ਕੌਮ ਕਾਹਦੀ ਭੁੱਲੇ ਜੇਹੜੀ ਇਤਿਹਾਸ ਨੂੰ

ਕਾਸਦਾ ਲਲਾਰੀ ਜੀਹਦਾ ਰੰਗ ਲਹਿ ਗਿਆ
ਕਾਹਦਾ ਉਹ ਨਚਾਰ ਜੇਹੜਾ ਸੰਗ ਬਹਿ ਗਿਆ
ਗੱਲ ਰਾਹ ਨਾ ਪਾਵੇ ਉਹ ਵਕੀਲ ਕਾਸਦਾ
ਆਸ਼ਕ ਉਹ ਕਾਹਦਾ ਜੋ ਸ਼ੌਕੀਨ ਮਾਸਦਾ
ਹੁਸਨ ਈ ਕਾਹਦਾ ਜੇ ਹੰਕਾਰ ਹੋ ਗਿਆ
ਭੇਤ ਕਾਹਦਾ ਜੇਹੜਾ ਜੱਗ ਜ਼ਾਹਰ ਹੋ ਗਿਆ
ਕਾਸਦਾ ਵਿਚੋਲਾ ਜੇ ਗੱਲ ਪੂਰੀ ਖੋਲ੍ਹਜੇ
ਸੌਕਣ ਉਹ ਕਾਹਦੀ ਜੇਹੜੀ ਘੱਟ ਬੋਲਜੇ
ਪੁੱਤ ਕਾਹਦਾ ਮਾਪਿਆਂ ਦੀ ਮੰਨੇ ਇੱਕ ਨਾ
ਵਿਛੋੜਾ ਕਾਹਦਾ ਮਿਲਣ ਦੀ ਹੋਵੇ ਸਿੱਕ ਨਾ
ਪਾਠੀ ਕਾਹਦਾ ਉੱਠਣ ਦੀ ਘੌਲ ਕਰਜੇ
ਕਾਸਦੀ ਜਵਾਨੀ ਜੀਹਦਾ ਖੂਨ ਠਰਜੇ
ਮੌਤ ਕਾਹਦੀ ਜੀਹਦਾ ਕੋਈ ਮਨਾਵੇ ਸੋਗ ਨਾ
ਵੈਦ ਕਾਹਦਾ ਜੇਹੜਾ ਕੱਟ ਸਕੇ ਰੋਗ ਨਾ
ਸੀ ਸ਼ਹਿ ਸਰਕਾਰੀ ਹੇਠ ਵਾਪਰੀ ਤ੍ਰਾਸਦੀ
ਕਰੇ ਇਕਤਰਫੇ ਨਿਆਂ ਸਰਕਾਰ ਕਾਸਦੀ
ਘੁੱਦੇ ਚੋਬਰ ਹਜ਼ਾਰਾਂ ਫਾਹੇ ਚੜ੍ਹੇ ਕਾਸ ਨੂੰ
ਕੌਮ ਕਾਹਦੀ ਭੁੱਲੇ ਜੇਹੜੀ ਇਤਿਹਾਸ ਨੂੰ