ਲੋਕ- ਤੱਥ

ਧੀ ਦੇ ਸਹੁਰੀਂ ਜਾਕੇ ਐਵੇਂ ਮੱਤਾਂ ਦਈਏ ਨਾ
ਗੱਲ ਗੱਲ ਉੱਤੇ ਬਹੁਤਾ ਜੀ ਜੀ ਕਹੀਏ ਨਾ
ਗਹਿਣਾ ਗੱਟਾ ਪਹਿਣ ਕੇ ਨਾ ਮੇਲੇ ਵੜੀਏ
ਨਾ ਭਾਈਆਂ ਬਿਨ੍ਹਾਂ ਸਰੇ ਭਾਵੇਂ ਨਿੱਤ ਲੜੀਏ
ਸਦਾ ਲੋੜ ਤੋਂ ਵਧੇਰੇ ਬੋਝੇ ਪੈਸੇ ਰੱਖੀਏ
ਦਾਰੂ ਦੇ ਪਿਆਕ ਦਾ ਨਾ ਜੂਠਾ ਚੱਖੀਏ

ਲਾਗੀ ਕੰੰਮੀ ਖੁਸ਼ੀ ਤੇ ਨਾ ਖਾਲੀ ਮੋੜੀਏ
ਗੁਰੂ ਦੀ ਹਜ਼ੂਰੀ 'ਚ ਨਾ ਗੱਪ ਰੋੜ੍ਹੀਏ
ਪੱਟੀਏ ਨਾ ਘਰ ਨੂੰ ਬਿਗਾਨੀ ਝਾਕ 'ਤੇ
ਵਿਗੜੂ ਨਿਆਣਾ ਰੱਖੀਏ ਨਾ ਢਾਕ ਤੇ
ਤੋਰ ਆਪਣੀ ਵਿਗਾੜੀਏ ਨਾ ਵੇਖ ਮੋਰਾਂ ਦੀ
ਭਰੀਏ ਨਾ ਜਾਮਨੀ ਜੀ ਵੈਲੀ, ਚੋਰਾਂ ਦੀ
ਘੜੀ ਬਿਨਾਂ ਖੇਤ ਪਾਣੀ ਲਾਉਣ ਜਾਈਏ ਨਾ
ਕਰ ਅਹਿਸਾਨ ਦੁੱਖ 'ਚ ਜਤਾਈਏ ਨਾ
ਪੋਹ ਦੇ ਮਹੀਨੇ ਨਾ ਕੁਵੇਲੇ ਤੁਰੀਏ
ਲੰਘ ਗੇ ਸਮੇਂ ਨੂੰ ਬਹੁਤਾ ਨਾ ਝੁਰੀਏ
ਸਾਧ ਡੇਰੇ ਘੱਲੀਏ ਨਾ ਧੀ ਕਵਾਰੀ ਨੂੰ
ਰਕਮ ਉਧਾਰੀ ਦਈਏ ਨਾ ਜੁਆਰੀ ਨੂੰ....ਘੁੱਦਾ