ਪੰਜਾਬ ਦਾ ਜੰਮਿਆਂ ਬੰਦਾ ਅੱਜ ਦੁਨੀਆਂ ‘ਚ ਕਿਤੇ ਵੀ ਬੈਠਾ ਓਹਦਾ ਧਿਆਨ ਚੱਤੋਪੈਰ ਦਿੱਲੀ ਰਹਿੰਦਾ। ਧੁੜਕੂ ਲੱਗਾ ਰਹਿੰਦਾ ਬੀ ਕਿਤੇ ਕੋਈ ਅਬੀ ਨਬੀ ਨਾ ਹੋਜੇ।
ਫੇਸਬੁੱਕ, ਇੰਸਟਾ ਖੋਲ੍ਹਕੇ ਦਿੱਲੀ ਦੀ ਖ਼ਬਰ ਵੱਲ ਅਹੁਲਦਾ। ਕਦੇ ਫ਼ੋਨ ਕਰਦਾ ਤੇ ਕਦੇ ਮੈਸਜ।
ਬਾਹਰਲਿਆਂ ਵੱਲੋਂ ਭੇਜਿਆ ਪੈਸਾ ਪੰਜਾਬ ਕੋਲ ਬੜਾ ਵੱਡਾ ਬੈਕਅੱਪ ਆ, ਤਾਂਹੀ ਹੋਰ ਸਟੇਟਾਂ ਦੇ ਮੁਕਾਬਲੇ ਪੰਜਾਬ ਸੈਂਟਰ ਦੇ ਹਲਕ ‘ਚ ਫਾਨਾ ਦੇਣ ਦੇ ਵੱਧ ਸਮਰੱਥ ਆ।
ਬਹੁਤ ਪੋਸਟਾਂ ਪੈ ਰਹੀਆਂ ਕਿ ਟਿਕਰੀ ਤੇ ਸਮਾਨ ਦੀ ਕਮੀ ਆ। ਅਸੀਂ ਦਸ ਬਾਰ੍ਹਾਂ ਦਿਨ ਟਿਕਰੀ ਤੇ ਰਹੇ, ਕੋਈ ਕਮੀ ਨਹੀਂ ਏਥੇ। ਹਰੇਕ ਪਿੰਡ, ਪਿੰਡੋਂ ਉਗਰਾਹੀ ਕਰਕੇ ਤੁਰਦਾ। ਹਰੇਕ ਬੰਦਾ ਆਵਦਾ ਲੀੜਾ ਲੱਤਾ ਨਾਲ ਚੱਕਦਾ। ਰਾਸ਼ਨ ਨਾਲ ਹੁੰਦਾ।
ਪਾਣੀ ਧਾਣੀ ਦੀ ਲੋੜ ਹੁੰਦੀ, ਓਹ ਨਾਲ਼ੋਂ ਨਾਲ ਵਰਤ ਰਿਹਾ।
ਬਾਕੀ ਆਪਾਂ ਕਿਹੜਾ ਏਥੇ ਸਮਾਨ ਨਾਲ ਆਏ ਆ ਜਰ। ਏਥੇ ਜੰਗ ਲੜ ਰਹੇ ਆਂ ਭਰਾ, ਕਨਫਰਟ ਜ਼ੋਨ ਕੀ ਦੇਖਣਾ? ਮੁਸਾਫਰੀ ‘ਚ ਵਾਧ ਘਾਟ ਚੱਲਦੀ ਈ ਆ।
ਧਰਨੇ ਨੇੜਲੇ ਇਲਾਕੇ ਦੇ ਬਿਜਨਸ ਨੂੰ ਚੰਗਾ ਫ਼ਾਇਦਾ ਹੋ ਰਿਹਾ ਧਰਨੇ ਦਾ। ਹੋਟਲ, ਕਰਿਆਨਾ, ਮੈਡੀਕਲ ਸਾਰੀ ਸਨਅਤ ਬਾਗੋ ਬਾਗ ਆ। ਹੱਥਾਂ ‘ਚ ਸਲੋਤਰ ਫੜ੍ਹੀ ਖਲੋਤੇ ਆਪਣੇ ਮੁੰਡੇ ਆਵਾਜਾਈ ਸੰਭਾਲ ਰਹੇ।।
ਬਹੁਤ ਲੋਕ ਆਏ ਤੇ ਬਹੁਤੇ ਨਹੀਂ ਆਏ। ਪਿੰਡਾਂ ‘ਚ ਕਈ ਲੋਕ ਹਜੇ ਵੀ ਮੀਣੇ ਬਣੇ ਬੈਠੇ,”ਕੋਈ ਨਾ ਦੇਖੀ ਜਾਊ ਆਪਾਂ ਵੀ ਲੋਕਾਂ ਨਾਲ ਈ ਆ।” ਨਿੱਕਲੋ, ਆਖਰੀ ਹਮਲਾ ਏਹੇ, ਏਹਤੋਂ ਬਾਅਦ ਉੱਠਣ ਜੋਗੇ ਨਹੀਂ ਛੱਡਣਾ ਅਗਲਿਆਂ।
ਫੀਲਿੰਗ ਜਿੰਨੀ ਮਰਜ਼ੀ ਚੱਕੀ ਜਾਈਏ, ਹਜੇ ਦਿੱਲੀ ਤੇ ਬਹੁਤਾ ਅਸਰ ਨਹੀਂ, ਦਸ ਕਿਮੀ ਅੱਗੇ ਜਾਕੇ ਦੇਖੋ ਦਿੱਲੀ ਆਮ ਵਾਂਗ ਚੱਲ ਰਹੀ ਆ।
ਮੋਰਚੇ ਦੀ ਚੜ੍ਹਦੀ ਕਲਾ ਬਹਾਲ ਰੱਖਣ ਲਈ ਆਗੂ ਬੰਦੇ ਤਕੜਾ ਪ੍ਰੋਗਰਾਮ ਦੇਣ, ਹੋਰ ਬਾਡਰ ਬੰਦ ਹੋਣ ਤਾਂਹੀ ਸੈਂਟਰ ਦਾ ਝੋਟੀਡਾਟ ਪੈਣਾ। ਕਰੋ ਹਿੰਮਤ...ਪਹੁੰਚੋ....ਘੁੱਦਾ
No comments:
Post a Comment