆਂ ਨੀਂ ਉਹ ਵਾੜੇ ਮੂਹਰੇ ਗੇੜੇ ਮਾਰੇ
ਖੜ੍ਹ ਮੋੜਾਂ ਉੱਤੇ ਨੀ ਚੋਬਰ ਬਿੜਕਾਂ ਲੈਂਦੇ ਸਾਰੇ
ਚਿੱਤ ਕੰਬਦਾ ਹਾਥੀ ਦੇ ਕੰਨ ਵੰਗੂ ਕੀ ਦੱਸਾਂ ਮਾਂ ਨੂੰ ਜਾਕੇ
ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ ਗਿਆ ਤੀਆਂ ਵਿੱਚ ਫੜ੍ਹਾਕੇ

ਕੱਲ੍ਹ ਗਦੈਲੇ ਭਰਾਉਣ ਗਈ ਮੈਂ ਤਾੜੇ ਆਲੇ ਭਾਈ ਕੋਲੋਂ
ਬੈਠਾ ਖਤ ਕੱਢੇ ਦਾਹੜੀ ਦੇ ਮੋਚਨਾ ਲੈ ਕੇ ਨਾਈ ਕੋਲੋਂ
"ਹੋਅਅ ਥੋਡੀ ਭਾਬੀ ਓਏ" ਆਖੇ ਮੁੰਡਿਆਂ ਨੂੰ ਮੈਨੂੰ ਸੁਣਾਕੇ
ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ ਗਿਆ ਤੀਆਂ ਵਿੱਚ ਫੜ੍ਹਾਕੇ

ਪਿਛਲੇ ਮਹੀਨੇ ਦਿੱਤਾ ਸੀ ਕਮੀਜ਼ ਪਜਾਮਾ ਸਿਓਂ ਕੇ
ਕੱਛ ਦੇਹੜਲੀ ਕੁੜਤੇ ਦੀ ਪੰਡ ਚੱਕਣ ਲੱਗਾ ਸੀ ਨਿਓਂ ਕੇ
ਭਨਾ ਸੁਨਿਆਰ ਤੋਂ ਨੱਤੀਆਂ ਨੀਂ ਦੇਗਿਆ ਪਿੱਪਲ ਪੱਤੀਆਂ ਘੜਾਕੇ
ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ ਗਿਆ ਤੀਆਂ ਵਿੱਚ ਫੜ੍ਹਾਕੇ

ਸ਼ਰਦਈ ਜਾ ਸੂਟ ਕਹਿੰਦਾ ਤੇਰੇ ਬਰਡੇ ਤੇ ਗਿਪਟ ਕਰਨਾ
ਹਾਂ ਪੰਚੈਤ 'ਚ ਆਖ ਦਈਂ ਕਹਿੰਦਾ ਤੇਰੇ ਬਿਨ ਨੀਂ ਸਰਨਾ
ਹਿੰਡ ਪੈ ਗਿਆ ਜਬਾਕਾਂ ਬੰਗੂ ਨੀਂ ਆਖੇ ਛੱਡੂ ਹਾਂ ਕਰਾਕੇ
ਮੱਸਿਆ ਤੋਂ ਲਿਆਕੇ ਚੂੜ੍ਹੀਆਂ ਨੀਂ ਗਿਆ ਤੀਆਂ ਵਿੱਚ ਫੜ੍ਹਾਕੇ......ਘੁੱਦਾ