ਪੱਟਿਆ ਆਪਣੇ ਵਰਗੀ ਦਾ

ਇੱਕ ਸੀ ਤਖਤ ਹਜ਼ਾਰੇ ਤੋਂ, ਤੇ ਇੱਕ ਦਾਨਾਬਾਦ ਦਾ ਜਾਇਆ
ਇੱਕ ਵੱਢਿਆ ਜੰਡ ਹੇਠਾਂ ਤੇ ਦੂਜਾ ਕੰਨ ਪੜਵਾਕੇ ਆਇਆ
ਕਿੱਸੇ ਹੋਰ ਸੁਣਾਵਾਂ ਨੀਂ ,ਜਰਾ ਕਰਨਾ ਗੌਰ ਰਕਾਨੋਂ
ਪੱਟਿਆ ਆਪਣੇ ਵਰਗੀ ਦਾ ਨੀਂ ਇੱਕ ਤੁਰ ਗਿਆ ਹੋਰ ਜਹਾਨੋ

ਕਮਲੀ ਸੀ ਸੱਸੀ ਨੀਂ , ਯਾਰੀ ਰਾਹੀਆਂ ਦੇ ਨਾਲ ਲਾਈ
ਮਾਰੂਥਲ ਵਿੱਚ ਲੱਭਦੀ ਰਹੀ ਦੇਵੇ 'ਡਾਰ ਨਾ ਕਿਤੇ ਦਿਖਾਈ
ਪੂਰੇ ਕਰਤੇ ਸੋਹਣੀ ਨੇ , ਜੋ ਸੀ ਕੀਤੇ ਕੌਲ ਜ਼ੁਬਾਨੋਂ
ਪੱਟਿਆ ਆਪਣੇ ਵਰਗੀ ਦਾ ........

ਮੱਤ ਮਾਰੀ ਹੁਸਨਾਂ ਨੇ, ਨੀਂ ਬਣਦੇ ਯਾਰ ਪਿਆਰੇ ਵੈਰੀ
ਫੇਰ ਮਸਲੇ ਸੁਲਝਾਉਦੇਂ ਨੇ ਨੀਂ ਜਾਕੇ ਥਾਣੇ ਕਦੇ ਕਚੈਹਰੀ
ਪਰ ਕਿੱਥੋਂ ਮੁੜਦੇ ਨੇ, ਨੀਂ ਜੋ ਨਿਕਲੇ ਤੀਰ ਕਮਾਨੋਂ
ਪੱਟਿਆ ਆਪਣੇ ਵਰਗੀ ਦਾ .................

ਹੋਕੇ ਬਾਗੀ ਦੁਨੀਆਂ ਤੋਂ ਨੀਂ ਸੁਣਿਆ ਪੈਂਦਾ ਇਸ਼ਕ ਪੁਗਾਉਣਾ
ਜੋਬਨ ਰੁੱਤ ਦੀਆਂ ਲੱਗੀਆਂ ਨੂੰ ਘੁੱਦਿਆ ਸੌਖਾ ਨਹੀਂ ਨਿਭਾਉਣਾ
ਹੱਥ ਰਹਿ ਗਈਆਂ ਡੋਰਾਂ ਨੇ ਗੁੱਡੀਆਂ ਟੁੱਟੀਆਂ ਨੀਂ ਅਸਮਾਨੋਂ
ਪੱਟਿਆ ਆਪਣੇ ਵਰਗੀ ਦਾ ..........