ਅਕਾਲ ਤਖਤ ਸਾਹਬ

ਸ੍ਰੀ ਅਕਾਲ ਤਖਤ ਸਾਹਬ। ਗੱਲ ਤਾਂ ਕੁਛ ਵੀ ਨਹੀਂ। ਜੇ ਅਕਾਲ ਤਖਤ ਸ਼ੀਮੈਂਟ, ਬੱਜਰੀ, ਇੱਟਾਂ, ਸਰੀਏ ਨਾਲ ਬਣੀ ਸਿਰਫ ਇਮਾਰਤ ਈ ਹੁੰਦੀ ਤਾਂ ਗੱਲ ਕਦੋਂ ਦੀ ਭੁੱਲ ਭੁਲਾ ਜਾਂਦੇ। ਦਸ ਜਮਾਤਾਂ ਪਾਸ ਕਰਕੇ ਚਾਰ ਹੋਰ ਕਿਤਾਬਾਂ ਪੜ੍ਹਕੇ ਜਦੋਂ ਕੋਈ ਆਵਦੀ ਵਿਦਵਤਾ ਦੇ ਹੰਕਾਰ 'ਚ ਅਕਾਲ ਤਖਤ ਸਾਹਬ ਬਾਰੇ ਉੱਚਾ ਨੀਮਾਂ ਬੋਲਦਾ ਤਾਂ ਇਓਂ ਲੱਗਦਾ ਜਿਮੇਂ ਕਿਸੇ ਨੇ ਚਾਰ ਬੰਦੇਆਂ ਦੀ ਸਾਨੂੰ ਭੈਣ ਦੀ ਗਾਲ੍ਹ ਕੱਢੀ ਹੋਵੇ।
ਛੇ ਜੂਨ , ਉੱਨੀ ਸੌ ਚੁਰਾਸੀ। ਗੱਲ ਏਥੇ ਵੀ ਨਹੀਂ ਮੁੱਕੀ।
ਜਦੋਂ ਯੂਪੀ , ਦਿੱਲੀ ਬੰਨੀਂ ਗਏ ਹੋਈਏ ਤਾਂ ਓਧਰਲੇ ਬੰਦੇ ਮੂੰਹ 'ਚ ਸੌ ਗਰਾਮ ਤਲਬ ਚੱਬਕੇ ਸਿੱਖ ਦੇ ਪੈਰ ਲਿਵੇ ਥੁੱਕ ਦੀ ਪਿਚਕਾਰੀ ਮਾਰਨਗੇ ਨਾਲੇ ਆਖਣਗੇ ,"ਏ ਸਰਦਾਰ ਦਿਖਤਾ ਨਈਂ ਕਿਆ"?
ਚਾਂਦਨੀ ਚੌਂਕ ਉੱਤਰਕੇ ਜਦੋਂ ਗੁਰਦੁਆਰਾ ਸੀਸ ਗੰਜ ਵੱਲ ਨੂੰ ਜਾਈਦਾ ਤਾਂ ਬੇਹੱਦ ਟਰੈਫਿਕ ਹੁੰਦੀ ਆ। ਭੀੜ ਭੜੱਕ , ਧੱਕਾ- ਮੁੱਕੀ ਵੇਖਕੇ ਸੋਚੀਦਾ ਬੀ ਪਰਧਾਨ ਰੱਬ ਨਾ ਕਰੇ ਜੇ ਹੁਣ ਫੇਰ ਚੁਰਾਸੀ ਵਾਪਰਦਾ ਤਾਂ ਸਿੱਖਾਂ ਦੇ ਬਚਣ ਨੂੰ ਥਾਂ ਅੱਜ ਵੀ ਹੈਨੀ।
ਭਾਰਤ ਮਾਂ ਦੇ ਮਤੇਏ ਪੁੱਤ ਪੰਜਾਬ ਨਾਲ ਦਰਿਔਤ ਈ ਹੁੰਦੀ ਆ । ਪੰਜਾਬ ਦਾ ਬੰਦਾ ਬਾਹਰਲੇ ਸੂਬੇ 'ਚ ਜ਼ਮੀਨ ਲੈਕੇ ਪੋਲੇ ਪੈਰੀਂ ਆਵਦੇ ਨਾਂ ਨਈਂ ਕਰਾ ਸਕਦਾ । ਪਰ ਪੰਜਾਬ ਨੂੰ ਜੇਹੜਾ ਮਰਜ਼ੀ ਬੈਅ ਖਰੀਦਲੇ। ਕੇਂਦਰ ਸ਼ਾਸ਼ਿਤ ਪ੍ਰਦੇਸ਼ ਚੰਡੀਗੜ੍ਹ ਦੀਆਂ ਭਰਤੀਆਂ ਵਿੱਚ ਪੰਜਾਬ ਮੁਕਾਬਲੇ ਹਰਿਆਣੇ ਨੂੰ ਪਹਿਲ ਆ। ਅਸੀਂ ਹਰਿਆਣੇ ਖਿਲਾਫ ਨਹੀਂ ਪਰ ਪੰਜਾਬ ਵਿਚਾਰਾ ਕਿੱਥੇ ਜਾਵੇ ਰੁਜ਼ਗਾਰ ਖਾਤਰ।
ਤਾਂਹੀ ਕਿਹਾ ਗੱਲ ਉੱਨੀ ਸੌ ਚੁਰਾਸੀ ਤੇ ਨਹੀਂ ਮੁੱਕਦੀ, ਘੱਲੂਘਾਰੇ ਜਾਰੀ ਨੇ।
ਨਾਨਕ ਭਲੀਆਂ ਕਰੇ ,ਫੇਰ ਓਹੀ ਸਮਾਂ ਨਾ ਆਵੇ ਬੀ ਪੰਜਾਬ ਦੇ ਗੱਭਰੂਆਂ ਦੇ ਪਿੰਡੇ ਤੇ ਕਮਾਦਾਂ ਦੇ ਚੀਰ ਪੈਣ, ਤਾੜ ਤਾੜ ਚੱਲਦੇ ਫੈਰਾਂ ਦੇ ਖੜ੍ਹਾਕ ਮਾਵਾਂ ਨੂੰ ਨਾ ਸੁਨਣੇ ਪੈਣ। ਕੱਲੇ ਪੰਜਾਬ ਦਾ ਨਹੀਂ ਸਰਬੰਸਦਾਨੀ ਸਰਬੱਤ ਦਾ ਭਲਾ ਕਰੇ....ਘੁੱਦਾ