ਸੋਸ਼ਲ ਮੀਡੀਆ

ਪਹਿਲੋ ਪਹਿਲ ਔਰਕੁੱਟ ਜ਼ਰੀਏ ਨੈੱਟ ਨਾਲ ਵਾਹ ਪਿਆ।  ਸਕਰੈਪ ਹੁੰਦੇ ਸੀ। ਫੇਰ ਫੇਸਬੁੱਕ ਦਾ ਦੌਰ ਆਇਆ। ਟਵਿੱਟਰ, ਵੱਟਸਅੱਪ, ਇੰਸਟਾਗਰਾਮ ਚੱਲੇ ਤੇ ਦੁਨੀਆੰ ਉਲਝਗੀ।  ਮੁਲਖ ਟੱਬਰ ਨਾਲੋੰ ਵੱਧ ਸਮਾੰ ਸੋਸ਼ਲ ਮੀਡੀਏ ਨੂੰ ਦਿੰਦਾ। ਕੋਲ ਬੈਠੇ ਬੰਦੇ ਨਾਲ ਗੱਲਾੰ ਕਰਨ ਦੀ ਬਜਾਏ ਚੈਟ 'ਚ ਬੈਠੇ ਬੰਦੇ ਨੂੰ ਵੱਧ ਤਵੱਜੋੰ ਦਿੱਤੀ ਜਾੰਦੀ ਆ। ਅੱਗੇ ਵਿਆਹਾੰ ਪਰੋਗਰਾਮਾੰ ਤੇ ਜਾਕੇ ਰਿਸ਼ਤੇਦਾਰ ਮਿਲਦੇ ਤੇ ਪੁੱਛਦੇ,"ਫੂਲ ਆਲਾ ਫੁੱਫੜ ਨੀੰ ਦੀੰਹਦਾ ਕਿਤੇ, ਫਲਾਣੀ ਮਾਸੀ ਕਿੱਥੇ ਆ ਮਿਲੀ ਨੀੰ"। ਹੁਣ ਅਗਲਾ ਜਾਣਸਾਰ ਇਹ ਦੇੰਹਦਾ ਬੀ ਕਿਹੜੀ ਥੌੰ ਖੜ੍ਹਕੇ ਫੋਟੋ ਵਧੀਆ ਆਊ। ਪੰਜ ਸੱਤ ਜਣੇ ਲੈਨੋਬਾਰ ਖੜ੍ਹਾਕੇ ਆਖਣਗੇ ਚਲੋ ਸਲਫੀ ਲੈ ਲੀਏ ਕੇਰਾੰ। 

ਨਿੱਕਾ ਜਵਾਕ ਪਿਓ ਦੇ ਢਿੱਡ ਤੇ ਬੈਠਾ ਚੌੜ ਕਰੀ ਜਾੰਦਾ ਹੋਊ ਤੇ ਪਿਓ 'ਗਾਹਾੰ ਕਿਸੇ ਹੋਰ ਮਾੰ ਨਾਲ ਚੈਟ ਤੇ ਲੱਗਾ ਬਾ ਹੁੰਦਾ। ਸਟੇਟਸ ਚਾੜ੍ਹਨਗੇ ਅਕੇ,"ਮਾੰ ਬੋਲੀ ਨੂੰ ਖਤਰਾ"। ਖਤਰਾ ਆਪੇ ਈ ਆ ਜਦੋੰ ਜਵਾਕਾੰ ਨੁੂੰ ਟੈਮ ਨਾ ਦਿੱਤਾ। 

ਥੋਡੇ ਸਟੇਟਸ ਜਾੰ ਫੋਟੋ ਤੇ ਕਿੰਨੇ ਹਜ਼ਾਰ ਲਾਈਕ ਜਾੰ ਕਮਿੰਟ ਆਉੰਦੇ ਆ, ਇਹ ਗੱਲ ਮਾਇਨੇ ਨਹੀੰ ਰਖਦੀ। ਥੋਨੂੰ ਪਿੰਡ 'ਚੋੰ ਲੰਘਦਿਆੰ ਨੂੰ ਕਿੰਨੇ ਬੰਦੇ ਹੱਥ ਖੜ੍ਹਾ ਕਰਕੇ ਚਾਹ ਪੁੱਛਦੇ ਨੇ ਇਹ ਗੱਲ ਵੱਧ ਖਾਸ ਆ।  ਰਿਸ਼ਤੇਦਾਰ ਘਰੇ ਮਿਲਣ ਆਉੰਦਾ। ਜੰਤਾ ਆਵਦਾ ਫੂਨ ਕੱਢਕੇ ਫੇਸਬੁੱਕ ਖੋਲ੍ਹਕੇ ਬਹਿ ਜਾੰਦੀ ਆ। ਅਗਲਾ ਕੋਚਰੀ ਅੰਗੂ ਝਾਕੀ ਜਾੰਦਾ ਹਾਰਕੇ ਤਲੇ ਕਾਜੂਆੰ ਨਾ ਬੱਤਾ ਪੀਕੇ ਮੁੜ ਜਾੰਦਾ। ਸਾਰਿਆੰ ਨੂੰ ਅਹਿਮੀਅਤ ਦਿਓ। ਤਕਨੌਜਲੀ ਨਹੀੰ ਮਾੜੀ, ਵਰਤਣ ਦਾ ਤਰੀਕਾ ਮਾੜਾ

ਜੰਤਾ ਪਾਲਸ਼ਾ ਵੀ ਬਾਹਲੀਆੰ ਮਾਰਦੀ ਆ। ਰਾਹ ਜਾੰਦੇ ਫੇਸਬੁੱਕੀਏ ਨੂੰ ਦੂਜਾ ਫੇਸਬੁੱਕੀਆ ਟੱਕਰਜੇ , ਓਹਦੇ ਨਾਲ ਪੰਜ ਸੱਤ ਮਿੰਟ ਗੱਲਾੰ ਕਰਕੇ, ਫੋਟੋ ਖਿੱਚਕੇ ਨੈੱਟ ਤੇ ਪਾਕੇ ਨਾਲ ਲਿਖਣਗੇ ,"ਅੱਜ ਫਲਾਣਾ ਬਾਈ ਟੱਕਰਿਆ ਬਹੁਤ ਕੁਸ ਸਿੱਖਣ ਨੂੰ ਮਿਲਿਆ"। ਪੰਜਾੰ ਸੱਤਾੰ ਮਿੰਟਾੰ 'ਚ ਖੌਣੀ ਕਿਹੜਾ ਰਿਗਵੇਦ ਸਿਖਾ ਜਾੰਦੇ ਆ ਏਹੇ.....ਘੁੱਦਾ